.jpg)
សម្មភាពមន្ត្រីស៊ីម៉ាកចុះយកគ្រាប់យុទ្ធភណ្ឌមិនទាន់ផ្ទុះក្នុងទឹកនៅខេត្តព្រៃវែង កាលពីខែមុន។ រូបថត ស៊ីម៉ាក
ព្រៃវែងៈ ក្រុមប្រតិបត្តិករយកគ្រាប់យុទ្ធភណ្ឌមិនទាន់ផ្ទុះនៅក្រោមទឹកបាននិងកំពុងពន្លឿនការយកគ្រាប់ចេញពីនាវាដែលលិចក្នុងទន្លេមេគង្គ នៅចំណុចភូមិពាមរាំង ឃុំពាមរាំង ស្រុកពាមជរ ខេត្តព្រៃវែង ដើម្បីសុវត្ថិភាពជូនប្រជាពលរដ្ឋនៅក្នុងតំបន់នេះ បើទោះបីមានបញ្ហាប្រឈមខ្លះក៏ដោយ។
លោក ហេង រតនា អគ្គនាយកស៊ីម៉ាក់ប្រាប់ ភ្នំពេញ ប៉ុស្តិ៍នៅថ្ងៃទី ១៤ ខែកក្កដាថា ទោះបីមានបញ្ហាប្រឈមយ៉ាងណាក្តី គឺមិនអាចទុកសំណល់យុទ្ធភណ្ឌសង្គ្រាមក្រោមទឹកទាំងនោះឱ្យក្លាយជាបញ្ហាប្រឈមនឹងសុខសុវត្ថិភាពរបស់ប្រជាជន និងការអភិវឌ្ឍសេដ្ឋកិច្ចជាតិបន្តទៀតទេ ។
លោកបានបន្តថា ការប្រឈមនិងឧបសគ្គនានាក្នុងការបោសសម្អាតសំណល់យុទ្ធភណ្ឌសង្គ្រាម ក្រោមទឹក មិនមែនសុទ្ធតែគ្មានដំណោះស្រាយនោះទេ តែក៏ត្រូវខិតខំដោះស្រាយទាល់ឱ្យតែបាន ខណៈគ្រាប់យុទ្ធភណ្ឌទាំងនោះស្ថិតនៅកប់ល្បាប់ដីខ្សាច់ក្រោមទឹកជាង ៥០ ឆ្នាំទៅហើយ តែនៅមានប្រសិទ្ធភាព ។
លោកថ្លែងថា៖ «ការយកគ្រាប់ចេញពីនាវាដែលលិចនៅក្នុងទន្លេមេគង្គ មិនងាយស្រួលដូចការយកគ្រាប់នៅលើគោកនោះទេ ព្រោះវាជាតំបន់ទឹកក៏ហូរគ្រាប់ក៏កប់នៅក្នុងខ្សាច់ យើងត្រូវបូមចេញហើយបច្ចេកទេសនៃការទប់ទល់នឹងទឹកហូរខ្លាំងក៏មានការលំបាក។ ទោះបីយ៉ាងណា យើងខិតខំដោះស្រាយបាន»។
បើតាម លោក ហេង រតនា ប្រតិបត្តិការយកគ្រាប់ចេញពីនាវាដែលលិចចន្លោះឆ្នាំ ១៩៧០-១៩៧៥ នៅតែបន្តរហូតដល់ចប់ និងធ្វើឱ្យតំបន់នេះមានសុវត្ថិភាពទាំងស្រុង ព្រោះនេះ ជាគោលការណ៍របស់រាជរដ្ឋាភិបាល ដើម្បីធ្វើយ៉ាងណាឱ្យប្រទេសកម្ពុជាមានសុវត្ថិភាពទាំងនៅក្នុងទឹក និងនៅលើគោក។
លោក សេង ធា អភិបាលស្រុកពាមជរ ខេត្តព្រៃវែងថ្លែងថា លោកស្វាគមន៍ចំពោះកិច្ចខិតខំប្រឹងប្រែងរបស់អង្គភាពស៊ីម៉ាក់ និងក្រសួងការពារជាតិដែលបានខិតខំប្រឹងប្រែងយកគ្រាប់ចេញពីក្នុងទន្លេនេះដើម្បីសុវត្ថិភាពជូនដល់ប្រជាពលរដ្ឋ និងកុំឱ្យមានភាពភ័យខ្លាចក្នុងការចុះទៅធ្វើនេសាទ និងយកទឹកមកប្រើប្រាស់ប្រចាំថ្ងៃ។
លោកបានបញ្ជាក់ថា៖ «ក្នុងនាមអាជ្ញាធរ ខ្ញុំពិតជាពេញចិត្តចំពោះការយកចិត្តទុកដាក់របស់ពួកស៊ីម៉ាក់ សហការជាមួយរាជរដ្ឋាភិបាល មិនគិតពីការនឿយហត់ និងការលំបាកក្នុងការយកគ្រាប់យុទ្ធភណ្ឌមិនទាន់ផ្ទុះចេញពីបាតទន្លេ កុំឱ្យពលរដ្ឋគាត់ទៅរកត្រី ឬនេសាទមានបញ្ហា»។
លោកនាយករដ្ឋមន្ត្រី ហ៊ុន សែន កាលពីថ្ងៃទី ២៨ ខែ សីហា ឆ្នាំ ២០២០ បានបង្កើតក្រុមការងារអន្តរក្រសួងដើម្បីចុះសិក្សា និងដោះស្រាយករណីរកឃើញគ្រាប់យុទ្ធភណ្ឌមិនទាន់ផ្ទុះក្នុងនាវាដែលលិចក្នុងទន្លេ ស្ថិតនៅភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ។
ក្រោយបញ្ចប់នៅទីតាំងខាងលើនេះ កាលពីថ្ងៃទី ២៦ ខែ មករា ឆ្នាំ ២០២១ លោកនាយករដ្ឋមន្ត្រីបានសម្រេចបន្ថែមសមាសភាពសមាជិកក្រុមការងារនេះ ដើម្បីយកគ្រាប់យុទ្ធភណ្ឌមិនទាន់ផ្ទុះពីក្នុងទឹកក្នុងតំបន់មួយចំនួនទៀត រួមមាន ស្រុកល្វាឯម និងស្រុកខ្សាច់កណ្ដាល ខេត្តកណ្ដាល និងស្រុកពាមជរ ស្រុកពាមរក៍ ខេត្តព្រៃវែង៕
