The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី៖ ​អង្គ​ការ​សុខ​ភាព​ពិភព​លោក​នឹង​បន្ដ​ជួយ​ពង្រឹង​ប្រព័ន្ធ​សុខាភិ​បាល​កម្ពុជា

មន្ត្រី៖ ​អង្គ​ការ​សុខ​ភាព​ពិភព​លោក​នឹង​បន្ដ​ជួយ​ពង្រឹង​ប្រព័ន្ធ​សុខាភិ​បាល​កម្ពុជា

Content image - Phnom Penh Post
លោកស្រី ឱ វណ្ឌឌីន និងលោក Takeshi Kasai ព្រមទាំងមន្ត្រីពាក់ព័ន្ធពេលចុះពិនិត្យនៅសាលាបឋមសិក្សាទួលគោកពីថ្ងៃទី៦ កក្កដា ។ រូបថត ក្រសួងសុខាភិបាល

មន្ត្រី៖ ​អង្គ​ការ​សុខ​ភាព​ពិភព​លោក​នឹង​បន្ដ​ជួយ​ពង្រឹង​ប្រព័ន្ធ​សុខាភិ​បាល​កម្ពុជា

​ភ្នំពេញៈ ​មន្រ្តីជាន់​ខ្ពស់​នៃ​អង្គការ​សុខភាព​ពិភព​លោក​ប្រចាំ​តំបន់​ប៉ាស៊ី​ហ្វិក​ខាង​លិច​លើក​ឡើង​ថា អ​ង្គការនេះ​នឹង​​បន្ត​គាំទ្រ​​កម្ពុជា​ក្នុង​ការ​អនុ​វត្ត​ពង្រឹង​ប្រព័ន្ធ​សុខាភិ​បាល​ និង​ការបណ្តុះ​បណ្តាល​នូវ​ធនធាន​មនុស្ស​ហើយ​ក៏​បាន​កោត​សរសើរ​ម្តង​ហើយ​ម្តង​ទៀត​ ចំពោះ​ប្រមុខ​រាជ​រដ្ឋាភិ​បាល​កម្ពុជា​ក្នុង​ការ​ប្រយុទ្ធ​ប្រឆាំង​នឹង​ជំងឺកូវីដ​ ១៩ ​ជា​ពិសេស​ការងារ​ចាក់​វ៉ាក់​សាំង​បង្ការ​ជំងឺ​នេះ​តែម្ត​ង។

នេះ​ជា​ការ​អះអាង​របស់​លោក​ស្រី ឱ វណ្ណឌីន រដ្ឋ​លេខា​ធិការ​ក្រសួង​សុខា​ភិបាលនិង​ជា​ប្រធាន​គណៈកម្មការ​ចំពោះ​កិច្ច​ចាក់វ៉ាក់​សាំង​កូវីដ​ ១៩​ ក្នុង​ក្របខ័ណ្ឌ​ទូទាំង​ប្រទេស (​គ.វ.ក-១៩)​ ក្នុង​ដំណើរ​ចុះទ​ស្សន​កិច្ចជា​មួយ​លោក Takeshi Kasai ប្រធាន​អង្គការ​សុខ​ភាពពិភព​លោក​ប្រចាំ​តំបន់​ប៉ាស៊ីហ្វិក​ខាង​លិច​នៅសាលា​បឋម​សិក្សា​ទួល​គោក ​ក្នុង​ខណ្ឌ​ទួល​គោក​ កាល​ពី​ថ្ងៃទី ​៦ ​ខែកក្កដា ​។

លោក​ស្រី​មាន​ប្រ​សាសន៍​ថា៖ «លោក​បណ្ឌិត​ Takeshi Kasai ប្រធាន​អង្គការ​សុខភាព​ពិភព​លោក ប្រចាំ​តំបន់​ប៉ាស៊ី​ហ្វិក​ខាង​លិច​បាន​ធ្វើ​ការ​កោត​សរសើរ​នូវភា​ពជា​អ្នកដឹក​នាំ ភាព​ខ្លាំង​របស់​សម្តេច​តេជោក្នុង​ការ​ដឹក​នាំ​
ប្រទេ​ស​និង​ការ​ដឹក​នាំ​ប្រយុទ្ធ​ប្រឆាំង​ជា​មួយ​នឹង​ជំងឺ​កូវីដ ​១៩​ ជាពិសេស​លើកា​រងារ​ស្រោចស្រព​ការ​ចាក់​វ៉ាក់​ការ​ពារ​ជំងឺ​កូវីដ​ ១៩»​។

នា​ឱកាស​នោះលោក Takeshi Kasai ក៏​បាន​បញ្ជាក់​ផង​ដែរ​ថា អង្គ​ការសុខ​ភាព​ពិភព​លោក​នឹង​នៅ​តែ​បន្ត​ជួយ​គាំទ្រ​ដល់​កម្ពុជា​ក្នុង​ការ​អនុវត្ត​ការ​ពង្រឹង​ប្រព័ន្ធ​សុខាភិ​បាល​ក៏ដូចជា​ការបណ្តុះ​បណ្តាលធន​ធាន​មនុស្ស​ផង​ដែរ​។

