.jpg)
ទិដ្ឋភាពនៅចំណុចបឹងធំ ក្នុងក្រុងកំពង់ឆ្នាំង ដែលត្រូវសាងសង់ស្ថានីយប្រព្រឹត្តិកម្មទឹកកខ្វក់ទំនើប។ រូបថត ហ្វេសប៊ុក
កំពង់ឆ្នាំង ស្ថានីយប្រព្រឹត្តិកម្មទឹកកខ្វក់ទំនើបដំបូងបំផុតនៅក្នុងខេត្តកំពង់ឆ្នាំង ដែលមានតម្លៃជាង ២០ លានដុល្លា គ្រោងនឹងសាងសង់នៅអំឡុងខែកញ្ញា ខាងមុខ ខណៈរដ្ឋាភិបាលកំណត់យកផ្ទៃបឹងធំដែលមានផ្ទៃទឹកធំល្វឹងល្វើយសម្រាប់សាងសង់ស្ថានីយនេះ។
កាលពីថ្ងៃទី ៤ ខែ កក្កដា ឆ្នាំ ២០២២ តំណាងក្រសួងសាធារណការ និងដឹកជញ្ជូន ក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន អាជ្ញាធរខេត្តពាក់ព័ន្ធ និងក្រុមការងារបច្ចេកទេសគម្រោង បានបើកកិច្ចប្រជុំស្ដីពីវឌ្ឍនភាពការងារសាងសង់ និងការគ្រប់គ្រងទីលានទុកដាក់សំរាមក្រុងកំពង់ឆ្នាំង និងគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប។
ក្នុងកិច្ចប្រជុំនោះ បានពិភាក្សាជុំវិញគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាប ក្រោមកម្ចីឥណទានសម្បទានរបស់ធនាគារអភិវឌ្ឍន៍អាស៊ី អនុវត្តនៅក្រុងកំពង់ឆ្នាំង ផ្ដោតលើអនុគម្រោងចំនួន ២ គឺគម្រោងសាងសង់ទីលានទុកដាក់សំរាម ដែលបានបញ្ចប់ការសាងសង់ និងគម្រោងសាងសង់ប្រព័ន្ធលូនិងស្ថានីយប្រព្រឹត្តិកម្មទឹកកខ្វក់។
លោក ស៊ុន សុវណ្ណារិទ្ធ អភិបាលខេត្តកំពង់ឆ្នាំងបានប្រាប់ភ្នំពេញនៅថ្ងៃទី ៥ កក្កដាថា គម្រោងសាងសង់ស្ថានីយប្រព្រឹត្តិកម្មទឹកកខ្វក់ គឺគ្រោងនឹងចំណាយថវិកាជាង ២០ លានដុល្លារ ដែលទទួលបានកម្ចីឥណទានសម្បទានរបស់ធនាគារអភិវឌ្ឍន៍អាស៊ី។ លោកបន្តថា គម្រោងនេះ គ្រោងនឹងអនុវត្តការសាងសង់នៅខែកញ្ញា ហើយគ្រោងនឹងបញ្ចប់ ក្នុងរយៈពេល ២ ឆ្នាំបន្ទាប់។
លោកបានបញ្ជាក់ថា៖ «អាងនេះ យើងនឹងធ្វើនៅចំណុចបឹងធំ ស្ថិតក្នុងក្រុងកំពង់ឆ្នាំង ខេត្តកំពង់ឆ្នាំង ដែលគម្រោងនេះ យើងនឹងធ្វើក្នុងរង្វង់ ២ ឆ្នាំ ដោយរៀបចំប្រព័ន្ធទៅតាមស្តងដារបស់ ADB។ ស្ថានីយប្រព្រឹត្តិកម្មទឹកកខ្វក់នេះ គឺធ្វើឡើងនៅក្រោមដីទាំងអស់ ហើយខាងលើយើងធ្វើសួនច្បារនិងអគាររដ្ឋបាលសាធារណៈដែលអាងនេះនឹងមានប្រព័ន្ធសម្លាប់មេរោគ មុននឹងបញ្ចេញទឹកបន្តទៅទន្លេ»។
