ភ្នំពេញៈជំនន់ទឹកភ្លៀង ដែលកើតឡើងនៅតាមបណ្តាខេត្តមួយចំនួនដោយ​សារ​តែ​មាន​ភ្លៀងខ្លាំង​ក្នុង​រយៈ​ពេល​ប៉ុន្មានថ្ងៃ​កន្លង​មក​នេះ​ បាន​ធ្វើឱ្យមានផល​ប៉ះពាល់ខ្លះៗដល់​ការ​រស់នៅ​របស់ប្រជា​ពល​រដ្ឋ​ ប៉ុន្តែ ​មិន​ធ្ងន់​ធ្ងរនោះទេ ​ខណៈ​ដែល​ទឹកបាន​ស្រកទៅវិញ​ នៅ​ពេល​ដែល​ស្ថានភាពអាកាសធាតុ​បាន​ចាប់ផ្តើមធូរស្រាលវិញ។ នេះបើតាមលោក ចាន់ យុត្ថា អ្នកនាំពាក្យក្រសួងធន ធានទឹក និងឧតុនិយម ប្រាប់ ភ្នំពេញ ប៉ុស្តិ៍ នៅថ្ងៃទី ១៣ ខែកក្កដា។

រដ្ឋលេខាធិការ និងជាអ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានបញ្ជាក់ថា គិតត្រឹមរសៀលថ្ងៃទី ១៣ ខែកក្កដា ស្ថានភាពជំនាន់ទឹកភ្លៀង ដែលកើតឡើងនៅតាមបណ្តាខេត្តមួយចំនួន បានស្រកទៅវិញហើយ ដូចជា​នៅស្រុកកែវ​សីមា​ខេត្តមណ្ឌលគិរី​ ស្រុកសំឡូត ខេត្តបាត់ដំបង មានការប៉ះពាល់បន្តិចបន្ទួច ក៏បានស្រកផុតទៅវិញហើយដែរ។

ចំណែកនៅខេត្ត​ព្រះវិហារ មានរអិលថ្មធ្លាក់លើផ្លូវឡើងប្រាសាទព្រះវិហារ រីឯនៅខេត្តបន្ទាយមានជ័យ គ្រាន់តែមាន​ការ​គំរាម​កំហែង​ដោយ​សារភ្លៀងធ្លាក់ច្រើននៅក្រុងសំរោង ប៉ុន្តែ​អាជ្ញាធរ​នៅ​តាម​ខេត្ត​ទាំង​នោះ បានកាយ​ទឹក​ពង្វៀង​ និងមិន​មាន​បញ្ហាអ្វីធំដុំនោះទេ។

លោកបន្តថា​ នៅខេត្តកោះកុង ក៏មានការប៉ះពាល់បន្តិចបន្តួចផងដែរ ខណៈខេត្តព្រះសីហនុ មានការបិទផ្លូវមួយរយៈពេលខ្លី ប៉ុន្តែ​ទឹកបានស្រកទៅវិញ ហើយចរាចរណ៍បានដំណើរការធម្មតាឡើងវិញ ។

លោកថ្លែងថា៖«អត់មានអ្វីប៉ះពាល់ធំដុំទេ គ្រាន់តែជាការរំខានដល់ជីវភាពរស់នៅរបស់ប្រជាពលរដ្ឋ​យើង ក្នុងមួយរយៈពេលខ្លី ហើយវាបានស្រកទៅវិញហើយ រឿងបញ្ហាប៉ះពាល់ដល់អាយុជីវិតប្រជាពលរដ្ឋ​ក៏អត់មានដែរ។ ស្ថានភាពអាកាសធាតុ វាអាប់អួរ​ ១ ថ្ងៃនេះទៀត ហើយចាប់ពីស្អែកទៅ វាចាប់ផ្តើមធូរស្រាលវិញហើយ»។

