បាត់ដំបងៈ សមត្ថកិច្ចចម្រុះនៅថ្ងៃទី ១ ខែកក្កដានេះ បានធ្វើការត្រួតពិនិត្យរថយន្តសរុប ៦៣៧ គ្រឿង និងមនុស្ស ៧៦២ នាក់ ដើម្បីបង្ការទប់ស្កាត់ និងបង្ក្រាបបទល្មើសគ្រឿងញៀន និងសារធាតុគីមីផ្សំគ្រឿងញៀនខុសច្បាប់នៅតាមបន្ទាត់ព្រំដែនក្នុងស្រុកភ្នំព្រឹក។ ប៉ុន្តែមិនមានរកឃើញបទល្មើសគ្រឿងញៀននោះទេ។ នេះបើយោងតាមស្នងការដ្ឋាននគរបាលខេត្តបាត់ដំបង។
ប្រតិបត្តិការនេះត្រូវបានដឹកនាំដោយលោក កុយ ហៀង ស្នងការរងផែនការងារប្រឆាំងគ្រឿងញៀន សហការជាមួយសមត្ថកិច្ចពាក់ព័ន្ធ ដែលមាន ២ គោលដៅ។
គោលដៅទី១ គឺនៅចំណុចក្បែរច្រកអូររំដួល ផ្លូវលេខ ៥៧B ស្ថិតក្នុងក្រុមទី០៥ ភូមិពេជ្រចិន្ដា ឃុំពេជ្រចិន្ដា ស្រុកភ្នំព្រឹក ខេត្តបាត់ដំបង ចាប់ពីម៉ោង ៨ ដល់ម៉ោង ១១ និង ៣០ នាទីព្រឹក។ ក្នុងនោះមានសមាសភាពចូលរួម កម្លាំងចម្រុះសរុបមានចំនួន ៦០ នាក់ ដែលមានកម្លាំងស្នងការដ្ឋាននគរបាលខេត្តបាត់ដំបងចំនួន ១០ នាក់ កម្លាំងកងរាជអាវុធហត្ថខេត្ត និងស្រុកចំនួន ១០ នាក់ កម្លាំងនគរបាលស្រុកភ្នំព្រឹកចំនួន ៣០ នាក់ កម្លាំងនគរបាលវរសេនាតូចការពារព្រំដែនគោក ៨១៩ ចំនួន ១០ នាក់ ដឹកនាំដោយលោក វរសេនីយ៍ទោ អ៊ិន កុល ជាមេបញ្ជាការ។ កម្លាំងទាំងនេះបានធ្វើការត្រួតពិនិត្យលើរថយន្តចំនួន ៣៨៧ គ្រឿង មនុស្ស ៤៣៥ នាក់ (ស្រី ២០០ នាក់)។
គោលដៅទី២ គឺនៅផ្លូវលេខ ៥៧B ស្ថិតក្នុងក្រុមទី៦ ភូមិអូរ ឃុំពេជ្រចិន្ដា ស្រុកភ្នំព្រឹក ចាប់ពីម៉ោង ១ រសៀល ដល់ម៉ោង ១៦ និង ៣០ នាទីរសៀល បានធ្វើការត្រួតពិនិត្យលើរថយន្តចំនួន ២៥០ គ្រឿង មនុស្ស ៣២៧ នាក់ (ស្រី ១៦៣ នាក់)។
ជាលទ្ធផលទាំង ២ គោលដៅនេះ មានរថយន្តសរុប ៦៣៧ គ្រឿង មនុស្ស ៧៦២ នាក់ ត្រូវបានត្រួតពិនិត្យ តែសមត្ថកិច្ចពុំបានរកឃើញសារធាតុគីមីផ្សំគ្រឿងញៀនខុសច្បាប់ឡើយ។ ទោះយ៉ាងណា កម្លាំងចម្រុះបានណែនាំឱ្យពួកគាត់ចូលរួមគោរពច្បាប់ចរាចរណ៍ទាំងអស់គ្នា៕