កំពង់ឆ្នាំងៈ កម្លាំងសមត្ថកិច្ចស្រុកបរិបូណ៌បានបំផ្លាញចោលនៅនឹងកន្លែងនូវរបាំងសាច់អួនប្រវែង ៤០០ ម៉ែត្រ បង្គោលចំនួន ៣០០ ដើម នៅក្នុងប្រតិបត្តិការចុះបង្ក្រាបបទល្មើសនេសាទនៅចំណុចកោះអាចម៍ ភូមិកោះតាម៉ូវ ឃុំកំពងព្រះគគីរ ស្រុកបរិបូណ៌ ខេត្តកំពង់ឆ្នាំង នាថ្ងៃទី ១ ខែកក្កដា។
ហ្វេសប៊ុកស្នងការដ្ឋាននគរបាលខេត្តកំពង់ឆ្នាំងបញ្ជាក់នាថ្ងៃទី ២ ខែកក្កដា ថា កម្លាំងអធិការដ្ឋាននគរបាលស្រុកបរិបូណ៌សហការជាមួយកម្លាំងចម្រុះ គណៈបញ្ជាការឯកភាពស្រុកបរិបូណ៌រួមជាមួយសហគមន៍នេសាទកំពង់ព្រះគគីរ ដឹកនាំដោយលោក ផល សុភាព អភិបាលរងស្រុកបរិបូណ៌បានចុះបង្ក្រាបបទល្មើសនេសាទនេះ។
ហ្វេសប៊ុកដដែលបន្តថា ក្នុងប្រតិបត្តិការនេះ កម្លាំងសមត្ថកិច្ចសរុបមានចំនួន ២០ នាក់ ដោយប្រើប្រាស់មធ្យោបាយកាណូតស្មាច់ចំនួន ៣ គ្រឿង។
ហ្វេសប៊ុកដដែលបញ្ជាក់ថា៖ «ក្នុងកិច្ចប្រតិបត្តិការនេះបង្ក្រាបដកហូតបានរបាំងសាច់អួនចំនួន ៥ កន្លែងប្រវែង ៤០០ ម៉ែត្រ លបលូសាច់អួនចំនួន ៤ បង្គោលចំនួន ៣០០ ដើម ត្រីចម្រុះចំនួន ១០ គីឡូ។ ឧបករណ៍សម្ភារបំផ្លាញចោលនៅនឹងកន្លែង»៕