សៀមរាបៈ មន្ត្រីជាន់ខ្ពស់នៃក្រសួងព័ត៌មានបានជំរុញឲ្យអ្នកដឹកនាំក្នុងវិស័យសារព័ត៌មាន និងប្រព័ន្ធផ្សព្វផ្សាយត្រូវសម្របខ្លួនឲ្យទាន់ការវិវឌ្ឍនៃបច្ចេកវិទ្យា ខណៈបច្ចុប្បន្ននេះចរន្តនៃការរីកចម្រើនលើផ្នែកវិទ្យាសាស្ត្រនិងបច្ចេកវិទ្យា ក្នុងយុគសម័យបដិវត្តន៍ឧស្សាហកម្មជំនាន់ទី៤ បានក្លាយទៅជាកត្តាគន្លឹះមួយកំណត់នូវនិន្នាការវិវឌ្ឍនៃសេដ្ឋកិច្ច និងសង្គមជាមួយនឹងការបង្កើតឡើងទាំងកាលានុវត្តភាព និងទាំងបញ្ហាប្រឈមសម្រាប់សកលលោកទាំងមូល។
លោក ផុស សុវណ្ណ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានព័ត៌មាន និងសោតទស្សន៍ បានថ្លែងក្នុងពិធិបើកសិក្ខាសាលាស្តីពី«ភាពជាអ្នកដឹកនាំប្រព័ន្ធផ្សព្វផ្សាយក្នុងយុគសម័យបដិវត្តន៍ឧស្សាហកម្ម ៤.០» នៅថ្ងៃទី ១៤ ខែ កក្កដា ឆ្នាំ២០២២ នៅសណ្ឋាគាសុខា ខេត្តសៀមរាបថា បច្ចេកវិទ្យាទាំងនេះបានធ្វើឲ្យមានការផ្លាស់ប្តូរយ៉ាងលឿននៅក្នុងល្បឿនមួយដែលមិនធ្លាប់មានពីមុនមក និងបានផ្តល់ឱកាសឲ្យប្រព័ន្ធផ្សព្វផ្សាយមានលទ្ធភាពបង្កើនផលិតភាពរបស់ខ្លួន ប្រសិទ្ធភាពការងារ និងគុណភាពនៃផលិតកម្មដូចជា រូបភាព សំឡេង និងល្បឿន និងកាត់បន្ថយនូវការចំណាយលើថ្លៃដើមនៃការផលិត។ លើសពីនេះ បច្ចេកវិទ្យាបានជំរុញ និងលើកទឹកចិត្តឲ្យមានគំនិតច្នៃប្រឌិត និងធ្វើឲ្យមានភាពសម្បូរបែបក្នុងឧស្សាហកម្មប្រព័ន្ធផ្សព្វផ្សាយ និងកម្សាន្ត។
លោកថ្លែងថា៖ «ឌីជីថលលូបនីយកម្មនៃប្រព័ន្ធផ្សព្វផ្សាយបានផ្តល់នូវឱកាសជាច្រើនស្ថាប័នប្រព័ន្ធផ្សព្វផ្សាយនិងអ្នកសារព័ត៌មានបានប្រឈមនឹងបញ្ហាមួយចំនួនផងដែរ ដូចជា បញ្ហាហិរញ្ញវត្ថុ ការបាត់បង់ការងារ ការទាមទារឲ្យអ្នកសារព័ត៌មានមានកម្រិតអប់រំនិងជំនាញខ្ពស់ ការកើនឡើងនៃព័ត៌មានក្លែងក្លាយ និងឧក្រិដ្ឋកម្ម ឬបទល្មើសពាក់ព័ន្ធនឹងបច្ចេកវិទ្យាព័ត៌មាន»។