បឹងធំ គឺជាបឹងមួយដែលមានផ្ទៃទឹកធំល្វឹងល្វើយនៅខែវស្សា ដោយលាតសន្ធឹងពីចំណុចទំនប់បារាំងស្ថិតក្នុងភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង រហូតទៅដល់ទួលអម្ពិល ស្ថិតក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ចំណែកឯម្ខាងបឹងជាប់ដងទន្លេវិញ គឺជាប់នឹងភូមិកំពង់អុស ឃុំពាមឆ្កោក ស្រុកជលគិរី ។
ចំពោះបច្ចេកទេស និងក្រុមការងារក្នុងការសាសង់ស្ថានីយប្រព្រឹត្តិកម្មទឹកកខ្វក់នេះ លោក ស៊ុន សុវណ្ណារិទ្ធ បានអះអាងដែរថា ធនាគារ ADB និងក្រសួងសាធារណការ បានដាក់ដេញថ្លៃសម្រាប់ធ្វើការសាងសង់ស្ថានីយនេះរួចរាល់អស់ហើយ ដោយរង់ចាំតែពេលវេលាកំណត់នៃការសាងសង់តែប៉ុណ្ណោះ។
លោក ស៊ុន សុវណ្ណារិទ្ធ បានអះអាងទៀតថា នៅពេលស្ថានីយប្រព្រឹត្តិកម្មទឹកកខ្វក់នេះសាងសង់រួចរាល់ វានឹងចូលរួមទប់ស្កាត់ការបង្ហូរទឹកកខ្វក់ចូលទន្លេ ហើយស្ថានីយនេះក៏ជួយរំដោះបញ្ហាទឹកលិចផ្ទះប្រជាពលរដ្ឋដែលប្រឈមក្នុងពេលបច្ចុប្បន្នផងដែរ។
លោកបានបញ្ជាក់ថា៖ «នេះគឺជាស្ថានីយប្រព្រឹត្តិកម្មទឹកកខ្វក់ទំនើបដំបូងបំផុតនៅក្នុងខេត្តកំពង់ឆ្នាំង ដោយមានភ្ជាប់ប្រព័ន្ធលូពីបណ្តាផ្ទះពលរដ្ឋនៅក្នុងខេត្តប្រមាណ ៤០ គីឡូម៉ែត្រ ដែលយើងមិនដែលមានពីមុនមកទេ។ ប្រព័ន្ធលូនេះ គឺភ្ជាប់ពីផ្ទះប្រជាពលរដ្ឋដើម្បីចៀសវាងហូរចូលដោយផ្ទាល់ចូលទន្លេ»។
លោក សួស ចំ ជាពលរដ្ឋរស់នៅក្នុងសង្កាត់ និងក្រុងកំពង់ឆ្នាំង បានប្រាប់ ភ្នំពេញ ប៉ុស្តិ៍ ដោយបង្ហាញក្តីសប្បាយរីករាយ ដែលរដ្ឋបាលខេត្តនិងរដ្ឋាភិបាលគិតគូរពីការសាងសង់ស្ថានីយប្រព្រឹត្តិកម្មទឹកកខ្វក់នេះ។ លោករំពឹងថា នៅពេលស្ថានីយប្រព្រឹត្តិកម្មទឹកកខ្វក់និងប្រព័ន្ធលូថ្មីនេះបានសាងសង់រួចរាល់បញ្ហាដែលពលរដ្ឋបានជួបប្រទះដូចជាការលិចលង់នឹងត្រូវបានបញ្ឈប់។ បន្ថែមពីនេះចំពោះបញ្ហាដែលធ្វើឲ្យប៉ះពាល់ដល់បរិស្ថាននៅក្នុងទន្លេក៏ត្រូវបានកាត់បន្ថយផងដែរ។
លោកបានបញ្ជាក់ថា៖ «បានធ្វើអ៊ីចឹង ខ្ញុំអរណាស់ ព្រោះនៅក្នុងទីរួមខេត្តយើងហ្នឹង ទឹកហូរស្ទះលូពេញហ្នឹង ហើយបានគេធ្វើបែបនេះ គឺល្អណាស់។ បញ្ហាទឹកលិចនេះ គឺយើងបានជួបប្រទះ ២ ទៅ ៣ ឆ្នាំហើយ ព្រោះតែប្រព័ន្ធលូមួយចំនួនតូច ដល់អ៊ីចឹងទៅក៏ធ្វើឲ្យលិច»៕
