កីឡាស៊ីហ្គេម ត្រូវបានបង្កើតឡើងក្នុងឆ្នាំ ១៩៥៩ និងប្រារព្ធឡើងរៀងរាល់ ២ ឆ្នាំម្ដង ក្នុងគោលបំណង ដើម្បីធ្វើសហប្រតិបត្តិការលើកស្ទួយព្រឹត្តិការណ៍កីឡាក្នុងតំបន់ និងរឹតចំណងមិត្តភាព និងការយល់ដឹងពីគ្នារវាងបណ្ដាប្រទេសនៅតំបន់អាស៊ីអាគ្នេយ៍។ ឆ្នាំ ២០២៣ ខាងមុខនេះ គឺជាឆ្នាំដែលប្រទេសកម្ពុជាមានមោទនភាពមានសមត្ថភាពបង្ហាញឱ្យឃើញពីភាពរីកចម្រើន សុខសន្ដិភាពក្នុងប្រទេស និងជាប្រវត្តិសាស្ដ្រដែលកម្ពុជាទទួលបានទង់បន្តវេនធ្វើជាម្ចាស់ផ្ទះរៀបចំព្រឹត្តិការណ៍ប្រកួតកីឡាស៊ីហ្គេមលើកទី ៣២ ឆ្នាំ ២០២៣ ដែលកម្ពុជាខកខានមិនបានរៀបចំអស់រយៈពេល ៦៣ ឆ្នាំ។ ការត្រៀមខ្លួនធ្វើជាម្ចាស់ផ្ទះប្រកួតកីឡាស៊ីហ្គេមលើកទី ៣២ នៅឆ្នាំ ២០២៣ គឺជាអាទិភាពមួយដ៏សំខាន់ក្នុងចំណោមអាទិភាពទាំង ៧ របស់ក្រសួងអប់រំ យុវជន និងកីឡា។ ដូចនេះខ្លឹមសារក្នុងអត្ថបទប្រចាំខែកក្កដា ឆ្នាំ ២០២២ នេះនឹងផ្តោតសំខាន់ទៅលើគោលនយោបាយជាតិ ស្ដីពីការអភិវឌ្ឍវិស័យអប់រំកាយ និងកីឡា យុទ្ធសាស្ដ្រឆ្ពោះទៅកីឡាស៊ីហ្គេម លើកទី ៣២ អនុវិស័យការអប់រំកាយ និងកីឡា ក្នុងរបាយការណ៍សន្និបាតបូកសរុបលទ្ធផលការងារអប់រំ យុវជន និងកីឡាឆ្នាំសិក្សា ២០២០-២០២១ និងលើកទិសដៅឆ្នាំសិក្សា ២០២១-២០២២ និងលទ្ធផលរបស់កីឡាករ កីឡាការិនីកម្ពុជាក្នុងព្រឹត្តិការណ៍ស៊ីហ្គេមលើកទី ៣១ នៅប្រទេសវៀតណាម។
ស្របតាមគោលនយោបាយជាតិស្ដីពី ការអភិវឌ្ឍវិស័យអប់រំកាយ និងកីឡាមានចក្ខុវិស័យក្នុងការកសាងមនុស្សគ្រប់រូបឱ្យមានសុខភាព និងសុខុមាលភាពល្អ កាយសម្បទាមាំមួន ឆន្ទៈ មោះមុត ការអំណត់ព្យាយាម វិន័យ ស្មារតីក្រុម គំនិតច្នៃប្រឌិត និងមានការតស៊ូស្វិតស្វាញ សំដៅដណ្ដើមបានលទ្ធផលល្អប្រសើរក្នុងការប្រកួតកីឡាលើឆាកអន្តរជាតិ និងមានជីវភាពរស់នៅប្រកបដោយសុខដុមរមនា។ គោលនយោបាយនេះមានគោលបំណងលើកកម្ពស់សិទ្ធិ ឱកាស និងបណ្ដុះវប្បធម៌ អប់រំកាយ និងកីឡាដល់ប្រជាជនគ្រប់រូប និងមានគោលដៅដូចជា៖ (១) អភិវឌ្ឍកីឡាសម្រាប់ទាំងអស់គ្នា (២) អភិវឌ្ឍវិស័យអប់រំកាយ និងកីឡានៅគ្រប់គ្រឹះស្ថានសិក្សា និងសហគមន៍ (៣) អភិវឌ្ឍកីឡាកម្រិតខ្ពស់ និង (៤) អភិវឌ្ឍឧស្សាហកម្មកីឡា និង (៥) អភិរក្ស និងអភិវឌ្ឍកីឡា និងល្បែងប្រជាប្រិយខ្មែរ។ ដើម្បីសម្រេចគោលបំណង និងគោលដៅខាងលើយុទ្ធសាស្ដ្រចំនួន ១១ ត្រូវបានដាក់ចេញដូចជា៖ (១) អភិវឌ្ឍក្របខ័ណ្ឌច្បាប់ និងយន្ដការ (២) លើកកម្ពស់ការអប់រំ ការបណ្ដុះបណ្ដាល និងការអភិវឌ្ឍសមត្ថភាព ដល់កីឡាករ មន្ដ្រីកីឡា និងគ្រូកីឡា (៣) លើកកម្ពស់សមភាពយេនឌ័រ ក្នុងចំណោមកីឡាករ មន្ដ្រីកីឡា និងគ្រូកីឡា (៤) អភិវឌ្ឍកីឡាជនពិការ (៥) អភិវឌ្ឍហេដ្ឋារចនាសម្ព័ន្ធ និងសម្ភាររូបវន្ត (៦) លើកកម្ពស់ការសិក្សាស្រាវជ្រាវទាក់ទងនឹងកីឡា (៧) លើកកម្ពស់កីឡា និងល្បែងប្រជាប្រិយ ការអប់រំកាយ និងកីឡា តាមប្រព័ន្ធផ្សព្វផ្សាយនានា (៨) ពង្រឹងតួនាទីរបស់អង្គការរដ្ឋកីឡា និងអង្គការសង្គមកីឡា (៩) កែសម្រួល និងពង្រឹងរចនាសម្ព័ន្ធនៃការប្រកួត (១០) ពង្រឹងសហប្រតិបត្តិការអន្តរជាតិ និង (១១) លើកកម្ពស់ឧស្សាហកម្មកីឡា។
ដើម្បីត្រៀមខ្លួនរៀបចំការប្រកួតកីឡាស៊ីហ្គេមលើកទី ៣២ នៅឆ្នាំ ២០២៣ ខាងមុខ ក្រសួងអប់រំ យុវជន និងកីឡាបានដាក់ចេញនូវយុទ្ធសាស្ដ្រឆ្ពោះទៅកីឡាស៊ីហ្គេមលើកទី ៣២ ឆ្នាំ ២០២៣ តាមគន្លងប្រក្រតីភាពថ្មី។ ក្នុងយុទ្ធសាស្ដ្រនេះ បានរំលេចចេញនូវយន្តការអនុវត្តឆ្ពោះទៅឆ្នាំ ២០២៣ ការកំណត់ប្រភេទកីឡាសក្ដានុពល សម្រាប់ដាក់បញ្ចូលក្នុងកម្មវិធីប្រកួតកីឡាស៊ីហ្គេមលើកទី ៣២ យុទ្ធសាស្ដ្រអភិវឌ្ឍន៍ធនធានមនុស្ស ដូចជាការហាត់ហ្វឹកហ្វឺនក្រុមកីឡាជម្រើសជាតិ សម្រាប់ដណ្ដើមមេដាយ ទាំងក្នុងប្រទេស ទាំងក្រៅប្រទេស ការហាត់ហ្វឹកហ្វឺនក្រុមកីឡាជនពិការ និងគ្រូបរទេសជាប់កិច្ចសន្យា និងយុទ្ធសាស្ដ្រដណ្ដើមមេដាយឆ្នាំ ២០២៣។ យុទ្ធសាស្ដ្រឆ្ពោះទៅកីឡាស៊ីហ្គេមលើកទី ៣២ ឆ្នាំ ២០២៣ តាមគន្លងប្រក្រតីភាពថ្មីបានដាក់ចេញនូវវិធានការមួយចំនួន ដូចជា៖ ការរៀបចំចាក់វ៉ាក់សាំងជូនមន្ដ្រីបច្ចេកទេស គ្រូបង្វឹក កីឡាករ ការជួសជុលកែលម្អទីលានក្នុងពហុកីឡដ្ឋានជាតិ និងសាងសង់ទីលានកីឡា ការរៀបចំបើកវគ្គបំប៉នសមត្ថភាពគ្រូបង្វឹកកម្ពុជា ការបញ្ជូនកីឡាករ កីឡាការិនីទៅហាត់ហ្វឹកហ្វឺននៅក្រៅប្រទេស ការរៀបចំអាហារូបត្ថម្ភឱ្យសមស្របទៅតាមតម្រូវការថាមពលនៃប្រភេទកីឡានីមួយៗជំរុញឱ្យសហព័ន្ធជាតិរៀបចំការប្រកួតជើងឯកថ្នាក់ជាតិ និងស្នើសុំ គណៈកម្មាធិការជាតិរៀបចំការប្រកួតកីឡាស៊ីហ្គេមផ្ដល់ឱកាសឱ្យសហព័ន្ធកីឡាជាតិចូលរួមប្រកួតជើងឯកក្នុងតំបន់ទ្វីប និងពិភពលោក។ ការរៀបចំធ្វើជាម្ចាស់ផ្ទះនៃការប្រកួតកីឡាស៊ីហ្គេមលើកទី ៣២ ឆ្នាំ ២០២៣ នឹងមាន ៤០ ប្រភេទកីឡា និង ៥៤៧ វិញ្ញាសា គោលដៅសំខាន់គឺការរៀបចំការប្រកួតឱ្យបានល្អប្រសើរ និងគឺការដណ្ដើមមេដាយមាសឱ្យបានច្រើន។ ការប្រកួតកីឡាស៊ីហ្គេមលើកទី ៣២ ឆ្នាំ ២០២៣ ដែលប្រទេសកម្ពុជាធ្វើជាម្ចាស់ផ្ទះ ក្រោមមូលបទ «កីឡារស់ក្នុងសន្តិភាព» នឹងប្រព្រឹត្តទៅនៅថ្ងៃទី ៥ ដល់ ថ្ងៃទី ១៧ ខែឧសភា ឆ្នាំ ២០២៣ ដោយបែងចែកតំបន់ប្រកួតកីឡាស៊ីហ្គេមចំនួន ៦ តំបន់ ដូចជា (១) តំបន់រាជធានីភ្នំពេញ មាន ៦ ទីតាំង (២) តំបន់ខេត្តសៀមរាប ទីតាំងឧទ្យានជាតិភ្នំគូលែន និងអង្គរវត្ត (៣) តំបន់ខេត្តព្រះសីហនុ ទីតាំងឆ្នេរអូរឈើទាល (៤) តំបន់ខេត្តកែប ទីតាំងឆ្នេរកែប (៥) តំបន់ខេត្តកំពត ទីតាំងមជ្ឈមណ្ឌលកីឡាលើទឹក និង (៦) តំបន់ខេត្តកំពង់ស្ពឺ ទីតាំងឧទ្យានជាតិ ភ្នំគីរីរម្យ។
សូមរំលឹកផងដែរថា ថ្មីៗនេះកីឡាករ កីឡាការិនីកម្ពុជាទើបតែបញ្ចប់ការប្រកួតកីឡាស៊ីហ្គេមលើកទី ៣១ នៅប្រទេសវៀតណាម ដោយទទួលបានលទ្ធផលល្អធៀបទៅនឹងលទ្ធផលឆ្នាំចាស់។ ការប្រកួតកីឡាស៊ីហ្គេមលើកទី ៣០ នៅហ្វីលីពីន កម្ពុជាទទួលបានមេដាយមាស ៤ គ្រឿង ប្រាក់ ៦ គ្រឿង និងសំរឹទ្ធ ៣៦ គ្រឿង ចំណែកឯការប្រកួតកីឡាស៊ីហ្គេមលើកទី ៣១ នៅប្រទេសវៀតណាម កម្ពុជាទទួលបានមេដាយសរុបចំនួន ៦៣ គ្រឿង ដោយក្នុងនោះមេដាយមាសចំនួន ៩ មេដាយប្រាក់ចំនួន ១៣ និងមេដាយសំរឹទ្ធចំនួន ៤១ ដោយឈរលើចំណាត់ថ្នាក់លេខ ៨ ក្នុងចំណោម ១១ ប្រទេស។ នេះសបញ្ជាក់ឱ្យឃើញថា វិស័យអប់រំកាយ និងកីឡាបានកំពុងតែមានការរីកចម្រើន និងមានការជួយជ្រោមជ្រែងដល់សំណាក់គ្រូបង្វិក កីឡាករ កីឡាការិនីពីសំណាក់ដៃគូពាក់ព័ន្ធគ្រប់វិស័យ និងដៃគូអភិវឌ្ឍនានាផងដែរ។ ការអប់រំកាយ និងកីឡារបស់កម្ពុជាមានមហិច្ឆតាចង់បានចំណាត់ថ្នាក់លេខ ៥ ក្នុងចំណោម ១១ ប្រទេស សម្រាប់ការប្រកួតកីឡាស៊ីហ្គេមលើកទី ៣២ ឆ្នាំ ២០២៣ នៅប្រទេសកម្ពុជា។
ជារួមដើម្បីឆ្លើយតប និងត្រៀមខ្លួនធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមលើកទី ៣២ ឆ្នាំ ២០២៣ នេះ ក្រសួងអប់រំ យុវជន និងកីឡា គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី ៣២ ឆ្នាំ ២០២៣ គ្រូបង្វិក កីឡាករ កីឡាការិនី និងដៃគូពាក់ព័ន្ធគ្រប់វិស័យត្រូវរួមសាមគ្គី សហការ និងខិតខំប្រឹងប្រែងឱ្យអស់លទ្ធភាពបំពេញការងារតាមតួនាទីភារកិច្ចប្រកបដោយវិជ្ជាជីវៈ និងស្មារតីទទួលខុសត្រូវខ្ពស់ ដើម្បីលើកស្ទួយវិស័យអប់រំកាយ និងកីឡានៅកម្ពុជា។ សូមជូនពរដល់កីឡាករ កីឡាការិនីទាំងអស់សម្រេចបាននូវគោលបំណង និងទទួលបានលទ្ធផលល្អៗក្នុងការប្រកួតនានាខាងមុខ៕