លោកបានជំរុញឲ្យអ្នកដឹកនាំក្នុងវិស័យសារព័ត៌មាននិងប្រព័ន្ធផ្សព្វផ្សាយត្រូវសម្របខ្លួនឲ្យទាន់ការវិវឌ្ឍនៃបច្ចេកវិទ្យានេះ ដោយត្រូវមានសមត្ថភាពជាមូលដ្ឋានក្នុងការដឹកនាំដូចជា ការសម្រេចចិត្តរហ័ស ការកសាង និងពង្រឹងសមត្ថភាពក្រុមការងារ និងការពង្រឹងគុណភាពព័ត៌មានជាដើម ដើម្បីឲ្យអង្គភាពសារព័ត៌មានខ្លួនអាចរស់រាន និងឈរជើងបានក្នុងទីផ្សារ។
បើតាមលោក ផុស សុវណ្ណ ទន្ទឹមនេះ អ្នកដឹកនាំក្នុងវិស័យសារព័ត៌មានត្រូវបង្កើតគំរូអាជីវកម្មថ្មី (Business Model) ប្រកបដោយការច្នៃប្រឌិត ស្វែងយល់បន្ថែមពីតម្រូវការអតិថិជន និងប្រើប្រាស់នូវការគ្រប់គ្រងបែបថ្មី ខណៈគំរូនិងការអនុវត្តនៃភាពជាអ្នកដឹកនាំបែបប្រពៃណី ត្រូវបានគេឈប់យកមកប្រើទៀតហើយ ដោយត្រូវជំនួសវិញនូវរចនាសម្ព័ន្ធនៃភាពជាអ្នកដឹកនាំ (Leadership Structure) និងលក្ខណៈរបស់អ្នកដឹកនាំថ្មី (Leader Characteristics)។
លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា (ស.ស.ស.ក) ប្រាប់ ភ្នំពេញ ប៉ុស្តិ៍ នៅថ្ងៃទី ១៤ ខែកក្កដា ដោយទទួលស្គាល់ថា បច្ចេកវិទ្យានាពេលបច្ចុប្បន្ននេះបាននិងកំពុងដើរតួនាទីយ៉ាងសំខាន់លើគ្រប់វិស័យរួមទាំងវិស័យសារព័ត៌មានផងដែរ។ជាមួយគ្នានេះសារព័ត៌មានកាសែតក៏កំពុងចាប់យកបច្ចេកវិទ្យា និងច្នៃប្រឌិតទៅលើការប្រើប្រាស់ប្រព័ន្ធឌីជីថលនៅក្នុងវិស័យនេះ ផងដែរ ។
លោកថ្លែងថា៖ «សារព័ត៌មានក៏គេកំពុងប្រែក្លាយទៅជាកូនកាត់ស្ទើរតែទាំងអស់ហើយ ទូរទស្សន៍ឥឡូវ គេផ្សព្វផ្សាយទាំងបណ្តាញសង្គមផង និងទាំងអង់តែនផង។ កាសែតហ្នឹង ក៏ខ្លួនឯង បោះពុម្ពផង ធ្វើវីដេអូផង និងធ្វើអនឡាញផង ហើយវិទ្យុក៏កំពុងធ្វើអ៊ីចឹងដូចគ្នាដែរ។ អ៊ីចឹងមានន័យថា យើងកំពុងតែចាប់យកបច្ចេកវិទ្យា និងសម្របខ្លួនលើកិច្ចការហ្នឹងហើយ»។
ទោះជាយ៉ាងណា លោកថា អ្វីដែលជាបញ្ហាប្រឈមពាក់ព័ន្ធនឹងការសម្របខ្លួនទៅនឹងបច្ចេកវិទ្យានេះ គឺទីផ្សារដែលធ្វើឱ្យប៉ះពាល់ធំដល់ដំណើការឧស្សាហកម្មសារព័ត៌មាននោះគឺក្នុងដំណើការប្រតិបត្តិការ ដើម្បីឲ្យមាននិរន្តរភាពទៅមុខយូរអង្វែង៕