ភ្នំពេញៈ រាជរដ្ឋាភិបាលទទួលវ៉ាក់សាំងកូវីដ ១៩ ប្រភេទ Pfizer ចំនួនជាង ១៤ ម៉ឺនដូសរបស់រដ្ឋាភិបាលប៉ូឡូញ ដែលបានដឹកមកដល់ព្រលានយន្តហោះអន្តរជាតិភ្នំពេញកាលពីម្សិលមិញ សម្រាប់ចាក់ជូនកុមារដែលមានអាយុចាប់ពី ៥ ឆ្នាំដល់អាយុ ១២ ឆ្នាំ។
រដ្ឋលេខាធិការក្រសួងសុខាភិបាល លោកស្រី យក់ សម្បត្តិ បានថ្លែងឱ្យដឹងក្នុងពេលចុះទទួល និងពិនិត្យមើលវ៉ាក់សាំងកូវីដ ១៩ នៅព្រលានយន្តហោះអន្តរជាតិភ្នំពេញថា វ៉ាក់សាំងកូវីដ ១៩ ដែលបានដឹកមកដល់នេះជាជំនួយទ្វេភាគីលើកទី ២ របស់រដ្ឋាភិបាល និងប្រជាជនប៉ូឡូញ ដើម្បីបង្ហាញនូវចំណងមិត្តភាពរវាងប្រទេសប៉ូឡូញ និងរាជរដ្ឋាភិបាលកម្ពុជា ហើយនិងមានប្រទេសមួយចំនួនក្នុងសហភាពអឺរ៉ុប និងក្នុងពិភពលោកបានរាប់អានកម្ពុជាដោយបានផ្តល់នូវវ៉ាក់សាំងមកជាច្រើនផងដែរ។
លោកស្រីថ្លែងថា មកដល់ពេលនេះ កម្ពុជាមានវ៉ាក់សាំងទាំងការបញ្ជាទិញ និងទាំងជំនួយ ៧៤ លានដូសជាង ដែលក្នុងនោះការបញ្ជាទិញមានជាង ២៨ លានដូស ឯជំនួយឥតសំណងទាំងតាមយន្តការកូវ៉ាក់ និងប្រទេសចិនមានជាង ៤០ លានដូស ដែលក្នុងនោះកន្លងមក វ៉ាក់សាំងដែលបានមកដល់មានប្រមាណជា ៥៣ លានដូសហើយ។
លោកស្រី យក់ សម្បត្តិ បញ្ជាក់ថា បច្ចុប្បន្ន វ៉ាក់សាំងកូវីដ ១៩ នៅក្នុងឃ្លាំងមានជិត ៩ លានដូស ហើយការចាក់វ៉ាក់សាំងនៅតែជាអាទិភាពទី ១ សម្រាប់ការពារនូវសុខភាពរបស់ប្រជាពលរដ្ឋ ការពារមិនឱ្យធ្លាក់ខ្លួនឈឺ និងវិវឌ្ឍទៅរកការស្លាប់។
លោកស្រី យក់ សម្បត្តិ បានថ្លែងថា៖ «មិនត្រូវមើលស្រាល ឬប្រហែសបាននោះទេ ដោយសារការឆ្លងលឿន ដែលអាចធ្វើឱ្យមានការធ្លាក់ទៅក្នុងរលកថ្មីមួយទៀតដែលយើងមើលមិនឃើញ ប្រសិនបើប្រជាពលរដ្ឋមានការធ្វេសប្រហែស ប៉ុន្តែខ្ញុំជឿជាក់លើប្រជាពលរដ្ឋដែលភាគច្រើននៅតែបន្តការការពារខ្លួនតាមវិធានសុខាភិបាលជាប្រចាំ»។
យោងតាមរបាយការណ៍របស់ក្រសួងសុខាភិបាលបានឱ្យដឹងទៀតថា គិតត្រឹមថ្ងៃទី ២ ខែកក្កដា អត្រានៃការចាក់វ៉ាក់សាំងធៀបនឹងមនុស្សចំនួន ១៦ លាននាក់ នៅទូទាំងប្រទេសចាក់បានវ៉ាក់សាំងសរុបចំនួន ៩៤, ៣១% ខណៈអត្រាអ្នកចាក់ដូស ទី ៣ មានចំនួនជាង ៩ លាននាក់ ដូសទី ៤ ជិត ៣ លាននាក់ និងដូសទី ៥ មានចំនួនជាង ៣១ ម៉ឺននាក់។
