ភ្នំពេញៈ អគ្គលេខាធិការគណៈវិស្វករកម្ពុជាជំរុញដល់និស្សិតផ្នែកវិស្វកម្ម និងស្ថាបត្យកម្មចូលរួមប្រកួតប្រជែងការរចនាប្លង់បញ្ចូលភាពងាយស្រួលជូនជនមានពិការភាព មុនពេលសាងសង់អគារ ឬសំណង់ផ្សេងៗ។
លោក សុខុម រិទ្ធីវុធ អគ្គលេខាធិការគណៈវិស្វករកម្ពុជាថ្លែងក្នុងសិក្ខាសាលាផ្សព្វផ្សាយមួយស្តីពី “បទដ្ឋានបច្ចេកទេស និងការប្រកួតប្រជែងការរចនាហេដ្ឋារចនាសម្ព័ន្ធរូបវន្តបង្កលក្ខណៈងាយស្រួល សម្រាប់ជនមានពិការភាព “នៅថ្ងៃទី ២ ខែកក្កដា នេះឱ្យដឹងថា ការរៀបចំសិក្ខាសាលានាពេលនេះ ដើម្បីឱ្យនិស្សិតផ្នែកវិស្វកម្ម និងស្ថាបត្យកម្មមានការចូលរួមបញ្ចេញសមត្ថភាព ស្នាដៃ និងការច្នៃប្រឌិតរបស់ក្មួយៗនៅតាមមហាវិទ្យាល័យ ដើម្បីចូលរួមប្រកួតប្រជែងការរចនាប្លង់ ដោយបញ្ចូលភាពងាយស្រួលជូនជនមានពិការភាពមុនពេលសាងសង់អគារ ឬសំណង់ផ្សេងៗនៅទីសាធារណៈ និងលក្ខខណ្ឌនៃការជ្រើសរើសចូលរួមការប្រកួតប្រជែង ដើម្បីសម្រេចបាននូវការគិតគូរ និងអំពីតម្រូវការចាំបាច់របស់ជនមានពិការភាព។
លោកថ្លែងថា៖ «ប្រទេសកម្ពុជាយើងបានឆ្លងកាត់សង្គ្រាមរ៉ាំរ៉ៃ និងរបបប្រល័យពូជសាសន៍ ដែលបានបន្សល់ទុកនូវផលវិបាកជាច្រើនដល់សង្គមជាតិក្នុងនោះជនពិការមានអត្រាខ្ពស់ដូចជា បន្សល់ពីសង្គ្រាមច្រើនទសវត្សរ៍, គ្រោះថ្នាក់ដោយសារគ្រាប់មីន និងគ្រាប់មិនទាន់ផ្ទុះ, គ្រោះថ្នាក់ចរាចរណ៍, គ្រោះថ្នាក់ការងារ កង្វះអាហារូបត្ថម្ភ ជំងឺដង្កាត់ និងពិការដោយសារមូលហេតុផ្សេងៗធ្វើឱ្យចំនួនជនពិការមានការកើនឡើង»។
បើតាម លោក សុខុម រិទ្ធីវុធ ជនពិការភាគច្រើនជាគ្រួសារក្រីក្រ និងងាយរងគ្រោះជាងគេក្នុងសង្គម ផ្អែកតាមរដ្ឋធម្មនុញ្ញរបស់កម្ពុជា, កម្មវិធីនយោបាយអភិវឌ្ឍន៍ជាតិ និងយុទ្ធសាស្ត្រចតុកោណរបស់រាជរដ្ឋាភិបាល ដែលបានបង្កើតឱ្យមានច្បាប់ស្ដីពីកិច្ចការពារ និងការលើកកម្ពស់សិទ្ធិជនពិការទទួលបានការឡាយព្រះហស្ថលេខាដោយព្រះមហាក្សត្យនៅថ្ងៃទី ០៣ ខែកក្កដា ឆ្នាំ ២០០៩ និងអនុសញ្ញាអន្តរជាតិ៕