.jpg)
ភ្នំពេញៈ លោក ប្រាក់ សុខុន ប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ាអមដោយលោក ឯកផាប់ ផាន់ថាវង្ស អគ្គលេខាធិការរងអាស៊ានទទួលបន្ទុកសហគមន៍សង្គម-វប្បធម៌អាស៊ាន នាថ្ងៃទី ២ ខែកក្កដា បានជួបពិភាក្សាការងារជាមួយតំណាងគណបក្សនយោបាយចំនួន ៧ នៅមីយ៉ាន់ម៉ា។
ក្រសួងការបរទេសកម្ពុជាបានឱ្យក្រុមអ្នកសារព័ត៌មានដឹងតាមប្រព័ន្ធតេឡេក្រាម (Telegram) នាថ្ងៃទី ២ ខែកក្កដា ថា ភាគីទាំង ២ បានពិភាក្សា «យ៉ាងស៊ីជម្រៅ» លើបញ្ហាសំខាន់ជាច្រើនរួមទាំងស្ថានភាពនយោបាយ និងមនុស្សធម៌ជាក់ស្តែងនៅតាមរដ្ឋ និងតំបន់ដែលគណបក្សនយោបាយនីមួយៗមានសកម្មភាពនយោបាយ និងវឌ្ឍនភាពការងារ និងការចូលរួមចំណែករបស់គណបក្សនយោបាយទាំង ៧ នៅក្នុងកិច្ចព្រមព្រៀងបទឈប់បាញ់ថ្នាក់ជាតិ។
ភាគីទាំង ២ ក៏បានពិភាក្សាអំពីវិធីក្នុងការបន្ធូរបន្ថយស្ថានការណ៍នៅមីយ៉ាន់ម៉ា និងការជំរុញដំណើរការសន្តិភាព និងតួនាទីរបស់ប្រេសិតពិសេសក្នុងការរួមចំណែកក្នុងការដោះស្រាយវិបត្តិនៅមីយ៉ាន់ម៉ា ដោយផ្អែកលើកិច្ចព្រមព្រៀងជាឯកច្ឆន្ទ ៥ ចំណុច៕