ទាក់ទងនឹងបញ្ហាកូវីដ ១៩ លោកនាយករដ្ឋមន្ត្រី ហ៊ុន សែន នៅក្នុងពិធីអបអរសាទរទិវាមច្ឆជាតិ ០១ កក្កដា ឆ្នាំ ២០២២ បានថ្លែងពីស្រុកភ្នំស្រុក ខេត្តបន្ទាយមានជ័យ ដោយលោកក៏បានរំឭកផងដែរពីការចាប់ផ្តើមឡើងវិញនូវការឆ្លងមេរោគកូវីដ ១៩ បើទោះបីជាចំនួនមិនមានច្រើនក៏ដោយ ប៉ុន្តែលោកបានអំពាវនាវឱ្យបន្តការការពារខ្លួនទៀត។
លោកនាយករដ្ឋមន្ត្រីថ្លែងថា៖ «យើងចាំបាច់ត្រូវតែបន្តនូវការប្រុងប្រយ័ត្ន ដើម្បីចៀសវាងនូវការឆ្លង ព្រោះយើងមិនទាន់ចប់ទេនូវបញ្ហាទាក់ទិននឹងកូវីដ ១៩ នេះ យើងគ្រាន់តែបានទប់ស្កាត់វាមិនឱ្យធ្លាក់ក្នុងជ្រោះមរណៈប៉ុណ្ណោះ»។
ជាមួយគ្នានេះដែរ ប្រមុខរាជរដ្ឋាភិបាលក៏បានប្រកាសកុំឱ្យប្រជាពលរដ្ឋមានការស្លន់ស្លោទៅនឹងព័ត៌មានបំពុលទាក់ទងនឹងករណីកូវីដ ១៩ ដោយលោកបានធ្វើការព្រមាន និងបានដាក់បទបញ្ជាឱ្យសមត្ថកិច្ចចាប់ខ្លួនដល់អ្នកទាំងឡាយណាដែលធ្វើការបំពុលព័ត៌មានទាក់ទងនឹងករណីកូវីដ ១៩។
លោកនាយករដ្ឋមន្ត្រីបានបញ្ជាក់ថា មនុស្សម្នាក់ឈ្មោះហៅ អ៊ូខុង ត្រូវបានចាប់ខ្លួន បន្ទាប់ពីបានបង្ហោះព័ត៌មានមិនពិតថាមានមនុស្សស្លាប់នៅខេត្តកោះកុង ដោយសារតែជំងឺកូវីដ ១៩។
លោកថ្លែងថា៖ «សុំកុំជឿលើការបំពុលទាក់ទងនឹងការចាក់វ៉ាក់សាំង ហើយយើងក៏បានចាប់ខ្លួនបានហើយ (អ្នក) ដែលបានបំពុលតាមប្រព័ន្ធ Tik-Tok ដោយយករូបភាពមនុស្សស្លាប់នៅកោះកុងថាមានស្លាប់ ដោយសារចាក់វ៉ាក់សាំង»។
លោកនាយករដ្ឋមន្ត្រីថ្លែងថា៖ «វាជារឿងមិនមែនជាការលេងសើចទេ។ ខេត្តកោះកុងមិនមានអ្នកស្លាប់ ដោយសារកូវីដតាំងពីខែមេសា។ ខ្ញុំសុំព្រមានទុកជាមុន អ្នកណាក៏ដោយ ដែលយករឿងកូវីដ ១៩ ជាការលេងសើចនឹងត្រូវចាប់ខ្លួន ដោយសារវាមិនមែនជារឿងលេងសើចទេ។ វាជាការបំពុលសង្គម»។
