.jpg)
សមាជិកក្រុមប្រឹក្សាសង្កាត់ចោមចៅទី១ ក្នុងពិធីប្រកាសសុពលភាព នៅថ្ងៃទី ៥ ខែមិថុនា។ រូបថត សហការី
ភ្នំពេញៈ សមាជិកក្រុមប្រឹក្សាឃុំ សង្កាត់អាណត្តិទី៥ មកពីគណបក្សនានា ដែលទើបជាប់ឆ្នោតកាលពីថ្ងៃទី ៥ ខែ មិថុនា ឆ្នាំ ២០២២ និងទើបតែត្រូវបានប្រកាស ឱ្យចូលកាន់តំណែងជាផ្លូវការ បានប្តេជ្ញាចិត្តក្នុងការបម្រើសេវាសាធារណៈ ជូនប្រជាពលរដ្ឋឱ្យបានអស់ពីចិត្ត និងអភិវឌ្ឍភូមិឃុំ សង្កាត់ ឱ្យកាន់តែមានការរីកចម្រើន។
លោក ជា ចាន់រ៉ន សមាជិក ឃុំល្វេ ស្រុកកោះសូទិន ខេត្តកំពង់ចាម មកពីគណបក្សប្រជាជនកម្ពុជា ដែលទើបត្រូវបានប្រកាសតែងតាំងនៅថ្ងៃទី ៥ ខែកក្កដា ប្រាប់ ភ្នំពេញ ប៉ុស្តិ៍ថា លោកពិតជាមានមោទនភាព ដែលទទួលបានគាំទ្រ ពីប្រជាពលរដ្ឋនៅក្នុងឃុំ បានបោះឆ្នោត ឱ្យលោកជាប់ជាសមាជិក ឃុំល្វេ ជាលើកដំបូង។
លោកបន្តថា ក្នុងតំណែងជាសមាជិកឃុំ ក្នុងអាណត្តិថ្មីនេះ លោកនឹងយកអស់កម្លាំងកាយចិត្ត និងប្តេជ្ញាបម្រើប្រជាពលរដ្ឋនៅក្នុងឃុំ ឱ្យអស់ពីសមត្ថភាព និងគ្រប់តម្រូវការ ដើម្បីជាការតបស្នង ទៅនឹងការគាំទ្ររបស់ប្រជាពលរដ្ឋ ដែលបានបោះឆ្នោតជូនគណបក្សប្រជាជនកម្ពុជា។
លោកថ្លែងថា៖ «ខ្ញុំនឹងខិតខំប្រឹងប្រែង បំរើប្រជាពលរដ្ឋដែលប្រជាពលរដ្ឋត្រូវការ មកពឹងពាក់ ខ្ញុំនឹងបំពេញឱ្យអស់ពីសមត្ថភាព ដូចជាធ្វើសំបុត្រកំណើត សៀវភៅស្នាក់នៅ និយាយទៅ គឺគ្រប់សេវាតម្រូវការរបស់ប្រជាពលរដ្ឋ»។
បើតាម លោក ជា ចាន់រ៉ន ក្រៅពីនេះ លោក និងសមាជិកឃុំផ្សេងទៀត ក៏នឹងចូលរួមអភិវឌ្ឍឃុំ និង ការពាររក្សាសន្តិសុខសណ្តាប់ធ្នាប់នៅក្នុងឃុំ ឱ្យមានរៀបរយជូនប្រជាពលរដ្ឋ ឱ្យរស់នៅប្រកបដោយសុវត្ថិភាព និង អនាម័យខ្ពស់ផងដែរ។
លោក ញឹម សារ៉ុម ដែលទើបជាប់ឆ្នោតធ្វើជាមេឃុំចំណារលើ នៃស្រុកស្ទោង ខេត្តកំពង់ធំ មកពីគណបក្សភ្លើងទៀន ដែលទើបត្រូវបានប្រកាសឱ្យចូលកាន់តំណែងកាលពីថ្ងៃទី ៤ កក្កដា ប្រាប់ ភ្នំពេញ ប៉ុស្តិ៍ថា លោកនឹងខិតខំបម្រើប្រជាពលរដ្ឋ ស្របទៅតាមច្បាប់រដ្ឋបាលឃុំសង្កាត់ និង បទប្បញ្ញត្តិ ផ្សេងៗទៀត របស់ក្រសួងមហាផ្ទៃ ឱ្យបានពេញលេញ ជាពិសេស បម្រើប្រជាពលរដ្ឋដោយភាពស្មោះត្រង់បំផុត។
លោកថ្លែងថា៖ «សកម្មភាពជាក់ស្តែង ខ្ញុំនឹងផ្តល់ជូននូវឯកសារផ្សេងៗ ស្របទៅតាមច្បាប់។ បើច្បាប់កំណត់ឱ្យយកថវិកា តម្លៃប៉ុន្មាន យើងនឹងយកប៉ុណ្ណឹង។ បើលើសពីហ្នឹង គឺមិនយកទេ ហើយបើមានសមាជិកក្រុមប្រឹក្សា ឬស្មៀនរូបណា ប្រព្រឹត្តខុស ក៏នឹងអនុវត្តទៅតាមច្បាប់ទាំងអស់»។
លោក ហ៊ត រដ្ឋា ចៅសង្កាត់ត្រពាំងក្រសាំង នៃខណ្ឌពោធិ៍សែនជ័យ រាជធានីភ្នំពេញ ថ្លែងក្នុង ពិធីប្រកាសសុពលភាព ក្រុមប្រឹក្សាសង្កាត់ត្រពាំងក្រសាំងនៅថ្ងៃទី៥ ខែកក្កដា ដោយបានថ្លែងអំណរគុណ ដល់ប្រជាពលរដ្ឋនៅក្នុងមូលដ្ឋានសង្កាត់ដែលបោះឆ្នោតជូនលោក ឱ្យបម្រើការងារនៅក្នុងសង្កាត់នេះ។