លោក​ស្រីបាន​បញ្ជាក់​ថា៖ «ជា​ពិសេស នៅ​ក្នុង​នោះ​អង្គការ​សុខ​ភាព​ពិភព​លោក​នឹង​យក​ចិត្ត​ទុក​ដាក់​របស់​ខ្លួន​បន្ថែម​ទៀត​នៅក្នុង​ក្រប​ខ័ណ្ឌ​អនុវត្ត​ការ​ជំរុញ​បង្កើន​ការ​ថែទាំ​សុខភាព​បឋម​នៅក្នុង​ព្រះរា​ជា​ណាចក្រ​កម្ពុជា​ដែល​យើង​​កំពុង​តែ​ចាត់​ចែង​រៀប​ចំ​​ ដោយ​នៅពេល​ខាង​មុខនេះ យើង​មាន​ផែន​ការ​ដាក់​ឱ្យ​អនុវត្ត​នៅក្នុង​រយៈ​ពេល​ដ៏​យូរ​អង្វែង»​។

លោក ​Takeshi Kasai ក៏បាន​ថ្លែងឱ្យ​ដឹងដែ​រថា នៅពេល​ដែល​ប្រជា​ពលរដ្ឋ​ក្នុង​ប្រទេស​មាន​សុខ​ភាព​ល្អ នោះ​​ការអភិវឌ្ឍ​​ក៏​មាន​ចីរ​ភាព ​និង​មាន​ការ​រីក​ចម្រើន​។

លោក​មាន​ប្រសាសន៍​ថា៖​ «ខ្ញុំសូម​អរគុណ​ដល់​មន្រ្តី​សុខាភិ​បាល​ដែល​បាន​ខិត​ខំ​ធ្វើ​ការ​ក្នុង​រយៈ​ជាង​ ២ ឆ្នាំ​កន្លង​មក​នេះ ហើយ​អ្វី​ដែល​ខ្ញុំ​សង្កេត​ឃើញ​គឺ​កម្ពុជា​មា​នការ​​អភិវឌ្ឍ​លឿន​មែនទែ​នផ្នែក​សេដ្ឋកិច្ច មានអគារ​ខ្ពស់​ៗ​ជាច្រើន​»។

ទន្ទឹម​នឹង​នេះ ​លោក​ Takeshi Kasai ក៏​បាន​សរសេរ​លើ​បណ្តាញ​ធ្វីធឺ ​(Twitter) របស់​លោក​ផង​ដែរ​ថា ចាប់​ពីប៉ុស្តិ៍​សុខភាព​តូចៗ​រហូត​ដល់​មណ្ឌល​សុខ​ភាព រហូត​ដល់​មន្ទីរ​ពេទ្យ ហើយ​ការ​ដឹង​គុណដ៏​ខ្ពង់​ខ្ពស់បំផុត​របស់​លោក​គឺ​លោក​សូម​ជូន​ចំពោះ​បុគ្គលិ​កថែទាំ​សុខ​ភាព​ទាំង​អស់ក្នុង​ប្រទេសក​ម្ពុជា។

លោក​បាន​បន្ត​ថា៖ «ការ​លើក​ទឹក​ចិត្ត ការ​ប្តេជ្ញា​ចិត្ត និង​វិជ្ជាជីវៈ​របស់​មន្រ្តី​ថែទាំសុខ​ភាព​ ក្នុង​អំឡុង​ពេលនៃ​ការ​ឆ្លង​រាល​ដាល​ជំងឺ​កូវីដ​១៩​ នឹង​ឈាន​ទៅរក​ផ្លូវដ៏វែង​ឆ្ងាយ​ក្នុងការកែ​លម្អកា​រថែទាំ​សុខភាព​នាពេ​ល​អនា​គត»​។

ទាក់​ទង​នឹង​ការ​អនុវត្ត​​យុទ្ធ​សាស្ត្រ​ពង្រឹង​ការ​គ្រប់គ្រង​ប្រព័ន្ធ​សុខាភិ​បាល​នេះដែ​រ លោក ម៉ម ប៊ុន​ហេង រដ្ឋ​មន្រ្តី​ក្រសួង​សុខា​ភិបាល​ធ្លាប់​បាន​លើក​ឡើង​កាល​ពី​ខែមុន​ថា ក្រសួង​សុខាភិ​បាល​កំពុង​ពង្រីក​ការ​​គ្រប​ដណ្តប់​និង​លើក​កម្ពស់​គុណ​ភាព​សេវា​សុខាភិ​បាល​នៅ​ទូទាំង​ប្រទេស ដោយ​ក្នុង​នោះ​ក្រសួង​បានពង្រីក​និង​សាង​សង់​មន្ទីរ​ពេទ្យ ​មណ្ឌល​សុខ​ភាព ​នៅ​តាម​បណ្តា​ខេត្ត​ជា​ច្រើន​ផង​ដែរ​៕

អត្ថបទគួរចាប់អារម្មណ៍