.jpg)
បុគ្គលិកស៊ីម៉ាក់កំពុងដោះមីននៅខេត្តប៉ៃលិន នាពេលកន្លងមក។ រូបថត ស៊ីម៉ាក់
ភ្នំពេញៈ ក្រោយការអំពាវនាវរបស់លោកនាយករដ្ឋមន្ត្រី ហ៊ុន សែន សុំឱ្យសប្បុរសជនចូលរួមបំបាត់ចោលគ្រាប់មីន និងគ្រាប់មិនទាន់ផ្ទុះ ដើម្បីកម្ពុជាឈានទៅគ្មានគ្រាប់មីននៅឆ្នាំ ២០២៥ គិតត្រឹមថ្ងៃទី ៣ ខែកក្កដា សប្បុរសជននានា ចូលបរិច្ចាគថវិកា បានចំនួន ១៣ លាន ៥០ ម៉ឺនដុល្លារអាមេរិកហើយ។ នេះបើតាមអ្នកនាំពាក្យរាជរដ្ឋាភិបាលកម្ពុជា។
លោក ផៃ ស៊ីផាន អ្នកនាំពាក្យរាជរដ្ឋាភិបាលឱ្យដឹង នាថ្ងៃទី ៣ ខែកក្កដាថា តាមរយៈការអំពាវនាវរបស់លោកនាយករដ្ឋមន្ដ្រី ហ៊ុន សែន កាលពីថ្ងៃទី ១ កក្កដា ២០២២ ក្នុងពិធីលែងកូនត្រីនៅខេត្តបន្ទាយមានជ័យ គិតត្រឹមថ្ងៃទី ៣ កក្កដា សប្បុរសជនបានចូលបរិច្ចាគថវិកាបានចំនួន ១៣ លាន ៥០ ម៉ឺនដុល្លារអាមេរិកហើយក្នុងការចូលរួមបំបាត់ចោលគ្រាប់មីន និងគ្រាប់មិនទាន់ផ្ទុះ ដើម្បីកម្ពុជាឈានទៅគ្មានគ្រាប់មីននៅឆ្នាំ ២០២៥។
លោកនាយករដ្ឋមន្ដ្រី ហ៊ុន សែន សរសេរលើទំព័រហ្វេសប៊ុករបស់លោកថា កាលពីព្រឹកថ្ងៃទី ១ កក្កដា ២០២២ ក្នុងពិធីលែងកូនត្រីនៅខេត្តបន្ទាយមានជ័យ លោកបានអំពាវនាវឱ្យសប្បុរសជនចូលរួមបំបាត់ចោលគ្រាប់មីន និងគ្រាប់មិនទាន់ផ្ទុះ ដើម្បីកម្ពុជាឈានទៅគ្មានគ្រាប់មីននៅឆ្នាំ ២០២៥។ មួយទៀត ដើម្បីឈានទៅបញ្ចប់នូវសោកនាដកម្មលើប្រជាជនកម្ពុជា ដែលស្លាប់ និងរបួសដោយគ្រាប់មីន និងគ្រាប់មិនទាន់ផ្ទុះដែលជាឃាតករលាក់មុខដែលនៅសេសសល់លើទឹកដីកម្ពុជា។
លោកថ្លែងថា៖ «ឆ្លើយតបតាមការអំពាវនាវនេះ មកដល់ពេលនេះមានសប្បុរសជនដែលជាអ្នកវិនិយោគ អ្នកជំនួញបានចូលរួមប្រមាណជាង ៥ លានដុល្លាររួចមកហើយ [កាលពី ថ្ងៃទី ១ ខែកក្កដា ឆ្នាំ ២០២២] ដែលខ្ញុំសង្ឃឹមថានឹងមានការចូលរួមបន្ថែមទៀត ដើម្បីឱ្យទឹកដីដ៏កម្សត់មួយនេះរួចចាកផុតពីសោកនាដកម្មនៃគ្រាប់មីន»។
លោក ហ៊ុន សែន បញ្ជាក់ថា៖ «ដើម្បីសម្រួលដល់ការចូលរួម សូមធ្វើទំនាក់ទំនងទៅលោក សេង ទៀង រដ្ឋលេខាធិការទីស្តីការគណៈរដ្ឋមន្ត្រីតាមលេខទូរស័ព្ទ ០១២ ៩៦១ ៩៧១ ដែលនឹងប្រមូលថវិកានេះបញ្ចូលទៅគណនីរបស់អាជ្ញាធរមីនកម្ពុជា។ សូមអរគុណសម្រាប់ការចូលរួមដើម្បីភាពសុខសាន្ត និងស្នាមញញឹមរបស់ប្រជាជនកម្ពុជា»។
អ្នកជំនាញដោះមីននៅខេត្តប៉ៃលិន ពីខែកុម្ភៈ ឆ្នាំ ២០២១។ រូបថត CMAC
លោកនាយករដ្ឋមន្ដ្រីក៏បានប្រាប់ឱ្យលោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ ពិចារណាដាក់ចូលទៅក្នុងថវិកាជាតិ សម្រាប់ឆ្នាំ ២០២៣-២០២៤ ខាងមុខជាដំណាក់ៗក្នុងការបំបាត់ចោលគ្រាប់មីន និងគ្រាប់មិនទាន់ផ្ទុះ ដើម្បីបង្ហើយនូវការដោះមីន ហើយបញ្ចប់ខេត្ត ស្រុក ឬឃុំ ប្រកាសថា គ្មានមីនតែម្ដង។
