.jpg)
គជប និងតំណាងគណបក្សនយោបាយ ព្រមទាំងអង្គការសង្គមស៊ីវិល ធ្វើសន្និបាតបូកសរុបការងារបោះឆ្នោត នាថ្ងៃទី ៦ កក្កដា ដោយពិភាក្សាលើនីតិវិធី ដើម្បីកែលម្អសម្រាប់ការបោះឆ្នោត នាថ្ងៃខាមុខ។ រូបថត គជប
ព្រះសីហនុៈ ក្នុងពិធីបើកសន្និបាតបូកសរុបការងារបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ឆ្នាំ ២០២២ នៅខេត្តព្រះសីហនុ នាថ្ងៃទី ៦-៧ ខែកក្កដា គណៈកម្មាធិការជាតិរៀបចំការបោះឆ្នោត (គជប) គណបក្សនយោបាយ និងអង្គការក្រៅរដ្ឋាភិបាល បានពិភាក្សាលើប្រធានបទធំៗចំនួន ៥ ដើម្បីកែលម្អសម្រាប់ការបោះឆ្នោតជ្រើសតាំងតំណាងរាស្ត្រ អាណត្តិទី៧ ឆ្នាំ ២០២៣ និងបោះឆ្នោតផ្សេងៗទៀតនៅពេលខាងមុខ។
លោក សោម សូរីដា អ្នកនាំពាក្យ គ.ជ.ប. ប្រាប់ ភ្នំពេញ ប៉ុស្តិ៍ នៅថ្ងៃទី ៦ កក្កដាថា ប្រធានបទទាំង ៥ រួមមានទី១- ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ទី២- ការចុះបញ្ជីបេក្ខជននៃគណបក្សនយោបាយ ទី៣- ការឃោសនាបោះឆ្នោត ទី៤- ការបោះឆ្នោត ការរាប់សន្លឹកឆ្នោត និងការបូកសរុបលទ្ធផល នៃការបោះឆ្នោត និង ទី៥- ការដាក់ ការទទួល និងការដោះស្រាយពាក្យបណ្ដឹងនៅគ្រប់ដំណាក់កាលនៃការបោះឆ្នោត។
លោកបន្តថា ក្នុងសន្និបាតនេះ គជប បានបង្កើតជាក្រុម ដែលមានសមាសភាពមកពីគណបក្សនយោបាយ អង្គការសង្គមស៊ីវិល និងមន្ត្រីជំនាញរបស់គជប ដើម្បីសិក្សា និងពិភាក្សាទៅលើប្រធានបទសំខាន់ៗទាំងនេះ ដោយប្រមូលធាតុចូល ដើម្បីកែលម្អសម្រាប់ការបោះឆ្នោត នៅពេលខាងមុខទៀត។
លោកថ្លែងថា៖ «លទ្ធផលនៃការពិភាក្សា វាជាធាតុចូលយ៉ាងសំខាន់ក្នុងការកែលម្អបទបញ្ជានីតិវិធីសម្រាប់ការបោះឆ្នោត លើកក្រោយទៀត នៅឆ្នាំ ២០២៣ ហើយអាចរហូតដល់ឆ្នាំ ២០២៧ នៃការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៦»។
លោក សំ គន្ធាមី នាយកប្រតិបត្តិអង្គការឃ្លាំមើលការបោះឆ្នោត (និកហ្វិក) ប្រាប់ ភ្នំពេញ ប៉ុស្តិ៍ នៅពេលលោកចូលរួមសន្និបាត នៅថ្ងៃទី ៦ កក្កដាថា កិច្ចពិភាក្សា និងផ្តល់យោបល់ពីអង្គការសង្គមស៊ីវិល និងគណបក្សនយោបាយ ប្រព្រឹត្តទៅយ៉ាងផុលផុសនៅតាមក្រុមពិភាក្សានីមួយៗ។
