ភ្នំពេញៈ កម្ពុជា-ឡាវប្តេជ្ញារិះរកវិស័យដែលមានសក្តានុពល ដើម្បីពង្រឹង និងជំរុញបន្ថែមទៀតនូវកិច្ចសហប្រតិបត្តិការ «ដ៏ជិតស្និទ្ធ និងគ្រប់ជ្រុងជ្រោយ» រវាងប្រទេសទាំង ២ ដើម្បីផលប្រយោជន៍ទៅវិញទៅមក សម្រាប់ប្រជាជននៃប្រទេសទាំង ២។
នៅថ្ងៃទី ៧ ខែកក្កដា ស្អែកនេះលោក សាលើមសៃ គុំម៉ាស៊ីត រដ្ឋមន្ត្រីការបរទេសឡាវនឹងធ្វើជាសហប្រធានជាមួយលោក ប្រាក់ សុខុន រដ្ឋមន្ត្រីការបរទេសកម្ពុជាក្នុងការដឹកនាំកិច្ចប្រជុំលើកទី ១៤ នៃគណៈកម្មការចម្រុះសម្រាប់កិច្ចសហប្រតិបត្តិការទ្វេភាគី (14th JCBC) កម្ពុជា និងឡាវនៅរាជធានីភ្នំពេញ។
តាមសេចក្តីប្រកាសព័ត៌មានរបស់ក្រសួងការបរទេសកម្ពុជាបញ្ជាក់កាលពីថ្ងៃទី ៤ ខែកក្កដា ថា នៅមុនកិច្ចប្រជុំនេះលោក គុំម៉ាស៊ីត នឹងមានជំនួបជាមួយលោកនាយករដ្ឋមន្ត្រី ហ៊ុន សែន។
សេចក្តីប្រកាសព័ត៌មានដដែលបានបញ្ជាក់ថា៖ «កិច្ចប្រជុំគណៈកម្មការចម្រុះលើកទី ១៤ រវាងកម្ពុជា និងឡាវនឹងពិនិត្យឡើងវិញនូវវឌ្ឍនភាពដែលសម្រេចបានស្របតាមកំណត់ហេតុនៃកិច្ចប្រជុំ JCBC កាលពីលើកមុន និងរិះរកវិស័យនានាដែលមានសក្តានុពលភាព សម្រាប់កិច្ចសហប្រតិបត្តិការនាពេលអនាគតសំដៅបន្តពង្រឹង និងជំរុញបន្ថែមទៀតនូវកិច្ចសហប្រតិបត្តិការដ៏ជិតស្និទ្ធ និងគ្រប់ជ្រុងជ្រោយរវាងប្រទេសទាំង ២ ដើម្បីផលប្រយោជន៍ទៅវិញទៅមកសម្រាប់ប្រជាជននៃប្រទេសទាំង ២»។
ប្រភពដដែលបានបន្ថែមថា នៅចុងបញ្ចប់នៃកិច្ចប្រជុំនេះសហប្រធានទាំង ២ នឹងចុះហត្ថលេខាលើកំណត់ហេតុនៃកិច្ចប្រជុំលើកទី ១៤ នៃគណៈកម្មការ ចម្រុះសម្រាប់កិច្ចសហប្រតិបត្តិការ ទ្វេភាគីកម្ពុជា និងឡាវ។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពបានថ្លែងនៅថ្ងៃទី ៥ កក្កដាថា កិច្ចសហប្រតិបត្តិការកម្ពុជា-ឡាវក្នុងរយៈពេលប៉ុន្មានឆ្នាំចុងក្រោយនេះមានភាពល្អប្រសើរហើយលោកសង្ឃឹមថា កិច្ចសហប្រតិបត្តិការទ្វេភាគីរវាងប្រទេសទាំង ២ នឹងបញ្ចប់អរិភាពដែលធ្លាប់កើតមានកន្លងមកនៅតាមព្រំដែននៃប្រទេសទាំង ២ គឺការប្រឈមមុខផ្នែកប្រដាប់អាវុធដាក់គ្នា ប៉ុន្តែមិនទាន់ឈានទៅដល់ការវាយប្រហារគ្នា ឬការផ្ទុះអាវុធដាក់គ្នានោះទេ។
លោកថ្លែងថា៖ «មួយរយៈកន្លងមកនេះ យើងមិនធ្លាប់ឮពីអរិភាពបែបនោះរវាងប្រទេសទាំង ២ ហ្នឹងកើតឡើងទេ ហើយជាមួយគ្នានោះដែរ ខ្ញុំថា កិច្ចសហប្រតិបត្តិការរវាងបណ្តាប្រទេសជិតខាងគឺមានឱកាស និងផលប្រយោជន៍ទៅវិញទៅមកច្រើនណាស់ ទោះបីជាប្រទេសទាំង ២ [កម្ពុជា-ឡាវ] មានសេដ្ឋកិច្ចមិនទាន់រឹងមាំក៏ដោយ ប៉ុន្តែក៏មានឱកាសនៃកិច្ចសហការគ្នាហ្នឹង អាចមានច្រើន»។
លោក យង់ គិមអេង បានថ្លែងថា ឱកាសទាំងនោះអាចជាការដោះដូរទំនិញ និងការធ្វើពាណិជ្ជកម្មផ្សេងៗ សម្រាប់ផលប្រយោជន៍ទៅវិញទៅមក និងតម្រូវការចាំបាច់ សម្រាប់ប្រទេសទាំង ២ ព្រមទាំងអាចជាឱកាសផ្សេងៗទៀត។ កិច្ចសហប្រតិបត្តិការទ្វេភាគីរវាងប្រទេសទាំង ២ នាពេលនេះក៏ជាគន្លឹះមួយសំខាន់ដែលអាចជួយពង្រឹងតួនាទីនៃប្រទេសទាំង ២ នៅក្នុងតំបន់អាស៊ាន ក៏ដូចជា នៅក្នុងទំនាក់ទំនងជាមួយប្រទេសមហាអំណាចមួយចំនួន។
កាលពីខែកុម្ភៈ លោក គុំម៉ាស៊ីត បានមកបំពេញទស្សនកិច្ច និងចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅកម្ពុជារយៈពេល ៣ ថ្ងៃ ដើម្បីពង្រឹងបន្ថែមទៀតនូវទំនាក់ទំនងកម្ពុជា-ឡាវ។ រដ្ឋមន្ត្រីទាំង ២ បានពិភាក្សាគ្នាអំពីទំនាក់ទំនង និងកិច្ចសហប្រតិបត្តិការទ្វេភាគីក្នុងវិស័យនានាក៏ដូចជាបញ្ហាតំបន់ និងអន្តរជាតិដែលជាផលប្រយោជន៍រួម និងក្តីបារម្ភរួម។
លោក ប្រាក់ សុខុន ធ្លាប់បានបញ្ជាក់នៅពេលនោះថា ទំនាក់ទំនងទ្វេភាគីរវាងប្រទេសទាំង ២ កំពុងមានសម្ទុះគួរឱ្យកត់សម្គាល់ ជាពិសេសក្រោយដំណើរទស្សនកិច្ចផ្លូវការ «ប្រកបដោយផ្លែផ្កា» របស់លោក ផនខាំ វីផាវ៉ាន់ នាយករដ្ឋមន្ត្រីឡាវកាលពីខែវិច្ឆិកា ឆ្នាំ ២០២១។
ភាគីទាំង ២ ប្តេជ្ញានាពេលនោះ ថានឹងបន្តស្វែងរកសក្តានុពលថ្មីៗតាមរយៈការលើកស្ទួយ និងកិច្ចសហប្រតិបត្តិការនានា ជាពិសេសក្នុងវិស័យពាណិជ្ជកម្ម វិនិយោគអប់រំ ទេសចរណ៍ ការតភ្ជាប់ និងការផ្លាស់ប្តូររវាងប្រជាជន និងប្រជាជន៕