​ថ្លែងក្នុងវេទិការជាតិស្តីពី ការកាត់បន្ថយហានិភ័យគ្រោះមហន្តរាយ លើកទី២៩ ធ្វើឡើងនៅថ្ងៃទី ១៣ ខែ​កក្កដា លោកទេស​រដ្ឋមន្ត្រី គន់ គីម អនុប្រធានទី១ គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ បានឱ្យដឹងថា គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ មិនបានចុះផ្ទាល់ដល់ទីតាំងដែលមានជំនាន់ទឹកភ្លៀងជន់លិចនៅឡើយ ដោយសារតែលេខាធិការដ្ឋាន របស់​ខេត្តក្រុង មិនទាន់សំណូមពរ ដល់កងអន្តរាគមន៍ នៃ​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ ក៏ដូចជាសំណូមពរស្នើ ឱ្យថ្នាក់ជាតិ​ចុះ​ជួយអន្តរាគមន៍​នៅ​ឡើយ។

លោកថ្លែងថា៖ «​ឥឡូវនេះតាមការព្យាករ របស់ក្រសួងជំនាញគិតថា ពីម៉ោងនេះរហូតដល់ថ្ងៃ ១៩ នឹងមានខ្យល់ ព្យុះ ភ្លៀង កន្ត្រាក់ ជាបន្តបន្ទាប់តទៅទៀត ដូចច្នេះ គ្រប់លេខាធិការដ្ឋាន​ នឹងធ្វើការតាមដានតាមគេហទំព័រ របស់ខេត្តក្រុងរបស​យើង​ដើម្បី​ដឹកនាំបន្ត» ។

លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានឱ្យដឹងថា មកដល់វេលាព្រឹក ថ្ងៃទី ១៣ ខែកក្កដា កម្រិតជំនន់ទឹក​ភ្លៀងបានថយចុះ ​ស្រកផុតពីកំណាត់ផ្លូវជាតិលេខ ៤ ចន្លោះគីឡូម៉ែត្រលេខ ១១៥-១១៦ ស្ថិតក្នុងភូមិស្ទឹងសំរោង ឃុំអូរបាក់​រទេះ ស្រុកកំពង់សិលា ខេត្តព្រះសីហនុ ដែលបានជន់លិចកាលពី​ថ្ងៃទី ១២ ខែកក្កដា។

ដូចនេះ រដ្ឋបាលខេត្តព្រះសីហនុ អនុញ្ញាតឱ្យយានយន្តគ្រប់ប្រភេទចរាចរឆ្លងកាត់កំណាត់ផ្លូវជាតិលេខ ៤ ត្រង់​ចំណុចនោះ ឡើង​វិញ​ហើយ។

លោក ហេង សុភណ្ឌរិទ្ធ ប្រធាន​មន្ទីរ​ធនធានទឹក និង​ឧតុនិយម ខេត្ត​ព្រះសីហនុ​បានឱ្យដឹងថា ទឹកជំនន់ដែលកើត​ឡើង​នៅស្រុក​កំពង់សិលា មិនមានប៉ះពាល់ដល់ប្រជាពលរដ្ឋ ឬធ្វើ​ឱ្យ​ខូច​ដំណាំដាំដុះ ស្រូវ​ស្រែចម្ការ និងសត្វនោះទេ ដោយសារទឹក​លិចមាន​សភាពយឺត។

លោក ហាក់ ឡេង អភិបាលស្រុកបទុមសាគរ បានឱ្យដឹងនៅថ្ងៃទី ១៣ ខែកក្កដាថា ភ្លៀងធ្លាក់ជាច្រើន នៅថ្ងៃទី ១២ ខែកក្កដា បណ្តាលឱ្យ​ជនលិច​ផ្ទះ​ប្រជាពលរដ្ឋចំនួន ១៨ ខ្នង ​និងបាត់មាន់ទាចំនួន ​១៦០ ក្បាល និងសម្ភារមួយចំនួន ស្ថិតនៅភូមិព្រលាន​ ឃុំកណ្តោល ស្រុក​បទុមសាគរ​​ ខេត្តកោះកុង ។

