ភ្នំពេញៈ លោកនាយករដ្ឋមន្ត្រី ហ៊ុន សែន អនុញ្ញាតឱ្យអ្នកមានរថយន្តចង្កូតស្តាំ អាចបន្តប្រើប្រាស់ដោយចូលបង់ពន្ធបានដោយមិនកែចង្កូតពីស្តាំមកឆ្វេង តែបញ្ជាឱ្យចាប់កម្ទេចចោលរាល់រថយន្តចង្កូតស្តាំដែលនាំចូលថ្មី ដោយគ្មានការលើកលែង ខណៈរថយន្តចង្កូតស្តាំជិត ៧ ០០០ គ្រឿងបានចូលបង់ពន្ធ។
ការប្រកាសអនុញ្ញាតនេះធ្វើឡើង បន្ទាប់ពីក្រុមអ្នកប្រើប្រាស់រថយន្តចង្កូតស្តាំប្រមាណ ២០០ នាក់បានប្រមូលផ្តុំគ្នាតវ៉ាបិទផ្លូវកាលពីថ្ងៃទី ៥ ខែកក្កដា ក្នុងខណ្ឌដង្កោដោយស្នើសុំគោលការណ៍បង់ពន្ធធម្មតា តែមិនកែចង្កូតពីស្តាំមកឆ្វេង ក្រោយយុទ្ធនាការប្រមូលពន្ធ និងអាករនាំចូលលើរថយន្តគ្មានពន្ធមានស្រាប់ក្នុងប្រទេសបានផុតកំណត់កាលពីថ្ងៃទី ៣០ ខែមិថុនា។
លោក ហ៊ុន សែន បានថ្លែងក្នុងពិធីសំណេះសំណាលជាមួយគណៈប្រតិភូកីឡាអាស៊ានប៉ារ៉ាហ្គេមនៅថ្ងៃទី ៦ កក្កដាថា៖ «បងប្អូនរថយន្តចង្គូតស្តាំទាំងឡាយ ម្សិលមិញបងប្អូនសុំបង់ពន្ធ តែសុំមិនដូរចង្កូត។ ឥឡូវ ខ្ញុំយល់ស្របជាមួយនឹងសំណូមពររបស់បងប្អូន។ បងប្អូនត្រូវចូលមកបង់ពន្ធ ដោយមិនចាំបាច់ដូរចង្កូតទេ សម្រាប់អ្នកដែលមិនទាន់បានដូរ ហើយអ្នកដែលបានដូរហើយ គឺឱ្យវាចប់ទៅ ដើម្បីយើងមានឡានចង្កូតឆ្វេងប្រើនឹងគេ»។
លោកបញ្ជាក់ថា៖ «អ្នកដែលមិនទាន់បានដូរត្រូវចូលមកបង់ពន្ធ ហើយក្រសួងសាធារណការត្រូវចេញស្លាកលេខឱ្យគេ។ កន្លងទៅរថយន្តចង្កូត (ស្តាំ) មួយចំនួន គឺបានចូលមកធ្វើការកក់ប្រាក់ រួចទៅកែចង្កូត។ ឥឡូវអ្នកដែលបានកក់ប្រាក់ហើយ តែមិនទាន់បានដូរចង្កូត មិនចាំបាច់ដូរទេ ប្រសិនបើមិនទាន់បានដូរ តែត្រូវមកបន្ថែមលុយបង់ពន្ធឱ្យដាច់ រួចហើយទទួលលិខិតពីគយសម្រាប់បញ្ជូនទៅទទួល (ស្លាក) លេខ»។
ជាមួយនឹងការអនុញ្ញាតនេះ លោកនាយករដ្ឋមន្ត្រីជំរុញឱ្យអ្នកដែលមានរថយន្តចង្កូតស្តាំដែលមានស្រាប់ក្នុងប្រទេស ចូលខ្លួនមកបង់ពន្ធឱ្យបានត្រឹមត្រូវតាមផ្លូវច្បាប់ ដោយលោកព្រមានកុំឱ្យមានការលួចនាំចូលដោយខុសច្បាប់ចំពោះរថយន្តចង្កូតស្តាំប្រភេទថ្មី តាមរូបភាពណាក៏ដោយ។ «ខ្ញុំសុំបញ្ជាក់ សុពលភាពរបស់វា គឺនៅថ្ងៃទី ៦ ខែ ៧ ឆ្នាំ ២០២២ ត្រឹមម៉ោងហ្នឹង។ ចាប់ពីថ្ងៃស្អែកទៅរថយន្តដែលនាំចូលថ្មីជាចង្កូតស្តាំ មិនឱ្យបង់ពន្ធហើយក៏មិនឱ្យដូរចង្កូត គឺចាប់យកតែម្តង ដោយមិនចាំបាច់និយាយអ្វីទៀតទេ។ ខ្ញុំអនុញ្ញាតនេះ គឺក្នុងវង្វង់រថយន្តចង្កូតស្តាំដែលកំពុងធ្វើចរាចរណ៍នៅលើទឹកដីកម្ពុជាតែប៉ុណ្ណោះ មិនអនុញ្ញាតឱ្យនាំចូលថ្មីទេ។ សូមស្តាប់ឱ្យច្បាស់...តិចទៅបន្លំយកចូលមកថែម ហើយបង់ពន្ធ គឺអត់ទេ»។