លោកថ្លែងថា៖ «គេលើកបញ្ហាប្រឈម ហើយផ្តល់យោបល់ ឧទាហរណ៍ការចុះឈ្មោះ និងពិនិត្យបញ្ជីឈ្មោះ មានបញ្ហាអីខ្លះ និងមានការកែលម្អដូចម្តេច? ហើយក្រុមផ្សេងទៀត គេពិភាក្សាប្រធានបទផ្សេងទៀត»។
លោក ណុប ផន អគ្គលេខារងទទួលបន្ទុកបោះឆ្នោត នៃគណបក្សហ៊្វុនស៊ិនប៉ិច ថ្លែងនៅថ្ងៃទី ៦ កក្កដាថា គណបក្សហ៊្វុនស៊ិនប៉ិច ស្ថិតក្នុងក្រុម ៥ ដែលពិភាក្សាទៅលើការដាក់ ការទទួល និងការដោះស្រាយពាក្យបណ្ដឹងនៅគ្រប់ដំណាក់កាលនៃការបោះឆ្នោត។ គណបក្សបានផ្តល់មតិយោបល់យ៉ាងផុលផុស ដើម្បីធ្វើយ៉ាងណាឱ្យការបោះឆ្នោតនៅពេលខាងមុខកាន់តែមានភាពល្អប្រសើរថែមទៀត។
លោកបញ្ជាក់ថា៖ «ការដាក់ប្រធានបទនេះឱ្យគណបក្សនយោបាយ និងភាគីពាក់ព័ន្ធពិភាក្សា និងផ្តល់យោបល់នេះ មិនមែនតែល្អសម្រាប់ហ៊្វុនស៊ិនប៉ិចទេ គឺល្អសម្រាប់គណបក្សទូទៅ ទំាងអស់»។
ក្នុងពិធីបើកសន្និបាតបូកសរុបការងារបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅឯខេត្តព្រះសីហនុ នាថ្ងៃទី ៦-៧ កក្កដានោះ លោក នុត សុខុម អនុប្រធាន គ.ជ.ប. បញ្ជាក់ថា ទោះបីជាគណៈកម្មាធិការជាតិរៀបចំការបោះឆ្នោតបានរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ ២០២២ សម្រេចបាននូវលទ្ធផលជោគជ័យយ៉ាងណាក្ដី ក៏នៅតែសង្កេតឃើញថា នៅមានចំណុចខ្វះខាតមួយចំនួន ដែលទាំងអស់គ្នាត្រូវតែចូលរួមចំណែកដោះស្រាយតាមរយៈអង្គសន្និបាតនេះ។
លោកថ្លែងថា៖ «នៅពេលពិភាក្សាលើប្រធានបទ ក្នុងនាមគណៈកម្មាធិការជាតិរៀបចំការបោះឆ្នោត និងខ្លួនខ្ញុំផ្ទាល់ ខ្ញុំស្នើសូមឱ្យឯកឧត្ដម លោកជំទាវ លោក លោកស្រីទាំងអស់ មេត្តាផ្តោតការយកចិត្តទុកដាក់ក្នុងការចូលរួមពិភាក្សាលើប្រធានបទឱ្យបានផុលផុស ដោយលើកយកបញ្ហាប្រឈមសំខាន់ៗ ផ្ដល់ជាយោបល់ ឬលើកជាសំណូមពរ ឬអនុសាសន៍ ប្រកបដោយស្មារតីទទួលខុសត្រូវ និងមានសេចក្ដីថ្លៃថ្នូរ»។
បើតាម លោក នុត សុខុម តាមរយៈសន្និបាតនេះ រាល់មតិយោបល់ ឬសំណូមពរ និងអនុសាសន៍ របស់លោក លោកស្រី ដែលលើកឡើងក្នុងកិច្ចពិភាក្សាដែលស្របទៅនឹងច្បាប់ បទបញ្ជា និងឧត្ដមានុវត្តន៍ គឺជាធាតុចូលគន្លឹះ និងវិភាគទានដ៏ថ្លៃថ្លាក្នុងការរួមចំណែកកែលម្អការបោះឆ្នោតខាងមុខ ឱ្យកាន់តែល្អប្រសើរឡើងថែមទៀត៕
