ភ្នំពេញៈ តំណាងអយ្យការអមសាលាដំបូងរាជធានីភ្នំពេញ បន្តសួរដេញដោលលោក កឹម សុខា អតីតប្រធាន នៃអតីតគណបក្សសង្គ្រោះជាតិ ដែលត្រូវបានចោទពីបទសន្ទិដ្ឋភាពជាមួយរដ្ឋបរទេស ឬត្រូវរ៉ូវជាមួយបរទេស ដើម្បីផ្តួលរំលំរាជរដ្ឋាភិបាលស្របច្បាប់ ពាក់ព័ន្ធនឹងវីដេអូ ដែលបង្ហាញអំពីការរៀបចំបាតុកម្ម និងការបង្រៀនដល់បាតុករអំពីរបៀបនៃការតវ៉ានៅទីលានប្រជាធិបតេយ្យ។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់ ភ្នំពេញ ប៉ុស្តិ៍ ក្រោយពីបញ្ចប់សវនាការបន្តនៅថ្ងៃទី ១៣ កក្កដា យ៉ាងខ្លីថា សវនាការលើកនេះ បន្តសាកសួររឿងវីដេអូ ដែលបង្ហាញអំពីការរៀបចំបាតុកម្ម ការបង្រៀនដល់បាតុករអំពីរបៀបនៃការតវ៉ា ដែលដឹកនាំដោយជនជាប់ចោទ និងថ្នាក់ដឹកនាំអតីតគណបក្សសង្រ្គោះជាតិ ដើម្បីតវ៉ាប្តូរអ្នកដឹកនាំ។
លោក ចាន់ ចេន សហមេធាវីរបស់លោក កឹម សុខា ប្រាប់ក្រុមអ្នកសារព័ត៌មាន នៅខាងមុខសាលាដំបូងរាជធានីភ្នំពេញថា តំណាងអយ្យការបានចាក់វីដេអូ បង្ហាញពីការធ្វើបាតុកម្មនៅទីលានប្រជាធិបតេយ្យ ដែលនៅក្នុងវីដេអូនោះ លោក កឹម សុខា បាននិយាយថា បន្ទាប់ពីជួបជាមួយនឹងបងប្អូនប្រជាពលរដ្ឋ គាត់នឹងទៅជួបទូតមហាអំណាចមួយ។
លោកបន្តថា តំណាងអយ្យការ ក៏បានសួរដេញដោលពីបញ្ហានេះថា តើជួបទូតមហាអំណាចមួយណា? លោក កឹម សុខា ឆ្លើយថា បណ្តាទូតទាំងអស់ ដែលដាក់នៅកម្ពុជា គឺជាមិត្តរបស់កម្ពុជា មិនមែនជាសត្រូវរបស់កម្ពុជានោះទេ ចាប់តាំងពីថ្ងៃទី ២៣ ខែ តុលា ឆ្នាំ ១៩៩១ នៃកិច្ចព្រមព្រៀងទីក្រុងប៉ារីស។ បណ្តាមិត្តអង្គទូតទាំងនេះ តែងតែជួយដល់កម្ពុជា។
លោកថ្លែងថា៖ «អង្គទូតទាំងនោះគេមកជួយកម្ពុជា មិនមែនជាសត្រូវរបស់កម្ពុជា ប៉ុន្តែដើម្បីថែរក្សាមុខមាត់របស់អង្គទូត ឯកឧត្តម កឹម សុខា គាត់មិនបានបញ្ជាក់ថា ទូតឈ្មោះអ្វី ដែលជួបជាមួយគាត់ទេ»។
ទោះជាយ៉ាងណា លោក ចាន់ ចេន បញ្ជាក់ថា លោក កឹម សុខា ក្តី ប្រជាពលរដ្ឋក្តី និងអ្នកនយោបាយក្តី ដែលបានជួបជាមួយបណ្តាអង្គទូត មិនដែលមានច្បាប់ណាមួយបានហាមប្រាមនោះទេ។
បើតាមលោកមេធាវីរូបនេះ ក្នុងអង្គសវនាការ លោកបានសង្កេតឃើញតំណាងអយ្យការ បានតាំងសំណួរយ៉ាងក្តៅគគុក ចោទសួរមកលើកូនក្តីរបស់លោក ដែលហាក់បីដូចជាគ្រប់រឿងទាំងអស់ ទម្លាក់មកលើកូនក្តីរបស់លោក ដូចគេនិយាយលេងថា «គុយទាវ ១ តុ ឱ្យម៉ុកចេញលុយតែឯង»។
ទោះជាយ៉ាងណា លោកបញ្ជាក់ទៀតថា លោក កឹម សុខា បានឆ្លើយបញ្ជាក់ថា ទាំងអតីតកាល ទំាងបច្ចុប្បន្នកាល និងទាំងអនាគតកាល គឺលោក កឹម សុខា ធ្វើកិច្ចការងារក្នុងក្របខ័ណ្ឌអហិង្សា និងសន្តិវិធី។ ជាពិសេសចូលរួមបោះឆ្នោតស្របទៅតាមច្បាប់ជាតិ និងអន្តរជាតិ ដោយមិនចូលរួមធ្វើអំពើហិង្សា ឬបដិវត្តន៍ពណ៌ ឬក៏ផ្តួលរំលំដូចការចោទប្រកាន់នោះទេ។
សវនាការ លោក កឹម សុខា បន្តទៀត នឹងធ្វើនៅថ្ងៃទី ២០ ខែ កក្កដា ឆ្នាំ ២០២២៕