យ៉ាងណាក្តី ក្រសួងធនធានទឹកបញ្ជាក់នៅថ្ងៃទី ១៣ ខែកក្កដាថា ខេត្តកោះកុងមាន ជំនន់ទឹកភ្លៀង​បានបណ្តាលឱ្យដាច់ផ្លូវ​លំជនបទ ១ កន្លែង ស្ថិតនៅក្នុងភូមិព្រះអង្គកែវ ឃុំដងពែង ស្រុកស្រែអំបិល។

លោក សឿម ប៊ុនរិទ្ធិ អភិបាលរង និងជាអ្នកនាំពាក្យរដ្ឋបាលខេត្តបាត់ដំបង​បាន​ឱ្យដឹង​ថា ភ្លៀងធ្លាក់ខ្លាំងធ្វើឱ្យទឹកឡើងលិច​កន្លែង​ខ្លះ​នៅស្រុករុក្ខគិរី ប៉ុន្តែមិនមានអ្វីគួរកត់សម្គាល់ទេ។

យ៉ាងណាក្តី អាជ្ញាធរបានផ្សព្វផ្សាយ និងជូនដំណឺងដល់​ប្រជាពលរដ្ឋ​ឱ្យមាន​ការ​ប្រុងប្រយ័ត្ន​។

ដោយឡែកនៅស្រុកផ្សេងៗទៀត ក្នុង​ខេត្តបាត់ដំបង ក៏មិនមានស្រុកណាមួយ​ មានបញ្ហាធ្ងន់ធ្ងរដោយសារទឹក​ជំនាន់នោះដែរ សូម្បីទឹកស្ទឹងសង្កែទឹកនៅពាក់កណ្តាលស្ទឹងនៅឡើយ។

ចំណែក​លោក ចាន់ វណ្ណា ប្រធានមន្ទីរធនធានទឹក និងឧតុនិយម ខេត្តកំពត បានឱ្យដឹងថា ក្នុង​រយៈ​ពេល​ប៉ុន្មាន​ថ្ងៃ​កន្លង​មក​នេះ ភ្លៀងធ្លាក់ទូទាំងខេត្តកំពត ប៉ុន្តែមិនមានបញ្ហា​អ្វីចោទនោះទេ។

​តំបន់ទំនាបតាមស្រុកមួយចំនួន មានការលិចដោយកន្លែង និងមិនទាន់មានបញ្ហាជនលិចដោយទឹកហូរពីកំចាយ ឬផ្លូវជាតិលេខ ៤ នោះទេ។

លោកបញ្ជាក់ថា ​នៅយប់ថ្ងៃទី ១២ ទំនប់ទ្វារទឹកវារីអគ្គិសនី​កំចាយបានបើក ៤ ទ្វារទឹក ប៉ុន្តែមកដល់ថ្ងៃទី ១៣ ខែកក្កដា បិទ ១ ទ្វារវិញ ដែល​ការបិទនេះដោយសារទឹកក្នុងអាងមានការឡើងយឺត។

លោក ធាង ឡេង អធិការនគរបាលស្រុកវាលវែង ថ្លែងនៅថ្ងៃទី ១៣ ខែកក្កដាថា ករណីភ្លៀងខ្លាំងធ្វើឱ្យទឹកហូរច្រោះ​ដីភ្នំបាក់​ធ្លាក់លើផ្លូវជាតិ លេខ ៥៥ ស្ថិតនៅទីតាំងភូមិសាស្រ្ត ឃុំប្រមោយ ស្រុកវាលវែង ត្រូវបានកាយចេញវិញដោយគ្រឿងចក្រ និង​អាចធ្វើដំណើរបានធម្មតាវិញតាំងពីម៉ោង ១០ និង ៣០ នាទីយប់ថ្ងៃទី ១២ ខែកក្កដា។

លោកបញ្ជាក់ថា តាមការពិនិត្យ​ជាក់ស្តែងនៅព្រឹកថ្ងៃទី ១៣ ខែកក្កដា ឃើញថា មិនមានអ្វីជាឧបសគ្គក្នុងការធ្វើដំណើរទៀតទេ៕

វីដេអូ៖