.jpg)
ព្រែវែងៈ លោក ស ខេង អនុប្រធានគណបក្សប្រជាជនកម្ពុជាបានលើកទឹកចិត្តថ្នាក់ដឹកនាំ និងសមាជិក សមាជិការក្រុមការងារគណបក្សគ្រប់ថ្នាក់ ចូលរួមផ្ដល់យោបល់ទៅលើបទពិសោធទៅលើដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ ថ្មីៗនេះ ដើម្បីទទួលបានធាតុចូល ឬទស្សនាទានថ្មីៗ ដើម្បីត្រៀមរៀបចំការបោះឆ្នោតជ្រើសតាំងតំណាងរាស្ត្រនីតិកាលទី ៧ នាខែកក្កដា ឆ្នាំ ២០២៣ ខាងមុខនេះ។
លោក ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជាចុះមូលដ្ឋានខេត្តព្រៃវែង និងបាត់ដំបង ថ្លែងក្នុងកិច្ចប្រជុំបូកសរុបវាយតម្លៃ លទ្ធផលបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៥ ឆ្នាំ ២០២២ នៅទីស្នាក់ការគណបក្សប្រជាជនកម្ពុជាខេត្តព្រៃវែងនាថ្ងៃទី ២ កក្កដានេះឱ្យដឹងថា ការជួបជុំគ្នានៅពេលនេះ ក៏ជាឱកាសដែលថ្នាក់ដឹកនាំគ្រប់ថ្នាក់ និងសមាជិក សមាជិការ ចូលរួមយោបល់បន្ថែមទៀត ដើម្បីទទួលបានធាតុចូល ឬទស្សនាទានថ្មីៗ សម្រាប់បម្រើឱ្យកិច្ចការគណបក្សនាពេលខាងមុខ គឺការត្រៀមរៀបចំការបោះឆ្នោតជ្រើសតាំងតំណាងរាស្ត្រនីតិកាលទី ៧ នាខែកក្កដា ឆ្នាំ ២០២៣ខាងមុខនេះ ដើម្បីបន្តទទួលបានជោគជ័យនៅក្នុងការបោះឆ្នោតនេះជាបន្តទៀត។
លោកបន្តថា នៅក្នុងការបោះឆ្នោតឃុំ សង្កាត់កន្លងទៅថ្មីៗនេះ បានប្រព្រឹត្តទៅយ៉ាងល្អប្រសើរ ដូចការប្ដេជ្ញាចិត្តឱ្យការបោះឆ្នោតនេះទទួលបានជោគជ័យ ២ ក្នុងពេលតែមួយ គឺឈ្នះការបោះឆ្នោត និងធ្វើឱ្យការបោះឆ្នោតប្រព្រឹត្តទៅដោយរលូន។
លោកបន្តថា គណបក្សប្រជាជនកម្ពុជាបានទទួលសំឡេងឆ្នោតគាំទ្ររហូត ៥ លាន ៣ សែន ៧ ម៉ឺន ៨ ពាន់ ៧៧៣ សំឡេង ស្មើនឹង ៧៤,៣២ ភាគរយនៃសន្លឹកឆ្នោតបានការ និងបានកាន់កាប់អាសនៈក្រុមប្រឹក្សាឃុំ សង្កាត់ចំនួន ៩ ៣៧៦ អាសនៈ ស្មើនឹង ៨០,៦៧ ភាគរយនៃអាសនៈសរុប ព្រមទាំងទទួលបានមុខតំណែងមេឃុំ ចៅសង្កាត់ចំនួន ១៦៤៨ ស្មើនិង ៩៩,៥១ ភាគរយ។
បើតាម លោក ស ខេ គណបក្សប្រជាជនកម្ពុជាក៏បានសម្រេចជោគជ័យយ៉ាងត្រចះត្រចង់ធ្វើឱ្យបេក្ខជនគណបក្សប្រជាជនកម្ពុជាកាន់កាប់អាសនៈឃុំ សង្កាត់ ចំនួន ៦៨៤ អាសនៈ ស្មើនឹង ៧៦,៦៨ ភាគរយនៃអាសនៈសរុបនឹងទទួលបានមុខតំណែងជាមេឃុំ ចៅសង្កាត់គ្រប់ខេត្តក្នុងនោះមានឃុំ សង្កាត់ចំនួន ២ នៃខេត្តព្រៃវែង ដែលគណបក្សបានកាន់កាប់អាសនៈ ១០០ ភាគរយ។
លោក ស្បោង សារ៉ាត់ ប្រធានគណៈកម្មាធិការគណបក្សប្រជាជនកម្ពុជា ខេត្តព្រៃវែង ថ្លែងថា លទ្ធផលដែលគណបក្សប្រជាជនកម្ពុជាខេត្តព្រៃវែងសម្រេចបាន ពិសេសក្នុងដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី ៥ ឆ្នាំ ២០២២ កន្លងទៅថ្មីៗនេះ គណបក្សប្រជាជនកម្ពុជាទទួលបានសំឡេងឆ្នោតគាំទ្រយ៉ាងច្រើនលើសលប់ ឈ្នះបានមេឃុំ ចៅសង្កាត់ ទូទាំងខេត្តព្រៃវែង៕
