The Phnom Penh Post Search

Search form




Logo of Phnom Penh Post newspaper Phnom Penh Post - ​លោកនាយក​រដ្ឋមន្ត្រី៖ កាតព្វកិច្ច​ពាក់​ម៉ាស់អាច​នឹង​ដាក់ឱ្យអនុវត្ត​ឡើងវិញ បើ​ការឆ្លង​ក្នុង​ទ្រង់ទ្រាយ​ធំ​

​លោកនាយក​រដ្ឋមន្ត្រី៖ កាតព្វកិច្ច​ពាក់​ម៉ាស់អាច​នឹង​ដាក់ឱ្យអនុវត្ត​ឡើងវិញ បើ​ការឆ្លង​ក្នុង​ទ្រង់ទ្រាយ​ធំ​

Content image - Phnom Penh Post
បុរសជាអ្នកធាក់ស៊ីក្លូម្នាក់ ពាក់ម៉ាស់អង្គុយរង់ចាំភ្លៀវ អំឡុងពេលមានការរីករាលដាលជំងឺកូវីដ ១៩ កាលពីខែ ធ្នូ ឆ្នាំ ២០២០។ ហេង ជីវ័ន

​លោកនាយក​រដ្ឋមន្ត្រី៖ កាតព្វកិច្ច​ពាក់​ម៉ាស់អាច​នឹង​ដាក់ឱ្យអនុវត្ត​ឡើងវិញ បើ​ការឆ្លង​ក្នុង​ទ្រង់ទ្រាយ​ធំ​

ប្រមុខ​រាជរដ្ឋាភិបាល​កម្ពុជាបានបញ្ជាក់​ឱ្យដឹងថា កាតព្វកិច្ច​ពាក់​ម៉ាស់​អាច​នឹងត្រូវ​ដាក់ឱ្យ​អនុវត្ត​ជាថ្មី​ឡើងវិញ ប្រសិនបើ​ករណី​នៃ​ការរីក​រាលដាល​មេរោគ​កូ​វីដ ​១៩​ កើតមានឡើង​ក្នុង​ទ្រង់ទ្រាយ​ធំ ជាហេតុ​ដែល​លោក​នៅតែ​បន្តធ្វើ​ការអំពាវនាវ​ដ​ល់​ប្រជាពលរដ្ឋ​ឱ្យ​យកចិត្តទុកដាក់​លើ​ការការពារ​ពី​កូ​វីដ ​១៩ ​នេះ​។​

​លោកនាយក​រដ្ឋមន្ត្រី ហ៊ុន សែន បាន​ថ្លែង​ឱ្យដឹង​នៅ​ថ្ងៃទី​ ១ ខែកក្កដា ពី​ខេត្តបន្ទាយមានជ័យ ដោយ​សុំឱ្យ​ប្រជាពលរដ្ឋ​មានការ​ប្រុងប្រយ័ត្ន និង​អនុវត្ត​វិធានការ​សុខាភិបាល​ដោយ​ពាក់​ម៉ាស់ លាងដៃ​នឹង​សាប៊ូ​ឬ​អាល់កុល និង​រក្សា​គម្លាត​សុវត្ថិភាព​ជាដើម​។​

​លោក​មានប្រសាសន៍ថា៖ «​ពិតមែន​ហើយ​កាតព្វកិច្ច​ពាក់​ម៉ាស់​ត្រូវបាន​លើកលែង ប៉ុន្តែ​រដ្ឋាភិបាល​អាច​នឹង​ដាក់ឱ្យអនុវត្ត​ឡើងវិញ​នូវ​កាតព្វកិច្ច​ពាក់​ម៉ាស់ ក្នុងករណី​រកឃើញថា​មាន​ការរីក​រាលដាល​ទ្រង់ទ្រាយ​ធំ​ក្នុងប្រទេស​របស់​យើង ប៉ុន្តែ​បើ​ការឆ្លង​ស្ថិតក្នុង​កម្រិត​ប៉ុណ្ណេះ​គឺ​មិនជា​បញ្ហា​ធំ​ពេក​ទេ ដោយសារ​ចំនួន​ឆ្លង​នៅមាន​តិច​ណាស់​»​។​

​បើតាម​លោកនាយក​រដ្ឋមន្ត្រី ហ៊ុន សែន មកដល់ពេលនេះ​មិនមាន​អ្នកជំងឺ​កូ​វីដ​ ១៩​ សម្រាក​ព្យាបាល​នៅក្នុង​មន្ទីរពេទ្យ​ឡើយ​ទាំង​ក្នុង​រាជធានី​ភ្នំពេញ និង​បណ្តា​ខេត្ត​ផ្សេងៗ ដោយសារតែ​អ្នកជំងឺ​ដែល​រកឃើញថា ​មាន​ឆ្លង​ថ្មី​អស់នេះ​មាន​អា​ការៈធូរស្រាល ​និង​បាន​ស្នើសុំ​សម្រាក​ព្យាបាល​នៅឯ​គេហដ្ឋាន​ផងដែរ​។​

​យោងតាម​របាយការណ៍​របស់​ក្រសួងសុខាភិបាល ក្នុង​រយៈពេល​៣​ថ្ងៃ គឺ​ចាប់ពី​ថ្ងៃទី​ ២៨​ ដល់​ថ្ងៃទី​ ៣០ ខែមិថុនា មនុស្ស​ចំនួន​ ២០​ នាក់​ បាន​រកឃើញ​ឆ្លង​មេរោគ​កូ​វីដ ​១៩ ​តាមរយៈ​ការធ្វើ​តេស្ត​ម៉ាស៊ីន​ធំ (PCR) ដែល​ភាគច្រើន​ជា​ករណី​ឆ្លង​ក្នុង​សហគមន៍​។

​បើតាម​ក្រសួង​ដដែល គិត​ត្រឹម​ព្រឹក ថ្ងៃទី​ ០១ ខែ កក្កដា ឆ្នាំ​ ២០២២ កម្ពុ​ជាមាន​អត្រា​ឆ្លង​មេរោគ​កូ​វីដ ​១៩​ សរុប​ចំនួន​ ១៣៦ ២៨២ នាក់​អ្នកជា​សះស្បើយ​សរុប​ចំនួន ១៣៣ ២០៦ នាក់ និង​អ្នកស្លាប់​ចំនួន ៣ ០៥៦ នាក់​៕​

វីដេអូ៖

អត្ថបទគួរចាប់អារម្មណ៍