.jpg)
លោក ថោង ខុន រដ្ឋមន្ត្រីក្រសួងទេសចរណ៍ បានចេញសារាចរណែនាំ និងក្រើនរំឭកដល់មន្ទីរទេសចរណ៍រាជធានី-ខេត្ត និងម្ចាស់ឬអ្នកគ្រប់គ្រងអាជីវកម្មទេសចរណ៍ ត្រូវពង្រឹងការអនុវត្តវិធានការនានារបស់រាជរដ្ឋាភិបាល ក្រសួងសុខាភិបាល និងវិធានសុវត្ថិភាពទេសចរណ៍ ដើម្បីប្រយុទ្ធ និងទប់ស្កាត់ការឆ្លងរាលដាលក្នុងសហគមន៍នៃមេរោគកូវីដ ១៩។
នៅក្នុងប្រទេសកម្ពុជាបានរកឃើញការឆ្លងមេរោគកូវីដ ១៩ ឡើងវិញ បន្ទាប់ពីអាក់ខាននូវការឆ្លង និងការស្លាប់ដោយជំងឺនេះរយៈពេល ៥២ ថ្ងៃកន្លងមក ដែលធ្វើឱ្យក្រសួងទេសចរណ៍ បានធ្វើការក្រើនរំឭកដល់គ្រប់ស្ថាប័ននិងអ្នកពាក់ព័ន្ធធ្វើការពង្រឹងការអនុវត្តវិធានការនានារបស់រាជរដ្ឋាភិបាល ក្រសួងសុខាភិបាល និងវិធានសុវត្ថិភាពទេសចរណ៍ ឬនីតិវិធីប្រតិបត្តិស្តង់ដាអប្បបរមា-SOP។
លោក ថោង ខុន បានលើកឡើងតាមរយៈសារាចរណែនាំ កាលពីថ្ងៃទី ០១ ខែកក្កដាថា មន្ទីរទេសចរណ៍រាជធានី-ខេត្ត និងម្ចាស់ឬអ្នកគ្រប់គ្រងអាជីវកម្មទេសចរណ៍ ត្រូវបន្តពង្រឹងការអនុវត្តឱ្យបានយ៉ាងខ្ជាប់ខ្ជួននូវវិធានការទាំងឡាយដែលបានដាក់ចេញដោយក្រសួងសុខាភិបាល និងវិធានសុវត្ថិភាពទេសចរណ៍របស់ក្រសួងទេសចរណ៍ទប់ស្កាត់ការរីករាលដាលជំងឺកូវីដ ១៩។
លោកបានបន្ថែមថា៖ «គ្រប់មូលដ្ឋានអាជីវកម្ម សេវាកម្មទេសចរណ៍ ត្រូវបន្តពង្រឹងការគ្រប់គ្រងឱ្យបានល្អប្រសើរ ពិសេសត្រូវកំណត់សមត្ថភាពផ្ទុក (Carrying Capacity) អតិបរមា ដោយប្រើប្រាស់ប្រព័ន្ធគ្រប់គ្រង សមត្ថភាពផ្ទុក (Carrying Capacity Management System) ដែលរៀបចំដោយក្រសួងទេសចរណ៍។
លោក ថោង ខុន ក៏បានបន្តថា គ្រប់មូលដ្ឋានអាជីវកម្ម សេវាកម្មទេសចរណ៍ត្រូវធានាថា គ្រប់បុគ្គលិកបម្រើការបានចាក់វ៉ាក់សាំងកូវីដ ១៩ ទាំងដូសមូលដ្ឋាន និងដូសជំរុញ ស្របតាមការកំណត់របស់ក្រសួងសុខាភិបាល។ ជាមួយគ្នានេះដែរ ក៏ត្រូវអនុវត្តនូវវិធានការទប់ស្កាត់ការរីករាលដាលជំងឺកូវីដ ១៩ ហើយគ្រប់មូលដ្ឋានអាជីវកម្ម សេវាកម្មទេសចរណ៍ ត្រូវបន្តពង្រឹងគុណភាពសេវាកម្ម ថែរក្សាបរិស្ថាន-អនាម័យ និងរក្សាតម្លៃផលិតផល និងសេវាកម្ម ឱ្យបានសមរម្យ។
មន្ទីរទេសចរណ៍រាជធានី-ខេត្ត ត្រូវបន្តសហការជាមួយរដ្ឋបាលរាជធានី-ខេត្ត និងអាជ្ញាធរមូលដ្ឋានដើម្បីពិនិត្យ និងពង្រឹងបន្ថែមនូវការអនុវត្តវិធានសុវត្ថិភាពទេសចរណ៍ (ឬនីតិវិធីប្រតិបត្តិស្តង់ដាអប្បបរមា-SOP) ហើយមន្ទីរទេសចរណ៍រាជធានី-ខេត្ត ត្រូវបន្តសហការជាមួយរដ្ឋបាលរាជធានី-ខេត្ត និងអាជ្ញាធរមូលដ្ឋាន ណែនាំបន្តដល់គ្រប់មូលដ្ឋានអាជីវកម្ម សេវាកម្មទេសចរណ៍។
រដ្ឋមន្ត្រីក្រសួងទេសចរណ៍ក៏បានតម្រូវឱ្យអ្នកគ្រប់គ្រងមូលដ្ឋានអាជីវកម្ម ត្រូវជូនដំណឹងមកអាជ្ញាធរមូលដ្ឋាននូវរាល់ករណីសង្ស័យ ចំពោះភ្ញៀវដែលជាប់ពាក់ព័ន្ធ នឹងជំងឺកូវីដ ១៩ (បន្ទាប់ពីស្កេន QR Code ទប់ស្កាត់កូវីដ ១៩)។
លោក ថោង ខុន បានបញ្ជាក់ថា៖ «គ្រប់មូលដ្ឋានអាជីវកម្ម ត្រូវបន្តអនុវត្តរាល់វិធានការជាធរមាន ហើយក្នុងករណីខកខានមិនបានអនុវត្ត ឬអនុវត្តមិនបានត្រឹមត្រូវ មន្ទីរទេសចរណ៍រាជធានី ខេត្ត ត្រូវស្នើសុំការសហការពីអាជ្ញាធរមូលដ្ឋាន បញ្ឈប់ប្រតិបត្តិការអាជីវកម្មនោះជាដាច់ខាតនិងបន្តនីតិវិធីស្នើសុំការអនុវត្តវិធានការច្បាប់ជាធរមាន ពិសេសច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត»។
លោកក៏បានបន្ថែមថា មន្ទីរទេសចរណ៍រាជធានី-ខេត្ត ត្រូវបន្តសហការជាមួយរដ្ឋបាលរាជធានី-ខេត្ត និងអាជ្ញាធរមូលដ្ឋាន ចុះពិនិត្យទីតាំងដែលជាប់បម្រាមហាមឃាត់ការប្រកបអាជីវកម្ម ចៀសវាងការប្រកបអាជីវកម្មដោយពុំបានសុំច្បាប់អនុញ្ញាតត្រឹមត្រូវ៕
