ភ្នំពេញៈ លោក ប្រាក់ សុខុន ប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ា បានជួបជាមួយមេដឹកនាំយោធាមីយ៉ាន់ម៉ាលោក មីន អ៊ុងឡាំង ប្រធានក្រុមប្រឹក្សារដ្ឋបាលរដ្ឋ (SAC) នាថ្ងៃទី ៣០ ខែមិថុនា ដោយពិភាក្សាពីការអនុវត្តកិច្ចព្រមព្រៀងជាឯកច្ឆន្ន ៥ ចំណុចរបស់អាស៊ាន ស្ថានភាពនយោបាយ និងមនុស្សធម៌នៅមីយ៉ាន់ម៉ា។ នេះបើយោងតាមក្រសួងការបរទេសកម្ពុជា។
លោក ប្រាក់ សុខុន ដែលជារដ្ឋមន្ត្រីការបរទេសកម្ពុជាបានចេញទៅបំពេញទស្សនកិច្ចលើកទី ២ នៅមីយ៉ាន់ម៉ា រយៈពេល ៥ ថ្ងៃ ចាប់ពីថ្ងៃទី ២៩ ខែមិថុនា ដល់ថ្ងៃទី ៣ ខែកក្កដា ដើម្បីតាមដានវឌ្ឍនភាពនៃការអនុវត្តកុងសង់ស៊ីស ៥ ចំណុចរបស់អាស៊ាន និងតាមដានលទ្ធផលនៃកិច្ចប្រជុំពិគ្រោះយោបល់ស្តីពីជំនួយមនុស្សធម៌របស់អាស៊ានសម្រាប់មីយ៉ាន់ម៉ា។
ជំនួបនេះអមដំណើរដោយលោក ឯកផាប់ ផាន់ថាវង្ស អគ្គលេខាធិការរងអាស៊ានទទួលបន្ទុកសហគមន៍សង្គម-វប្បធម៌អាស៊ាន។
ក្រសួងការបរទេសកម្ពុជាបានឱ្យក្រុមអ្នកសារព័ត៌មានដឹងតាមប្រព័ន្ធតេឡេក្រាម (Telegram) នាថ្ងៃទី ១ ខែកក្កដា ថា៖ «ភាគីទាំង ២ បានផ្លាស់ប្តូរយោបល់ពីការអនុវត្តកិច្ចព្រមព្រៀងជាឯកច្ឆន្ទ ៥ ចំណុចរបស់អាស៊ាន និងស្ថានភាពនយោបាយ និងមនុស្សធម៌នៅមីយ៉ាន់ម៉ា»។
ប្រភពដដែលបញ្ជាក់ថា លោក ប្រាក់ សុខុន ដែលអមដំណើរដោយលោក ឯកផាប់ ផាន់ថាវង្ស ក៏បានជួបជាមួយលោក វ៉ុនណា ម៉ោងល្វីន រដ្ឋមន្ត្រីការបរទេសមីយ៉ាន់ម៉ា និងលោក កូ កូ ឡាំង រដ្ឋមន្ត្រីសហប្រតិបត្តិការអន្តរជាតិ។
ក្រសួងការបរទេសកម្ពុជាបញ្ជាក់ថា ភាគីទាំង ២ បានពិភាក្សាពីការបេ្តជ្ញាចិត្តរបស់ SAC ក្នុងការជំរុញការអនុវត្តកុងសង់ស៊ីសអាស៊ានទៅមុខបន្ថែមទៀត ស្ថានការណ៍នយោបាយនៅមីយ៉ាន់ម៉ាការតាមដានលទ្ធផលនៃកិច្ចប្រជុំពិគ្រោះយោបល់ស្តីពីជំនួយមនុស្សធម៌អាស៊ានជូនមីយ៉ាន់ម៉ាកាលពីខែឧសភានៅរាជធានីភ្នំពេញ។
ភាគីទាំង ២ ព្រមទាំងបានពិភាក្សាពីវិធីសាស្ត្រដែលទីភ្នាក់ងារឯកទេសរបស់អង្គការសហប្រជាជាតិ និងអង្គការមិនមែនរដ្ឋាភិបាលអន្តរជាតិអាចចូលរួមក្នុងការងារមនុស្សធម៌ ដែលដឹកនាំដោយមីយ៉ាន់ម៉ា ដែលក្នុងនោះរួមមានការវាយតម្លៃពីតម្រូវការរួមនៅក្នុងតំបន់ដែលពិបាកទៅដល់ផងដែរ៕