ប៉ៃលិនៈ កម្លាំងផ្នែកនគរបាលយុត្តិធម៌នៃអធិការដ្ឋាននគរបាលក្រុងប៉ៃលិននាថ្ងៃទី ១ ខែកក្កដា បានបញ្ជូនជនត្រូវចោទចំនួន ២ នាក់ទៅកាន់ពន្ធនាគារខេត្តប៉ៃលិនពីបទរំលោភលើទំនុកចិត្តតាមដីកាបង្គាប់ឱ្យឃុំខ្លួនរបស់ចៅក្រមស៊ើបសួរនៃសាលាដំបូងខេត្តប៉ៃលិន។ នេះបើយោងតាមរបាយការណ៍អគ្គស្នងការដ្ឋាននគរបាលជាតិ។
របាយការណ៍បានឱ្យដឹងនាថ្ងៃទី ២ ខែកក្កដា ថាជនត្រូវចោទទាំង ២ នាក់នេះគឺជាជនជាតិខ្មែរ ភេទប្រុស និងមានមុខរបរមិនពិតប្រាកដដូចគ្នា ដោយមា្នក់អាយុ ១៧ ឆ្នាំរស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន តែម្នាក់ទៀតអាយុ ១៦ ឆ្នាំ រស់នៅភូមិចំការកាហ្វេ សង្កាត់ទួលល្វា ក្រុងប៉ៃលិន ខេត្តប៉ៃលិន។
របាយការណ៍បញ្ជាក់ថា៖ «ជនត្រូវចោទខាងលើបានពាក់ព័ន្ធករណីរំលោភលើទំនុកចិត្ត ប្រព្រឹត្តនៅភូមិសួនអំពៅកើត សង្កាត់ប៉ៃលិន ក្រុងប៉ៃលិន ខេត្តប៉ៃលិន កាលពីថ្ងៃទី ២៤ ខែមិថុនា ឆ្នាំ ២០២២»៕