លោកថ្លែងថា៖ «ឥឡូវដូចជានៅខេត្ដកែប យើងប្រកាសថា ជាខេត្ដគ្មានមីនទៅហើយ។ កន្លែងខ្លះទៀតយើងត្រូវការលុយត្រឹមតែ ៥ ម៉ឺនដុល្លារទេ យើងទៅរកសុំបរទេស វាពិបាកណាស់។ ឥឡូវដាក់ចូលក្នុងថវិកាជាតិ ដើម្បីបញ្ចប់នៅទីកន្លែងមួយចំនួនដែលវាជិតអស់ហើយ ប៉ុន្ដែវាខ្វះលុយដោះ»។
ស្ថានទូតឥណ្ឌាប្រចាំនៅកម្ពុជានាព្រឹកថ្ងៃទី ៣ កក្កដា ឆ្នាំ ២០២២ បានបង្ហោះសារនៅលើគេហទំព័រធ្វីធើរ (Twitter) អបអរសាទរ និងថ្លែងអំណរគុណដល់លោកនាយករដ្ឋមន្ដ្រី ហ៊ុន សែន ដែលបានកៀរគរមូលនិធិ ដើម្បីបោសសម្អាតមីន និងគ្រាប់មិនទាន់ផ្ទុះផ្សេងទៀតនៅកម្ពុជា។ ស្ថានទូតឥណ្ឌាបានប្រកាសឈរជាមួយកម្ពុជា ក្នុងការងារមនុស្សធម៌ ដើម្បីបញ្ហាមីននៅកម្ពុជា។
កម្មវិធីអភិវឌ្ឍន៍សហប្រជាជាតិ (UNDP) កាលពីថ្ងៃទី ២ កក្កដា បានចេញសេចក្តីថ្លែងការណ៍ចូលរួមអបអរសាទរដល់រាជរដ្ឋាភិបាលកម្ពុជា ដែលបានកៀរគរមូលនិធិសំខាន់ៗពីវិស័យឯកជន និងកាកបាទក្រហមកម្ពុជា ដើម្បីគាំទ្រដល់ការបោសសម្អាតមីននៅកម្ពុជាផងដែរ។
UNDP លើកឡើងថា សកម្មភាព កម្ចាត់មីន មិនត្រឹមតែជាការបោសសម្អាតគ្រាប់មីនឱ្យអស់ពីផ្ទៃដី ដែលមានគ្រាប់មីននោះទេ សកម្មភាពកម្ចាត់មីនផ្តោតការយកចិត្តទុកដាក់ដល់ប្រជាជន និងសង្គម រួមទាំងលទ្ធភាពនានាសម្រាប់ការរស់នៅប្រកបដោយសេចក្តីថ្លៃថ្នូរ និងភាពរុងរឿង។
បើតាម UNDP បច្ចុប្បន្នប្រជាជនជិត ១ លាននាក់នៅទូទាំងព្រះរាជាណាចក្រកម្ពុជាកំពុងប្រឈមនឹងហានិភ័យ ខណៈពួកគេរស់នៅប្រកបរបរ និងធ្វើការងារក្នុងតំបន់ដែលមានគ្រាប់មីន និងសំណល់ជាតិផ្ទុះពីសង្គ្រាម ដែលនៅតែបន្តបង្កឱ្យមនុស្សស្លាប់ ធ្វើឱ្យរងរបួស និងធ្វើឱ្យសហគមន៍មានការភ័យខ្លាច។ ទាំងនេះបានរារាំងដល់ការស្តារឡើងវិញ និងការអភិវឌ្ឍ និងរំខានដល់ជីវភាពរស់នៅរបស់ប្រជាជននៅតំបន់ជនបទ។
UNDP ប្រកាសត្រៀមខ្លួនបន្តជួយគាំទ្រដល់រាជរដ្ឋាភិបាលកម្ពុជា និងអាជ្ញាធរកម្ពុជាគ្រប់គ្រងសកម្មភាពកម្ចាត់មីន និងសង្គ្រោះជនពិការដោយសារមីន។ UNDP ទន្ទឹងរង់ចាំមើលលទ្ធផលនៃសមិទ្ធផលដ៏អស្ចារ្យនេះ ហើយសង្ឃឹមថា ការងារដ៏ប្រពៃនេះនឹងយកទៅចែករំលែក ពេលប្រារព្ធខួប ៣០ ឆ្នាំនៃសកម្មភាពកម្ចាត់មីននៅកម្ពុជា និងក្នុងព្រឹត្តិការណ៍ថ្នាក់តំបន់ និងថ្នាក់សកលនានាដែលគ្រោងធ្វើក្នុងឆ្នាំនេះទាក់ទងនឹងសកម្មភាពកម្ចាត់មីន។
«UNDP សូមជំរុញឱ្យមានការបន្តចូលរួមចំណែកពីដៃគូអភិវឌ្ឍន៍នានា និងវិស័យឯកជន ដែលជាតួអង្គដ៏សំខាន់ក្នុងការអភិវឌ្ឍជាតិ ដើម្បីសម្រេចបានគោលដៅកម្ពុជាគ្មានគ្រាប់មីនត្រឹមឆ្នាំ ២០២៥ របៀបវារៈឆ្នាំ ២០៣០ និងការមិនទុកនរណាម្នាក់ចោលនោះទេ»។ នេះបើយោងតាមសេចក្ដីថ្លែងការណ៍របស់UNDP៕
