កំពង់ឆ្នាំៈ ផ្ទះចំនួន ១៥០ ខ្នង ដែលជាអំណោយរបស់លោកនាយករដ្ឋមន្ត្រី ហ៊ុន សែន កំពុងត្រូវបានសាងសង់ជូនគ្រួសារអតីតយុទ្ធជនស្ថិតនៅភូមិអូរកាខុប (ហៅភូមិសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន) ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង។
លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ក្នុងពិធីដឹកនាំក្រុមការងារ ចុះពិនិត្យ និងពន្លឿនការសាងសង់នៅ ថ្ងៃទី ១០ ខែ កក្កដា ឆ្នាំ ២០២២ បានឱ្យដឹងថា ការសាងសង់ជំហានទី១ នេះ គឺត្រូវសាងសង់ផ្ទះអតីតយុទ្ធជនចំនួន ៥០ ខ្នងជាមុនសិន ដែលគិតមកដល់បច្ចុប្បន្ននេះ សាងសង់សម្រេចបានចំនួន ១០ ខ្នងហើយ។
លោក អម សុភា អភិបាលរងខេត្តកំពង់ឆ្នាំង ប្រាប់ ភ្នំពេញ ប៉ុស្តិ៍ នៅថ្ងៃទី ១០ ខែកក្កដាថា អតីតយុទ្ធជនត្រូវបានជ្រើសរើស ដើម្បីប្រគល់ផ្ទះនេះ បានជាង ១០០ នាក់ហើយ។ បច្ចុប្បន្ន ក្រុមការងារកំពុងពន្លឿនការសាងសង់ ទាំងហេដ្ឋារនាសម្ព័ន្ធ និងផ្ទះ ដើម្បីធ្វើយ៉ាងណា ឱ្យចប់ទៅតាមផែនការ ដែលបានគ្រោងទុក ។
លោកបន្តថា ក្នុងការពន្លឿនការសាងសង់នេះ អភិបាលខេត្តកំពង់ឆ្នាំង តែងតែចុះពិនិត្យ និងពន្លឿនការសាងសង់ ហើយរាល់ការចំណាយ ជាបន្ទុករបស លោក គន់ គីម អគ្គលេខាធិការ សមាគមអតីតយុទ្ធជនកម្ពុជាដោយទទួលបានជំនួយពីសម្បុរសជននានា។
លោកថ្លែងថា៖ «យើងជ្រើសរើស អតីតយុទ្ធជនរួចហើយ នៅពេលសាងសង់រួច យើងនឹងរៀបចំធ្វើការចាប់ឆ្នោតរើសលំនៅឋាន នីមួយៗ។ នៅក្នុងផ្ទះមួយ មានចង្ក្រានបាយ មានបន្ទប់អានាម័យ ផ្ទះស្នាក់នៅ និងរៀបចំហេដ្ឋារចនាសម្ព័ន្ធផ្លូវ ចូលទៅក្នុងផ្ទះ»។
លោក គន់ គីម អគ្គលេខាធិការសមាគមអតីតយុទ្ធជនកម្ពុជា ថ្លែងកាលពីដើមឆ្នាំ ២០២២ ថា អតីតយុទ្ធជននៅទូទាំងប្រទេសកម្ពុជា មានប្រមាណជិត ១០ ម៉ឺននាក់ ដោយក្នុងនោះ អ្នកដែលគ្មានផ្ទះ និងដីមានប្រមាណជាង ៧ ០០០ គ្រួសារ ប៉ុន្តែក្នុងរយៈពេល ១០ ឆ្នាំមកនេះ សមាគមបានសាងសង់ផ្ទះជូនពួកគាត់បានជិត ៥ ០០០ គ្រួសារហើយ។
លោកបន្តថា នៅសល់អតីតយុទ្ធជន ប្រមាណជាង ៣ ពាន់ខ្នងផ្ទះទៀត ដែលនឹងត្រូវសាងសង់ជូនជាបន្តបន្ទាប់ទៀត ដោយទទួលបានជំនួយថវិកាពីលោកនាយករដ្ឋមន្ត្រី ហ៊ុន សែន និងសប្បុរសជននានា៕