ព្រះសីហនុៈ លោក ឡុង ឌី​ម៉​ង អភិបាលរង​ខេត្ត​ព្រះសីហនុ បាន​ថ្លែងអំណរគុណ​ចំពោះ​ក្រសួងបរិស្ថាន និង​អង្គការ​អភិវឌ្ឍន៍ ឧស្សាហកម្ម សហប្រជាជាតិ ដែល​បានជ្រើសរើស​ខេត្ត​ព្រះសីហនុ ជាទី​តាំង​គោលដៅ​នៃ​ការសិក្សា​វាយតម្លៃ​តម្រូវការ​បច្ចេកវិទ្យា និងផែនការ​សកម្មភាព​ដើម្បី​គាំទ្រ​ដល់​ការអនុវត្ត​បច្ចេកវិទ្យា​មេត្រីភាព​បរិស្ថាន​។ លោក ក៏បាន​ថ្លែងអំណរគុណ​ដល់​មូលនិធិ​អាកាសធាតុ​បៃតង ដែល​បាន​គាំទ្រ​ហិរញ្ញវត្ថុ​ដល់​គម្រោង​ដ៏​មាន​សារៈសំខាន់ និង​មានតម្លៃ​ផ្នែក​សង្គម និង​សេដ្ឋកិច្ច​នេះ​។​

​លោក​បានឱ្យដឹងថា ខេត្ត​ព្រះសីហនុជា​ប៉ូល​អភិវឌ្ឍ​ជាតិ​ប្រកបដោយ​ចីរភាព នៅ​តំបន់​ឆ្នេរសមុទ្រ​កម្ពុជា តាមរយៈ​ការអភិវឌ្ឍ​ទីក្រុង​ទំនើប រមណីយដ្ឋាន​ឆ្នេរសមុទ្រ​ដែល​ស្អាត​បំផុត​លើ​សកលលោក និង​ជា​តំបន់​សេដ្ឋកិច្ច​ពិសេស​គំរូ​ពហុ​បំណង ច្រកចេញចូល​អន្តរជាតិ មជ្ឈមណ្ឌល​កំណើន​ជាតិ មជ្ឈមណ្ឌល​ភ័ស្តុភារ​ធម្មជាតិ ដោយមាន​ទំនាក់ទំនង​ជាមួយ​ទីផ្សារ​អាស៊ាន និង​ទីផ្សារ​សកលលោក និង​ជា​មជ្ឈមណ្ឌល​ឧស្សាហកម្ម ផលិតកម្ម​បែប​បច្ចេកវិទ្យា​ទំនើប ដែលមាន​សុខដុម​នីយកម្ម​ជាមួយនឹង​បរិស្ថាន​រស់នៅ​ល្អប្រសើរ​។

​ស្របពេល​នឹងមាន​ការអភិវឌ្ឍ​យ៉ាងគំហុក​នេះ ខេត្ត​ព្រះសីហនុ​ក៏បាន​ជួបប្រទះ​បញ្ហា​ប្រឈម​នានា ដែល​បណ្តាលមកពី​មនុស្ស និង​ធម្មជាតិ​ផងដែរ​។ ជាក់ស្តែង ខេត្ត​ព្រះសីហនុ​តែងតែ​ជួបប្រទះ​បញ្ហា​ប្រឈម​ដែល​បណ្តាលមកពី​ការប្រែប្រួល​អាកាសធាតុ មានដូចជា គ្រោះទឹកជំនន់ គ្រោះរាំងស្ងួត ខ្យល់ព្យុះ ការកើនឡើង​កម្តៅ និង​ការឡើង​កម្ពស់​កម្រិត​ទឹកសមុទ្រ ដែល​បណ្តាលឱ្យ​ទឹកប្រៃ​ហូរ​ចូល​ស្រែចម្ការ​ជាដើម​។

