.jpg)
ទង់ជាតិកម្ពុជា និងអង្គការយូនីស្កូក្នុងខួបទី ៧១។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន អបអរសាទរខួប ៧១ ឆ្នាំ ដែលកម្ពុជាចូលជាសមាជិករបស់អង្គការយូណេស្កូ (UNESCO) ដោយលោករំឭកថា ប្រាសាទរបស់កម្ពុជាចំនួន ៣ ត្រូវបានដាក់បញ្ចូលជាសម្បត្តិបេតិកភណ្ឌពិភពលោក តាមរយៈមហាសន្និបាតអង្គការយូណេស្កូនេះ។
លោកបានបង្ហោះសារក្នុងហ្វេសប៊ុកនាថ្ងៃទី ៣ ខែកក្កដា ថា អង្គការយូណេស្កូគឺជាផ្នែកមួយរបស់អង្គការសហប្រជាជាតិដោយធ្វើការផ្តោតជាសំខាន់ទៅលើការអប់រំវិទ្យាសាស្ត្រ។ អង្គការនេះត្រូវបានបង្កើតឡើងនៅថ្ងៃទី ១៦ ខែវិច្ឆិកា ឆ្នាំ ១៩៤៥ និងធ្វើបេសកកម្មពិសេសក្នុងការរក្សានូវសន្តិភាពនិ ងសន្តិសុខនៅក្នុងពិភពលោក ដោយលើកកម្ពស់កិច្ចសហប្រតិបត្តិការក្នុងចំណោមប្រជាជាតិនានាតាមរយៈការអប់រំ វិទ្យាសាស្ត្រ វប្បធម៌ និងទំនាក់ទំនង។
លោក ហ៊ុន សែន សរសេរថា៖ «កម្ពុជាបានចូលជាសមាជិកអង្គការយូណេស្កូ (UNESCO) នៅថ្ងៃទី ៣ ខែកក្កដា ឆ្នាំ ១៩៥១។ ការិយាល័យអង្គការយូណេស្កូនៅរាជធានីភ្នំពេញត្រូវបានបើកឡើងវិញនៅឆ្នាំ ១៩៩១។ យូណេស្កូនៅកម្ពុជាធ្វើការងារនៅក្រោមក្របខ័ណ្ឌជំនួយអភិវឌ្ឍន៍របស់អង្គការសហប្រជាជាតិសម្រាប់កម្ពុជា (UNDAF) ឆ្នាំ ២០១៩-២០២៣ ដែលសំដៅលើកកម្ពស់ការអប់រំ បរិស្ថាន ទំនាក់ទំនង និងព័ត៌មានមរតកវប្បធម៌ សេរីភាពនៃការបញ្ចេញមតិ និងវិទ្យាសាស្ត្រធម្មជាតិ ដើម្បីជាមធ្យោបាយឆ្ពោះទៅសម្រេចបាននូវរបៀបវាៈនៃការអភិវឌ្ឍប្រកបដោយចីរភាពឆ្នាំ ២០៣០»។
លោកបានរៀបរាប់ថា បន្ទាប់ពីតំបន់អង្គរត្រូវបានដាក់បញ្ចូលទៅក្នុងបញ្ជីបេតិកភណ្ឌពិភពលោកនៅថ្ងៃទី ១៤ ខែធ្នូ ឆ្នាំ ១៩៩២ គណៈកម្មាធិការសម្របសម្រួលអន្តរជាតិមួយសម្រាប់ការអភិរក្ស និងការអភិវឌ្ឍតំបន់ប្រវត្តិសាស្ត្រអង្គរ (ICC-Angkor) ត្រូវបានបង្កើតឡើងនៅឆ្នាំ ១៩៩៣។ ការបង្កើត ICC-Angkor គឺកើតចេញពីលក្ខខណ្ឌកំណត់ដោយគណៈកម្មាធិការបេតិកភណ្ឌពិភពលោក ដើម្បីទទួលស្គាល់តំបន់អង្គរទៅក្នុងបញ្ជីសម្បត្តិបេតិកភណ្ឌពិភពលោករបស់អង្គការយូណេស្កូ។
លោក ហ៊ុន សែន រំឭកថា៖ «ប្រាសាទរបស់កម្ពុជាចំនួន ៣ ត្រូវបានដាក់បញ្ចូលជាសម្បត្តិបេតិកភណ្ឌពិភពលោក តាមរយៈមហាសន្និបាតអង្គការយូណេស្កូនេះរួមមានប្រាសាទអង្គរត្រូវបានដាក់ជាសម្បត្តិបេតិកភណ្ឌពិភពលោកនៅឆ្នាំ ១៩៩២ ប្រាសាទព្រះវិហារ នៅឆ្នាំ ២០០៨ និងតំបន់ប្រាសាទសម្បូរព្រៃគុកនៅឆ្នាំ ២០១៧»។
លោកក៏បានលើកឡើងផងដែរនូវសម្បត្តិវប្បធម៌អរូបិយរបស់កម្ពុជាចំនួន ៥ ដែលត្រូវបានដាក់បញ្ចូលក្នុងបញ្ជីបេតិកភណ្ឌយូណេស្កូផងដែរ រួមមាន ល្ខោនខោល ដាក់បញ្ចូលនៅឆ្នាំ ២០១៨ ចាប៉ីដងវែងនៅឆ្នាំ ២០១៦ ល្បែងទាញព្រ័ត្រនៅឆ្នាំ ២០១៥ របាំព្រះរាជទ្រព្យនៅឆ្នាំ ២០០៨ និងល្ខោនស្រមោលស្បែកធំនៅឆ្នាំ ២០០៨។
ជាមួយគ្នានេះគុនល្បុក្កតោក៏ត្រូវបានស្នើឱ្យយូណេស្កូពិចារណា ដើម្បីដាក់បញ្ចូលក្នុងបញ្ជីបេតិកភណ្ឌពិភពលោកអរូបិយផងដែរ។
យោងតាមគេហទំព័រយូណេស្កូប្រចាំកម្ពុជាបានឱ្យដឹងថា៖ «ការបើកការិយាល័យយូណេស្កូនៅរាជធានីភ្នំពេញឡើងវិញនៅឆ្នាំ ១៩៩១ បានរួមចំណែកដល់ការពង្រឹងកិច្ចសហប្រតិបត្តិការរវាងកម្ពុជា និងអង្គការយូណេស្កូ»៕