នៅរសៀលថ្ងៃទី ០១ ខែកក្កដា លោក សេង ហៀង ព្រះរាជអាជ្ញារងនៃសាលាដំបូងរាជធានីភ្នំពេញបានសម្រេចចោទប្រកាន់ ហៅ អ៊ូខុង ដែលជាអ្នកលេង Tik- Tok ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ជននេះត្រូវបានសមត្ថកិច្ចឃាត់ខ្លួននៅខេត្តត្បូងឃ្មុំកាលពីយប់ថ្ងៃទី ៣០ ខែមិថុនា តាមបណ្តឹងព្រះរាជអាជ្ញាអមសាលាដំបូងរាជធានីភ្នំពេញ។
យោងតាមក្រមព្រហ្មទណ្ឌមាត្រា ៤៩៥ បានឱ្យដឹងថា អំពើញុះញង់ដោយផ្ទាល់ឱ្យប្រព្រឹត្តបទឧក្រិដ្ឋ ឬប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គមប្រឈមនឹងការផ្តន្ទាទោសដាក់ពន្ធនាគារពី ៦ ខែ ទៅ ២ ឆ្នាំ និងពិន័យជាប្រាក់ពី ១ លានរៀល ទៅ ៤ លានរៀល ប្រសិនបើការញុះញង់នេះគ្មានប្រសិទ្ធភាពទេ។
ទន្ទឹមនឹងនេះដែរ លោកនាយករដ្ឋមន្ត្រីក៏បានបញ្ជាក់ឱ្យដឹងដែរថា លោកអាចនឹងដាក់ឱ្យអនុវត្តនូវកាតព្វកិច្ចពាក់ម៉ាស់ជាថ្មីឡើងវិញ ប្រសិនបើករណីនៃការរីករាលដាលមេរោគកូវីដ ១៩ កើតមានឡើងក្នុងទ្រង់ទ្រាយធំ។
លោកថ្លែងថា៖ «ពិតមែនហើយកាតព្វកិច្ចពាក់ម៉ាស់ត្រូវបានលើកលែង ប៉ុន្តែរដ្ឋាភិបាលអាចនឹងដាក់ឱ្យអនុវត្តឡើងវិញនូវកាតព្វកិច្ចពាក់ម៉ាស់ក្នុងករណីរកឃើញថា មានការរីករាលដាលទ្រង់ទ្រាយធំក្នុងប្រទេសរបស់យើង ប៉ុន្តែបើការឆ្លងស្ថិតក្នុងកម្រិតប៉ុណ្ណេះគឺមិនជាបញ្ហាធំពេកទេ ដោយសារចំនួនឆ្លងនៅមានតិចណាស់»។
បើតាមលោកនាយករដ្ឋមន្ត្រី ហ៊ុន សែន មកដល់ពេលនេះមិនមានអ្នកជំងឺកូវីដ ១៩ សម្រាកព្យាបាលនៅក្នុងមន្ទីរពេទ្យឡើយទាំងក្នុងរាជធានីភ្នំពេញ និងបណ្តាខេត្តផ្សេងៗ ដោយសារតែអ្នកជំងឺដែលរកឃើញថាមានឆ្លងថ្មីអស់នេះមានអាការៈធូរស្រាល និងបានស្នើសុំសម្រាកព្យាបាលនៅឯគេហដ្ឋានផងដែរ។
យោងតាមរបាយការណ៍របស់ក្រសួងសុខាភិបាលចាប់ពីថ្ងៃទី ២៨ មិថុនាដល់ថ្ងៃទី ២ កក្កដា មនុស្សចំនួន ៣៤ នាក់បានរកឃើញឆ្លងមេរោគកូវីដ ១៩ តាមរយៈការធ្វើតេស្តម៉ាស៊ីនធំ (PCR) ដែលភាគច្រើនជាករណីឆ្លងក្នុងសហគមន៍។
គិតត្រឹមព្រឹក ថ្ងៃទី ៣ ខែកក្កដា ឆ្នាំ ២០២២ កម្ពុជាមានអត្រាឆ្លងមេរោគកូវីដ-១៩សរុបចំនួន ១៣៦ ២៩៦ នាក់អ្នកជាសះស្បើយសរុបចំនួន ១៣៣ ២០៦ នាក់ និងអ្នកស្លាប់ចំនួន ៣ ០៥៦ នាក់៕