លោកបន្តថា ឆ្លើយតប ទៅគុណបំណាច់នេះ លោក នឹងខិតខំទាំងប្រាជ្ញាស្មារតី ទទួលខុសត្រូវ ក្នុងការដឹកនាំ និងគ្រប់គ្រង អភិវឌ្ឍសង្កាត់ឱ្យមានការរីកចម្រើន និងពង្រឹងទំនាក់ទំនងផ្ទៃក្នុង អង្គការនានាក្នុងសង្កាត់ ប្រជាពលរដ្ឋ និងអាជ្ញាធរគ្រប់លំដាប់ថ្នាក់ ជាពិសេស គឺបម្រើ និងដោះស្រាយសំណូមពររបស់ប្រជាពលរដ្ឋនៅក្នុងសង្កាត់ឱ្យអស់ពីលទ្ធភាព ។
លោកបន្តថា៖«សម្រាប់អាណត្តិថ្មីនេះ ក្រុមប្រឹក្សាសង្កាត់ ត្រពាំងក្រសាំង នឹងខិតខំដោះស្រាយសំណូមពររបស់ប្រជាពលរដ្ឋ ដោយយកចិត្តទុកដាក់ និងយុត្តិធម៌ និងអភិវឌ្ឍមូលដ្ឋានសង្កាត់ ប្រកបដោយចីរភាព។ មួយទៀត នឹងពង្រឹងវិន័យការងារ ស្របតាមច្បាប់គ្រប់គ្រងរដ្ឋបាលឃុំ សង្កាត់ និងបទបញ្ជាផ្ទៃក្នុង»។
លោក គង់ សោភ័ណ្ឌ អភិបាលខេត្តកណ្តាល ថ្លែងនៅក្នុងកិច្ចប្រជុំដំបូងដើម្បីប្រកាសសុពលភាពក្រុមប្រឹក្សាឃុំទឹកឃ្លាំង អាណត្តិទី៥ ឆ្នាំ២០២២ ស្ថិតនៅសាលាស្រុកល្វាឯម ខេត្តកណ្ដាល នៅថ្ងៃទី ៥ ខែកក្កដាថា ក្រុមប្រឹក្សាឃុំ ដែលបានជាប់ឆ្នោតនៅក្នុងអាណត្តិទី៥ នេះ ត្រូវបន្តនិរន្តរភាព នៃការដឹកនាំគ្រប់គ្រង និងអភិវឌ្ឍនៅមូលដ្ឋានក្នុងអាណត្តិ៥ឆ្នាំទៅមុខបន្តទៀត ដោយបន្តគ្រប់គ្រង និងការអភិវឌ្ឍមូលដ្ឋាន ពីក្រុមប្រឹក្សាសង្កាត់អាណត្តិចាស់ សំដៅធានាឱ្យមាននិរន្តរភាពក្នុងកិច្ចការរដ្ឋបាល និងការផ្តល់សេវា ព្រមទាំងការអភិវឌ្ឍនៅមូលដ្ឋានជាបន្តទៀត។
លោកបញ្ជាក់ថា៖ «ក្នុងនាមជាសមាជិកក្រុមប្រឹក្សាដែលបានជាប់ឆ្នោត ទោះបីជាលោកស្រី អស់លោក មានសមាសភាព មកពីគណបក្សនយោបាយតែមួយ ឬគណបក្សនយោបាយផ្សេងៗគ្នាក៏ពិតមែន ប៉ុន្តែតាមគោលការណ៍ច្បាប់ ក្រុមប្រឹក្សា គឺជាតំណាងឱ្យប្រជាពលរដ្ឋក្នុងមូលដ្ឋានទាំងមូល»។
លោកបានស្នើដល់ សមាជិកក្រុមប្រឹក្សា នៅក្នុងអាណត្តិការងារ ៥ ឆ្នាំនេះ ត្រូវខិតខំបំពេញតួនាទី ភារកិច្ចក្នុងការគ្រប់គ្រង ចាត់ចែងកិច្ចការក្នុងមូលដ្ឋានរបស់ខ្លួន ដើម្បីឆ្លើយតបទៅនឹងតម្រូវការប្រជាពលរដ្ឋ និងបម្រើផលប្រយោជន៍ ព្រមទាំងសេចក្តីត្រូវការរបស់ប្រជាពលរដ្ឋទាំងអស់ដោយស្មើភាព ដោយយុត្តិធម៌ និងមិនត្រូវប្រកាន់និន្នាការនយោបាយនោះឡើយ។
ចាប់តាំងពីឆ្នាំ ២០០២ កម្ពុជា បានដំណើរការរៀបចំការបោះឆ្នោតជ្រើសរើសក្រុម ប្រឹក្សាឃុំ សង្កាត់តាមគោលការណ៍លទ្ធិប្រជាធិបតេយ្យ សេរីពហុបក្សសរុបចំនួន ៥ លើករួចមកហើយ។ ការបោះឆ្នោតជ្រើសរើសក្រុមប្រឹក្សានៅថ្នាក់ឃុំ សង្កាត់ មានសារសំខាន់ ក្នុងការជំរុញកិច្ចដំណើរការអនុវត្តកំណែទម្រង់ វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ ដែលកំណែទម្រង់នេះបានដើរតួនាទីយ៉ាងសំខាន់ក្នុងការលើកកម្ពស់អភិបាលកិច្ចនៅថ្នាក់ឃុំ សង្កាត់តាមគោលការណ៍អភិវឌ្ឍន៍តាមបែបប្រជាធិបតេយ្យនៅថ្នាក់មូលដ្ឋាន៕
