.jpg)
វ៉ាក់សាំងស៊ីណូវ៉ាក់ដែលជាជំនួយរបស់រដ្ឋាភិបាលចិន មកដល់ប្រទេសកម្ពុជា កាលពីថ្ងៃទី ៤ ខែ កញ្ញា ឆ្នាំ ២០២១។ ហេង ជីវ័ន
មន្ត្រីជាន់ខ្ពស់នៃក្រសួងសុខាភិបាលបានឱ្យដឹងថា នៅពាក់កណ្តាលខែកក្កដានេះ អ្នកជំនាញនៃក្រុមហ៊ុនផលិតវ៉ាក់សាំងកូវីដ ១៩ Sinovac Life Sciences នឹងមកកាន់ប្រទេសកម្ពុជា ដើម្បីធ្វើការពិនិត្យនិងសិក្សាទៅលើមូលដ្ឋានសំណង់ ការរក្សាវ៉ាក់សាំង និងការវេចខ្ចប់វ៉ាក់សាំងផងដែរ។
នេះជាការថ្លែងឱ្យដឹងតាមរយៈលោកស្រី យក់ សម្បត្តិ រដ្ឋលេខាធិការក្រសួងសុខាភិបាល កាលពីថ្ងៃទី ៣០ ខែមិថុនា ថាការសិក្សាជំហានដំបូងបានបញ្ចប់ ហើយដៃគូវិស័យឯកជនបានធ្វើការមួយជំហានជាមួយនឹងក្រុមហ៊ុន ស៊ីណូវ៉ាក់រួចហើយផងដែរ រហូតបានចុះអនុស្សរណៈនៃការយោគយល់គ្នាមួយនាពេលកន្លងមកផងដែរ។
លោកស្រីថា៖ «ខាងភាគីក្រុមហ៊ុនឯកជនក៏កំពុងតែពិនិត្យ សិក្សាវាយតម្លៃទៅលើបច្ចេកទេស ដែលយើងហៅថា facilities study គឺជិតចប់ហើយដែរ ហើយនៅពេលដែលសិក្សាចប់នឹងមានការចុះហត្ថលេខាលើកិច្ចសន្យាផងដែរ។ នៅពេលចុះហត្ថលេខារួចហើយ អ្នកជំនាញការរបស់ភាគីក្រុមហ៊ុនស៊ីណូវ៉ាក់នឹងចុះមកប្រទេសកម្ពុជា ដែលអាចនឹងមកនៅថ្ងៃទី ១២ ឬ ១៣ ខាងមុខនេះ»។
លោកស្រី យក់ សម្បត្តិ បានបញ្ជាក់ថា ក្រុមអ្នកជំនាញនឹងធ្វើការសិក្សាទៅលើមូលដ្ឋានសំណង់ បច្ចេកទេសក្នុងការរក្សាវ៉ាក់សាំង និងសិក្សាទៅលើបច្ចេទេសនៃការច្រកនិងវេចខ្ចប់វ៉ាក់សាំងផងដែរ។
លោកស្រីថា៖ «សម្រាប់ជំហានក្រោយបំផុតរបស់យើងគឺការច្រក និងវេចខ្ចប់ប៉ុណ្ណោះនៅពេលដែលវ៉ាក់សាំងនេះដាក់ឱ្យដំណើរការលក់នៅលើទីផ្សារ»។
គួររំឭកផងដែរថា កាលពីថ្ងៃទី ០១ ខែមិថុនា កន្លងទៅ ក្រសួងសុខាភិបាលបានចុះហត្ថលេខាជាមួយនឹងសហគ្រាសឱសថកម្ពុជា និងក្រុមហ៊ុន Sinovac Life Sciences នៃសាធារណរដ្ឋប្រជាមានិតចិន លើអនុស្សរណៈនៃការយោគយល់គ្នា ស្ដីពីកិច្ចសហប្រតិបត្តិការវេចខ្ចប់វ៉ាក់សាំងបង្ការវីរុសកូវីដ ១៩។
នាពេលនោះដែរ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ក៏បានថ្លែងបញ្ជាក់ដែរថា រាជរដ្ឋាភិបាលកម្ពុជា បានដាក់ការបញ្ជាទិញវ៉ាក់សាំងកូវីដ ១៩ រហូតជាង ១០៤ លានដូស ពីសហគ្រាសឱសថកម្ពុជារយៈពេល ៣ ឆ្នាំ គឺពីឆ្នាំ ២០២៤ ដល់ ២០២៦ សម្រាប់ផ្គត់ផ្គង់តម្រូវការប្រើប្រាស់ក្នុងប្រទេស។
យោងតាមរបាយការណ៍របស់ក្រសួងសុខាភិបាល គិតត្រឹមយប់ថ្ងៃទី ៣០ ខែមិថុនា អត្រាអ្នកដែលបានចាក់វ៉ាកើសាំងកូវីដ ១៩ នៅទូទាំងប្រទេស សម្រាប់ដូសទី១ មានចំនួន ជាង ១៥ លាននាក់, ដូសទី២ មានចំនួនជាង ១៤ លាននាក់ ដូសទី៣ មានជាង ៩ លាននាក់, ដូសទី៤ មានចំនួនជាង ២,៩ លាននាក់ និងដូសទី៥ មានចំនួនជាង ៣០ ម៉ឺននាក់៕