​លោក​បញ្ជាក់ថា​៖ «​ការប្រែប្រួល​អាកាសធាតុ គឺជា​ការគំរាមកំហែង​ចម្បង​មួយ​ដល់​មនុស្សជាតិ​ទាំងមូល ទាំង​ពេលបច្ចុប្បន្ន និង​ពេលអនាគត ជាពិសេស​សម្រាប់​ប្រទេស​កំពុងអភិវឌ្ឍន៍​ដូច​ប្រទេស​កម្ពុជា​។ កម្ពុជា​បានរួម​ចំណែក​បំ​ភាយ​ឧស្ម័ន​ផ្ទះ​កញ្ចក់​តិចតួច​ប៉ុណ្ណោះ ប៉ុន្តែ​កម្ពុជា​ស្ថិតនៅ​ក្នុងចំណោម​ប្រទេស​ដែល​ទទួល​រងគ្រោះ​ធ្ងន់ធ្ងរ​ជាងគេ​ពី​ការប្រែប្រួល​អាកាសធាតុ ដោយសារ​ប្រជាជន​កម្ពុជា​ភាគច្រើន​ប្រកប​របរ​កសិកម្ម ដែល​ពឹង​ផ្អែកលើ​របប​ទឹកភ្លៀង សមត្ថភាព​ឆ្លើយតប​ទាំង​បច្ចេកទេស និង​ហិរញ្ញវត្ថុ​នៅមានកម្រិត​»​។

​យោងតាម​ការសិក្សា​រប​ស់​ក្រសួង​សេដ្ឋកិច្ច និង​ហិរញ្ញវត្ថុ​បាន​បង្ហាញថា ប្រសិនបើ​កម្ពុជា ពុំ​ចាត់វិធានការ​បាន​ត្រឹមត្រូវ ទប់​ទល់នឹង​ការប្រែប្រួល​អាកាសធាតុ​នោះទេ ផលិតផល​ក្នុងស្រុក​សរុប​អាច​នឹង​ធ្លាក់ចុះ​ប្រមាណ​១០ ភាគរយ ត្រឹម​ឆ្នាំ ​២០៥០​។ ម្យ៉ាងទៀត បញ្ហា​ជំងឺ​រាតត្បាត​កូ​វីដ​ ១៩ បាននិងកំពុង​តែ​បន្ថែ​មអំ​រែក​យ៉ាង​ធ្ងន់​ដល់​រាជរដ្ឋាភិបាល ដែល​រារាំង​ដល់​ផែនការអភិវឌ្ឍន៍​សេដ្ឋកិច្ច និង​សង្គម រួមទាំង​ការអនុវត្ត​ផែនការ​យុទ្ធសាស្ត្រ​សម្រាប់​ឆ្លើយតប​នឹង​ការប្រែប្រួល​អាកាសធាតុ​។ នេះ​បើតាម​ការបន្ថែម​របស់​លោក ឡុង ឌី​ម៉​ង​។

​លោក​ថ្លែងថា​៖ «​ទោះបីជា​យើង​មាន​ភាពចាំបាច់​ក្នុងការ​បង្វែរ​ទិសដៅ​អាទិភាព​គោលនយោបាយ និង​ធនធាន​ដើម្បី​ប្រយុទ្ធ​ប្រឆាំងនឹង​ជំងឺ​កូ​វីដ​ ១៩ យើងទាំងអស់គ្នា​គប្បី​ខិតខំ​ផ្តល់​អាទិភាព និង​ធានា​ឱ្យបាន​និរន្តរភាព​នៃ​ការអនុវត្ត​វិធានការ​ដោះស្រាយ និង​ទប់​ទល់នឹង​ការប្រែប្រួល​អាកាសធាតុ​»​។​

​លោក​ថា ឈរលើ​ស្មារតី​នេះ គម្រោង​វាយតម្លៃ​តម្រូវការ​បច្ចេកវិទ្យា និង​ផែនការ ដើម្បី​គាំទ្រ​ដល់​ការអនុវត្ត​បច្ចេកវិទ្យា​មេត្រីភាព​បរិស្ថាន សម្រាប់​តំបន់​សេដ្ឋកិច្ច​ពិសេស​នៅ​ខេត្ត​ព្រះសីហនុ ពិតជា​មានតម្លៃ​បន្ថែម​ដល់​សេដ្ឋកិច្ច និង​បរិស្ថាន ដែល​នឹង​រួមចំណែក កាត់បន្ថយ​ការប្រែប្រួល​អាកាសធាតុ តាមរយៈ​ការអនុវត្ត​នូវ​ផែនការ​សកម្មភាព​ដែល​អង្គសិក្ខាសាលា​បាន​ចូលរួម​យ៉ាង​ផុលផុស​៕​