ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានប្រកាសថា អតីតបុគ្គលិកក្រុមហ៊ុនណាហ្គាវើលដ៍ដែលមិនទាន់ទទួលយកសំណងនៅសល់ត្រឹមតែ ១៦៨ នាក់ប៉ុណ្ណោះ បន្ទាប់ពីមានបុគ្គលិកចំនួន ៤ នាក់បន្ថែមទៀតដែលត្រូវបានបញ្ឈប់ពីការងារក្នុងចំណោមជិត ៤០០ នាក់ បានមកទទួលប្រាក់បញ្ចប់កិច្ចសន្យា។
សេចក្តីប្រកាសព័ត៌មានរបស់ការិយាល័យអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈឱ្យដឹងថា នៅថ្ងៃទី ២ ខែកក្កដា ឆ្នាំនេះ អតីតបុគ្គលិកចំនួន ៤ រូបបន្ថែមទៀត ក្នុងចំណោមអតីតបុគ្គលិកដែលបានស្នើសុំអន្តរាគមន៍បានមកទទួលយកដំណោះស្រាយ តាមរយៈការធ្វើលិខិតព្រមព្រៀងទទួលយកប្រាក់បំណាច់បញ្ចប់កិច្ចសន្យាការងារពីក្រុមហ៊ុនរួចហើយ។
សេចក្តីប្រកាសឱ្យដឹងថា «ដូចនេះគិតមកដល់ថ្ងៃនេះមានអតីតបុគ្គលិកសរុបចំនួន ២០៥ រូបក្នុងចំណោម ៣៧៣ រូប ដែលបានទទួលយកនូវប្រាក់បំណាច់បញ្ចប់កិច្ចសន្យាការងារដែលធ្វើឱ្យចំនួនអតីតបុគ្គលិកដែលមិនព្រមទទួលយកសំណងនៅសល់ត្រឹម ១៦៨ រូប»។
ប្រភពដដែលបន្តថា ទីភ្នាក់ងារជាតិមុខរបរ និងការងារ (NEA) នៃក្រសួងការងារនឹងត្រៀមខ្លួន ដើម្បីជួយសម្របសម្រួលពាក់ព័ន្ធនឹងការជួយស្វែងរកឱកាសការងារថ្មី សម្រាប់បងប្អូនអតីតបុគ្គលិកផងដែរ។
បើតាមក្រសួងការងារកន្លងមក មានបងប្អូនអតីតបុគ្គលិកក្រុមហ៊ុនណាហ្គាវើលដ៍មួយចំនួនបានស្នើសុំឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង ជួយអន្តរាគមន៍ឱ្យក្រុមហ៊ុនផ្តល់ប្រាក់បំណាច់បញ្ចប់កិច្ចសន្យាការងារស្របតាមច្បាប់ស្តីពីការងារចំពោះបងប្អូនដែលត្រូវបានបញ្ឈប់ពីការងារ និងស្វែងរកឱកាសការងារថ្មី។
ក្រសួងបន្តថា ដោយអនុវត្តតាមគោលការណ៍ណែនាំរបស់រដ្ឋមន្ត្រីក្រសួងមហាផ្ទៃ មន្ត្រីជំនាញក្រសួងការងារបានពិនិត្យផ្ទៀងផ្ទាត់ការទូទាត់ប្រាក់បំណាច់ជាមួយតំណាងក្រុមហ៊ុនហើយពិនិត្យឃើញថា ការទូទាត់ចំនួន ៤ ចំណុចគឺបានត្រឹមត្រូវស្របតាមច្បាប់ និងលិខិតបទដ្ឋានគតិយុត្តពាក់ព័ន្ធនឹងការបញ្ឈប់ពីការងាររួម។
លោក ទេស រុក្ខាផល អគ្គលេខាធិការនៃអគ្គលេខាធិការដ្ឋាននៃគណៈកម្មការសម្រាប់ដោះស្រាយកូដកម្ម បាតុកម្មនៅតាមគ្រប់មុខសញ្ញានៃក្រសួងការងារ (គ.ក.ប) បានថ្លែងថាក្រសួងការងារ ស្វាគមន៍អតីតបុគ្គលិកដែលនៅសល់មកស្តាប់រូបមន្តនៃការគណនា និងការពន្យល់បន្ថែម ខណៈក្រុមហ៊ុនណាហ្គាវើលដ៍នៅបើកចំហចំពោះការទទួលប្រាក់បំណាច់។
លោកថា៖ «កន្លងមកភាគច្រើនដែលនៅសេសសល់មិនទាន់ទទួលយកកញ្ចប់ថវិកានោះ ដោយសារគាត់មិនចង់ស្តាប់ការពន្យល់ និងជឿតាមគេថាទូទាត់មិនត្រូវ ប៉ុន្តែដល់ពេលគាត់ស្តាប់យើងពន្យល់ គាត់ពិចារណា ហើយក៏ព្រមទទួលយកដោយគ្មានការបង្ខិតបង្ខំ»។
លោក ទេស រុក្ខាផល ឱ្យដឹងទៀតថា ការទូទាត់ប្រាក់បំណាច់គឺអាស្រ័យលើកិច្ចសន្យាការងារដោយអ្នកខ្លះក៏ទទួលបានប្រាក់ខ្ទង់ម៉ឺនដុល្លារឯណោះ។
សូមជម្រាបថា កិច្ចប្រជុំរកដំណោះស្រាយវិវាទការងាររួមនៅក្រុមហ៊ុនណាហ្គាវើលដ៍លើកទី១៤ រៀបចំដោយក្រសួងការងារពីថ្ងៃទី ២២ ខែមិថុនា ឆ្នាំនេះ នៅតែមិនទាន់ទទួលលទ្ធផល ខណៈភាគីសហជីព និងអតីតបុគ្គលិកស្នើឱ្យក្រុមហ៊ុនទទួលយកពួកគេឱ្យចូលធ្វើការវិញ ខណៈក្រុមហ៊ុនថា ចំនួនបុគ្គលិកលើសពីតម្រូវការ៕