ភ្នំពេញៈ ក្នុងសវនាការលើកទី ៤៦ សាលាដំបូងរាជធានី-ភ្នំពេញបានបន្តសួរដេញដោល លោក កឹម សុខា ប្រធានអតីតគណបក្សសង្គ្រោះជាតិពាក់ព័ន្ធនឹងវីដេអូនានា ដែលបានបង្ហាញពីការកៀរគរកម្លាំងពីគ្រប់មជ្ឈដ្ឋាន ដើម្បីមកធ្វើមហាបាតុកម្មប្តូររដ្ឋាភិបាលស្របច្បាប់ឱ្យខាងតែបាន នៅដំណាច់ចុងឆ្នាំ ២០១៣ ។ ប៉ុន្តែលោក កឹម សុខា បានឆ្លើយបដិសេធចំពោះការជាប់ពាក់ព័ន្ធពីការធ្វើបាតុកម្មនេះ។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់ភ្នំពេញ-ប៉ុស្តិ៍នៅក្រោយពីបញ្ចប់សវនាការនៅថ្ងៃទី ៦ ខែកក្កដា ថា សាលាដំបូងផ្តោតសំខាន់លើការសួរសំណួរចំពោះវីដេអូនានាដែលបង្ហាញពីការកៀរគរកម្លាំងពីគ្រប់មជ្ឈដ្ឋាន ដើម្បីធ្វើមហាបាតុកម្មប្តូររដ្ឋាភិបាលស្របច្បាប់ឱ្យខាងតែបាន នៅដំណាច់ចុងឆ្នាំ ២០១៣ ក្រោយពីគណៈកម្មាធិការជាតិរៀបចំការបោះឆ្នោតបានប្រកាសពីលទ្ធផលផ្លូវការនៃការចាញ់ឆ្នោតរបស់អតីតគណបក្សសង្គ្រោះជាតិ។
ទោះជាយ៉ាងណា លោក ចាន់ ចេន សហមេធាវីការពារក្តីលោក កឹម សុខា ប្រាប់ក្រុមអ្នកសារព័ត៌មាននៅខាងមុខសាលាដំបូងរាជធានីភ្នំពេញ នៅក្រោយបញ្ចប់សវនាការនៅថ្ងៃទី ៦ ខែកក្កដាថា នៅក្នុងសវនាការលើកទី ៤៦ នេះ តំណាងអយ្យការបានចាក់បញ្ចាំងវីដេអូពាក់ព័ន្ធនឹងការធ្វើបាតុកម្មនៅម្តុំស្ពានក្បាលថ្នល់ រាជធានីភ្នំពេញ ប៉ុន្តែនៅក្នុងសវនាការនេះ លោក កឹម សុខា បានថ្លែងប្រាប់តុលាការថា បាតុកម្មនេះមិនមែនលោកជាអ្នកទទួលខុសត្រូវទេ។
លោក ចាន់ ចេន បន្តថា ចាប់តាំងពីសវនាការលើកទី ១ រហូតមកដល់លើកទី ៤៦ នេះមានលក្ខណៈតានតឹងជាធម្មតា ហើយក៏មិនមានអ្វីជឿនលឿនទៅមុខដែរ ប៉ុន្តែអ្វីដែលគួរឱ្យកត់សម្គាល់ គឺតំណាងអយ្យការព្យាយាមយកភ័ស្តុតាង ការធ្វើបាតុកម្មនៅម្តុំស្ពានអាកាសក្បាលថ្នល់ដែលជារឿងចាស់នេះ ចង់ឱ្យកូនក្តីរបស់លោកទទួលខុសត្រូវ។
លោកបញ្ជាក់ថា៖ «មែនទៅ កូនក្តីយើងខ្ញុំ ឯកឧត្តម កឹម សុខា បានមានប្រសាសន៍ជារឿយៗ និងជាហូរហែហើយថា រាល់បាតុកម្មទាំងឡាយដែលខុសពីទីលានប្រជាធិបតេយ្យមិនមែនជាការទទួលខុសត្រូវរបស់គាត់ ឬក៏របស់គណបក្សសង្គ្រោះជាតិទេ»។
លោក កឹម សុខា ត្រូវបានចាប់ខ្លួន និងចោទប្រកាន់ពីបទសន្ទិដ្ឋភាពជាមួយរដ្ឋបរទេសឬ ត្រូវរ៉ូវជាមួយបរទេស ដើម្បីផ្តួលរំលំរាជរដ្ឋាភិបាលស្របច្បាប់ ក្រោយពីមានវីដេអូលើបណ្តាញសង្គម ដែលបានបង្ហាញពីការថ្លែងសុន្ទរកថារបស់លោកកាលពីឆ្នាំ ២០១៣ នៅក្នុងកម្មវិធី ១ នៅប្រទេសអូស្ត្រាលី។
ក្នុងវីដេអូនោះ លោក កឹម សុខា បាននិយាយថា លោកមានសាស្ត្រាចារ្យបរទេសល្បីៗ ដូចជា សាស្ត្រាចារ្យនៅសហរដ្ឋ-អាមេរិក ជាដើម ចាំជួយផ្តល់យោបល់ដល់រូបលោកក្នុងការរកវិធីផ្លាស់ប្តូរមេដឹកនាំនៅកម្ពុជា៕
វីដេអូ៖