បើតាមលោក ហ៊ុន សែន គិតត្រឹមថ្ងៃទី ៦ កក្កដា កម្ពុជាមានរថយន្តចង្កូតស្តាំ ដែលមានស្រាប់ក្នុងប្រទេស ហើយបានចូលខ្លួនមកកក់ប្រាក់ពន្ធមានចំនួន ៦ ៩៩៩ គ្រឿងដោយក្នុងនោះចំនួន ៤ ២៩៩ គ្រឿងបានកែចង្កូតរួចរាល់ ចំណែក ២ ៥០៩ គ្រឿងទៀតនៅមិនទាន់បានកែចង្កូត។
លោក ណុង សំបូរ អ្នកមានរថយន្តចង្កូតស្តាំ ដែលបានកក់ប្រាក់នៅពន្ធដាររួចរាល់បានសម្តែងក្តីសប្បាយរីករាយចំពោះការអនុគ្រោះនេះ។ លោកថ្លែងថា ការអនុញ្ញាតនេះនឹងចូលរួមសម្រួលដល់ជីវភាពរបស់លោក ដែលកំពុងមិនមានថវិកាគ្រប់គ្រាន់ ដើម្បីធ្វើការកែចង្កូតរថយន្ត ដោយសារតែត្រូវចំណាយច្រើន។ «ឡានខ្ញុំទិញនេះជាង ៥ ឆ្នាំហើយ ដោយសារតែគ្មានលុយគ្រប់ទិញឡានមានពន្ធត្រឹមត្រូវ ទើបបង្ខំចិត្តទិញឡានចង្កូតស្តាំនេះ។ ខ្ញុំសង្ឃឹមថា អ្នកក្រោយៗ កុំបន្តទិញឡានបែបនេះបន្តទៀតអី ព្រោះវាពិបាកណាស់ ហើយអ្នកនាំចូលគួរតែបញ្ឃប់ការនាំចូលឡានប្រភេទនេះ»។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជាថ្លែងថា ផ្អែកតាមមូលដ្ឋានផ្នែកសុវត្ថិភាពគឺចាំបាច់រថយន្តចង្កូតស្តាំ គឺត្រូវតែធ្វើការកែចង្កូត ប៉ុន្តែការអនុញ្ញាតនេះ គឺជាសិទ្ធិសម្រេចរបស់ប្រមុខរដ្ឋាភិបាលក្នុងការអនុញ្ញាតឱ្យរថយន្តប្រភេទនេះអាចចរាចរណ៍នៅលើដងផ្លូវបាន។
ជាមួយនឹងការសម្រេចនេះលោក បញ្ញា ស្នើឱ្យមានការកំណត់ និងកម្រិតនីតិវិធីច្បាស់លាស់ណាមួយ សម្រាប់អ្នកបើកបររថយន្តប្រភេទចង្កូតស្តាំនេះ ដើម្បីបញ្ចៀសគ្រោះថ្នាក់នានានៅលើដងផ្លូវ ខណៈការបើកបររថយន្តចង្កូតស្តាំ នៅក្នុងប្រព័ន្ធច្បាប់ដែលប្រកាន់ស្តាំ គឺប្រឈមនឹងហានិភ័យខ្ពស់។
លោក ឈួន វន់ អគ្គនាយកដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូនឱ្យដឹងថា ក្រសួងបានត្រៀមរួចជាស្រេច ចំពោះការចុះបញ្ជីរថយន្តចង្កូតស្តាំ ដែលមានស្រាប់នៅក្នុងប្រទេសតាមការណែនាំរបស់ថ្នាក់ដឹកនាំ។ លោកថា៖ «ដូចសម្តេចលោកមានប្រសាសន៍ហើយ យោងតាមច្បាប់ចរាចរណ៍យើង តម្រូវឱ្យឡានប្រើប្រាស់ក្នុងប្រទេសយើង ប្រើចង្កូតឆ្វេង ប៉ុន្តែនេះ គឺជាការយោគយល់អធ្យាស្រ័យដល់បងប្អូនយើងមួយចំនួនដែលប្រើប្រាស់ឡានចង្កូតស្តាំ»៕
វីដេអូ៖