សៀមរាបៈ នៅក្នុងឆមាសទី១ ឆ្នាំ ២០២២ ក្រុមការងារសហគមន៍នៃអាជ្ញាធរជាតិអប្សរា បានអនុញ្ញាតឱ្យប្រជាពលរដ្ឋក្នុងតំបន់អង្គរ ជួសជុលផ្ទះ និងសាងសង់សំណង់ស្រាលបានចំនួន ៦៨៣ សំណើ ខណៈនៅតែមានការប្រកាសលក់ដីនៅក្នុងតំបន់អង្គរ។
លទ្ធផលការងារសហគមន៍របស់អាជ្ញាធរជាតិអប្សរា នៅឆមាសទី១ ក្នុងឆ្នាំ ២០២២ បានចុះផ្សព្វផ្សាយអប់រំ និងពិនិត្យការស្នើសុំជួសជុលផ្ទះ រួមទាំងសាងសង់សំណង់តូចតាចទាំង ៥ ស្រុក/ក្រុង ក្នុងតំបន់រមណីយដ្ឋានអង្គរ បានចំនួន ៩២៧ សំណើ ដែលក្នុងនោះបាន អនុញ្ញាតជូនប្រជាពលរដ្ឋចំនួន ៦៨៣ សំណើ។ នេះបើតាមការចុះផ្សាយរបស់អាជ្ញាធរជាតិអប្សរា នៅថ្ងៃទី ១ ខែកក្កដា។
ការអនុញ្ញាតទាំងនោះ រួមមាននៅស្រុកប្រាសាទបាគងបានចំនួន ៩៧ សំណើ ស្រុកអង្គរធំបានចំនួន៤៣សំណើ ស្រុកពួកបានចំនួន ១៥២ សំណើ ក្រុងសៀមរាបបានចំនួន ២៦៩ សំណើ ស្រុកបន្ទាយស្រី ១១៩ សំណើ និងក្រៅតំបន់រមណីយដ្ឋានអង្គរបានចំនួន ០៣ សំណើ សរុបចំនួន ៦៨៣ សំណើ។
ជាមួយគ្នានេះ ក៏មានបញ្ហាប្រឈមមួយចំនួនដូចជា ការជួសជុល ឬសាងសង់មុនការចុះពិនិត្យរបស់ក្រុមការងារ ការប្រកាសលក់ដីក្នុងតំបន់ការពារតាមរយៈបណ្ដាញទំនាក់ទំនងសង្គមហ្វេកប៊ុក និងការដាក់ស្លាក (លក់ដី) ផ្ទាល់ក្នុងតំបន់ការពារនៅតែមាន។
ជាគោលដៅបន្ត ក្រុមការងារសហគមន៍នៃអាជ្ញាធរជាតិអប្សរានឹងបន្តផ្សព្វផ្សាយ អប់រំប្រជាពលរដ្ឋឱ្យយល់កាន់តែច្បាស់ពីតួនាទី ភារកិច្ចរបស់អាជ្ញាធរជាតិអប្សរា ការប្រើប្រាស់ដីធ្លីក្នុងតំបន់ការពារនៃរមណីយដ្ឋានអង្គរ នីតិវិធីនៃការដាក់ពាក្យស្នើសុំជួសជុល និងសាងសង់ផ្ទះក្នុងរមណីយដ្ឋានអង្គរឱ្យកាន់តែមានប្រសិទ្ធភាពទាន់ពេលវេលា។
អាជ្ញាធរជាតិអប្សរាបានបញ្ជាក់ថា រាល់ការស្នើសុំច្បាប់ជួសជុល គឺពុំមានបង់ប្រាក់ទេ៕