មន្ត្រីជាន់ខ្ពស់នៃក្រសួងសាធារណការនិងដឹកជញ្ជូន បានលើកឡើងថា គ្រោះថ្នាក់ចរាចរណ៍គឺជាមូលហេតុចម្បងនៃការស្លាប់នៅកម្ពុជា ដោយក្នុងមួយថ្ងៃៗគិតជាមធ្យមមានមនុស្ស៥នាក់បានស្លាប់ និងរងរបួស ១០ នាក់ តាមដងផ្លូវក្នុងប្រទេសកម្ពុជា។
នេះជាការលើកឡើងរបស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នាកិច្ចប្រជុំកំពូលស្តីពីការធ្វើឱ្យប្រសើរឡើងនូវសុវត្ថិភាពចរាចរណ៍សកល ក្រោមប្រធានបទ៖ «ដំណើរឆ្ពោះទៅឆ្នាំ ២០៣០ សម្រាប់សុវត្ថិភាពចរាចរណ៍ផ្លូវគោក ការធានាឱ្យមានសកម្មភាពប្រចាំទសវត្សរ៍ និងការផ្សព្វផ្សាយ»។
យោងតាមក្រសួងនេះបានឱ្យដឹងថា លោក ស៊ុន ចាន់ថុល ដែលជាអនុប្រធានអចិន្ត្រៃយ៍គណៈកម្មាធិការជាតិសុវត្ថិភាពចរាចរណ៍ផ្លូវគោក(គ.ស.ច.គ.) ផងដែរនោះ បានដឹកនាំគណៈប្រតិភូកម្ពុជាចំនួន ០៣ រូបចូលរួមកិច្ចប្រជុំកំពូលស្តីពីការធ្វើឱ្យប្រសើរឡើងនូវសុវត្ថិភាពចរាចរណ៍សកលនេះ ដែលប្រព្រឹត្តឡើងនៅថ្ងៃទី៣០ខែមិថុនា និងថ្ងៃទី ០១ ខែកក្កដា នាទីក្រុងញូវយ៉ក សហរដ្ឋអាមេរិក។
លោក ស៊ុន ចាន់ថុល បានថ្លែងថា៖ «គ្រោះថ្នាក់ចរាចរណ៍ជាមូលហេតុចម្បងនៃការស្លាប់នៅកម្ពុជា ពោលគឺ ក្នុងមួយថ្ងៃៗគិតជាមធ្យមមានមនុស្ស៥នាក់បានស្លាប់ និងរងរបួស១០នាក់។ យោងតាមការសិក្សារបស់កម្មវិធីអភិវឌ្ឍន៍សហប្រជាជាតិ(UNDP) ប្រទេសកម្ពុជាបានខាតបង់ផលិតផលក្នុងស្រុកសរុប (GDP) ប្រមាណ ២,៥% ទៅ ៣% ក្នុង ១ ឆ្នាំ ដោយសារគ្រោះថ្នាក់ចរាចរណ៍»។
រាជរដ្ឋាភិបាលកម្ពុជាបានបង្កើតគណៈកម្មាធិការជាតិសុវត្ថិភាពចរាចរណ៍ផ្លូវគោក ដោយប្រកាន់ខ្ជាប់នូវគោលការណ៍លើកកម្ពស់សុវត្ថិភាពចរាចរណ៍ផ្លូវគោកសកល និងស្ថានភាពមូលដ្ឋានដើម្បីបង្ការ និងកាត់បន្ថយគ្រោះថ្នាក់ចរាចរណ៍ផងដែរ។
យោងតាមរបាយការណ៍ប្រចាំឆ្នាំ ២០១០ ដល់ឆ្នាំ ២០២០ របស់ប្រព័ន្ធជនរងគ្រោះ ដោយសារគ្រោះថ្នាក់ចរាចរណ៍ (RCVIS) មូលហេតុចម្បងនៃគ្រោះថ្នាក់ចរាចរណ៍គឺ ល្មើសល្បឿន ជែងគ្រោះថ្នាក់ មិនគោរពសិទ្ធិអាទិភាព និងស្រវឹង។ កំហុសក្នុងការរចនាផ្លូវ និងកង្វះលក្ខណៈបច្ចេកទេសយានជំនិះក៏បានរួមចំណែកដល់គ្រោះថ្នាក់ចរាចរណ៍ផងដែរ។
លោក ស៊ុន ចាន់ថុល បានមានប្រសាសន៍ថា ៖ «យើងបានពង្រឹងការអនុវត្តច្បាប់ចរាចរណ៍ផ្លូវគោក និងគោលនយោបាយជាតិស្ដីពីសុវត្ថិភាពចរាចរណ៍ផ្លូវគោក និងទសវត្សរ៍នៃសកម្មភាពឆ្នាំ ២០១១-២០២០។ យើងបានជួយសង្គ្រោះជីវិតមនុស្ស ៤ ៥៦១ នាក់ ក្នុងអំឡុងពេលនេះ បើធៀបនឹងគោលដៅរបស់យើងដែលមានចំនួន ៧ ៣៣៨ នាក់"។
បន្ទាប់ពីសេចក្តីប្រកាសនៃកិច្ចប្រជុំថ្នាក់រដ្ឋមន្ត្រីលើកទី៣ ស្តីពីសុវត្ថិភាពចរាចរណ៍ផ្លូវគោកនៅទីក្រុង Stockholm និងផែនការសកលដែលដាក់ចេញដោយអង្គការសុខភាពពិភពលោក និងគណៈកម្មការតំបន់របស់អង្គការសហប្រជាជាតិនៅថ្ងៃទី ២៨ ខែ តុលា ឆ្នាំ២០២១ កម្ពុជាបានបង្កើតទសវត្សរ៍នៃ សកម្មភាពសម្រាប់ឆ្នាំ ២០២១-២០៣០ ក្នុងគោលបំណងកាត់បន្ថយគ្រោះថ្នាក់ចរាចរណ៍ឱ្យបាន ៥០%។
ក្រសួងសាធារណការ និងដឹកជញ្ជូនបានបញ្ជាក់ថា ការកាត់បន្ថយគ្រោះថ្នាក់ចរាចរណ៍ គឺជាការទទួលខុសត្រូវរបស់អ្នកពាក់ព័ន្ធទាំងអស់ រដ្ឋាភិបាលមិនអាចធ្វើបានតែម្នាក់ឯងទេ ប៉ុន្តែត្រូវការទាំងវិស័យសាធារណៈ និងឯកជន អង្គការក្រៅរដ្ឋាភិបាល និងប្រព័ន្ធផ្សព្វផ្សាយ ដើម្បីសហការជាមួយរដ្ឋាភិបាល ដើម្បីអប់រំអ្នកប្រើប្រាស់ផ្លូវអំពីច្បាប់ស្តីពីចរាចរណ៍ផ្លូវគោក៕