ភ្នំពេញៈ អង្គការមូលនិធិសត្វព្រៃពិភពលោក (WWF) អំពាវនាវដល់ផលិតករភាពយន្តប្រើប្រាស់ទេពកោសល្យ និងកាមេរ៉ាផ្តិតរូបភាពបង្ហាញពិភពលោកនូវសម្រស់តំបន់ព្រៃលិចទឹកមេគង្គ ដើម្បីឱ្យសាធារណជនយល់អំពីតម្លៃ និងសារៈសំខាន់របស់តំបន់ដ៏មានសក្តានុពល។
WWF បានដកស្រង់សម្ដីលោក Steven Paglia នាយកកម្មវិធីអភិរក្សនៃអង្គការ WWF បង្ហោះលើហ្វេសប៊ុកនាថ្ងៃទី ២ ខែកក្កដា ថា៖ «ខ្ញុំសូមលើកទឹកចិត្តដល់ផលិតករភាពយន្តសូមប្រើប្រាស់ទេពកោសល្យ និងកាមេរ៉ារបស់លោកអ្នកផ្តិតរូបភាព បង្ហាញពិភពលោកនូវសម្រស់ដ៏ស្រស់ត្រកាលនៃតំបន់ព្រៃលិចទឹកមេគង្គឱ្យសាធារណជនយល់អំពីតម្លៃ និងសារៈសំខាន់របស់តំបន់ដ៏មានសក្តានុពលមួយនេះ ហើយសូមភ្ជាប់ផងដែរនូវសាច់រឿងអំពីការរស់នៅ និងសំឡេងរបស់ប្រជាសហគមន៍ដែលរស់ពឹងអាស្រ័យនឹងតំបន់មេគង្គនេះ»។
លោកបានថ្លែងដូច្នេះក្នុងកម្មវិធីជុំវិញទន្លេមេគង្គ «រុករក និងស្វែងយល់ពីបរិស្ថាន និងប្រជាជននៅក្នុងតំបន់មេគង្គ» ដែលជាផ្នែកមួយនៃមហោស្រពភាពយន្តអន្តរជាតិកម្ពុជាលើកទី ១១ ដែលបានប្រព្រឹត្តទៅនាថ្ងៃទី ១ ខែកក្កដា។
ដោយសហការជាមួយមជ្ឈមណ្ឌលបុប្ផាណា អង្គការ WWF បានគាំទ្រគម្រោងផ្សព្វផ្សាយសោតទស្សន៍តាមរយៈការផ្តល់ប្រឹក្សាជំនាញបច្ចេកទេសទាក់ទងនឹងការអភិរក្សនៅតំបន់ព្រៃលិចទឹកមេគង្គ និងសម្របសម្រួលដល់សកម្មភាពការងារផ្សេងៗទៀតដែលធ្វើឡើងនៅមូលដ្ឋាន។
WWF បានចូលរួមអបអរសាទរដល់ជោគជ័យក្នុងការផលិតបាននូវភាពយន្តឯកសារ ដែលចូលរួមចំណែកយ៉ាងសំខាន់ក្នុងការផ្សព្វផ្សាយរឿងរ៉ាវនានាស្តីពីទន្លេមេគង្គនៃប្រទេសកម្ពុជា។
WWF បញ្ជាក់ថា៖ «កិច្ចការនេះនឹងចូលរួមចំណែកផ្តល់ជាសំឡេងដល់សហគមន៍មូលដ្ឋានដែលរស់នៅក្នុងខេត្តក្រចេះ និងស្ទឹងត្រែង ក៏ដូចជាតំបន់ព្រំដែនជាមួយប្រទេសឡាវ ដើម្បីបញ្ជូនសារស្តីអំពីភាពចាំបាច់ក្នុងការអភិរក្សធនធានជលផលតាមដងទន្លេ និងប្រព័ន្ធជីវចម្រុះ ដែលជាធនធានទឹកសាបដ៏ធំសម្បូរបែបបំផុតមួយនៅលើពិភពលោក និងសារៈសំខាន់ក្នុងការលើកកម្ពស់ការអភិវឌ្ឍប្រកបដោយចីរភាព សម្រាប់ជាប្រយោជន៍ដល់មនុស្ស និងធម្មជាតិ»៕