.jpg)
លោក យ៉ង សាំងកុមា តំណាងគណបក្សប្រជាធិបតេយ្យមូលដ្ឋាន និង លោក សុន ឆ័យ តំណាងគណបក្សភ្លើងទៀន និងមន្ត្រីក្រុមប្រឹក្សាឃុំ៕ រូបថត LDP
ភ្នំពេញៈ គណបក្សប្រជាធិបតេយ្យមូលដ្ឋាន និងគណបក្សភ្លើងទៀន បានចងសម្ព័ន្ធភាពនយោបាយកម្រិតមូលដ្ឋាន នៅឃុំសាគ្រាម ខេត្តកំពង់ធំ កាលពីថ្ងៃទី ១៧ ខែកក្កដា ឆ្នាំ ២០២២ ដើម្បីលើកស្ទួយអភិបាលកិច្ចបែបប្រជាធិបតេយ្យតាមគោលការណ៍សេរីពហុបក្ស ក្រោយពីការបោះឆ្នោតក្រុមប្រឹក្សាឃុំ-សង្កាត់ កាលពីដើមខែមិថុនា។
លោក ឡឹក សុធារ អ្នកនាំពាក្យគណបក្សប្រជាធិបតេយ្យមូលដ្ឋាន ប្រាប់ភ្នំពេញប៉ុស្តិ៍នៅថ្ងៃទី ១៧ ខែកក្កដាថា ការចងសម្ព័ន្ធភាពនយោបាយនេះ លោក យ៉ង សាំងកុមា តំណាងគណបក្សប្រជាធិបតេយ្យមូលដ្ឋាន និង លោក សុន ឆ័យ តំណាងគណបក្សភ្លើងទៀន បានទៅជួបក្រុមប្រឹក្សាឃុំសាគ្រាម ខេត្តកំពង់ធំ ក្នុងគោលបំណងលើកទឹកចិត្តឱ្យក្រុមប្រឹក្សាឃុំទើបជាប់ឆ្នោតក្នុងការចងសម្ព័ន្ធភាពនយោបាយដើម្បីលើកស្ទួយអភិបាលកិច្ចបែបប្រជាធិបតេយ្យតាមគោលការណ៍សេរីពហុបក្ស។
លោកបន្តថា ឃុំសាគ្រា ថ្វីដ្បិតតែគណបក្សប្រជាជនកម្ពុជាឈ្នះឆ្នោត ធ្វើជាមេឃុំមែន តែមិនមានអាសន:គ្រប់គ្រាន់ (តាមគោលការណ៍ ៥០+១) ក្នុងការសម្រេចចិត្តដោយគ្មានការសហការពីបក្សផ្សេងទៀតនោះទេ។ ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ កន្លងមកនេះ គណបក្យប្រជាធិបតេយ្យមូលដ្ឋានទទួលបាន២ អាសនៈ គណបក្សភ្លើងទៀន ទទួលបាន ២ អាសនៈ និងគណបក្សប្រជាជនកម្ពុជា ទទួលបាន ៣ អាសនៈ។ បើបូករួមគណបក្សប្រជាធិបតេយ្យមូលដ្ឋាន និង គណបក្សភ្លើងទៀន៤ អាសនៈ នឹង ឈ្នះគណបក្សប្រជាជនកម្ពុជា។
បើតាម លោក ឡឹក សុធារ សម្ព័ន្ធភាពនយោបាយនៅឃុំសាគ្រាម រវាងគណបក្សប្រជាធិបតេយ្យមូលដ្ឋាន និងគណបក្សភ្លើងទៀន ដើម្បីកសាងឃុំសាគ្រាមនេះឱ្យបានល្អ និងធ្វើជាគំរូ ព្រមទាំង អាចជាឧទាហរណ៍មួយនៃសម្ព័ន្ធភាពនយោបាយសម្រាប់ការបោះឆ្នោតនៅឆ្នាំ ២០២៣ ។
លោកថ្លែងថា៖ «យើងចង់ប្រើប្រាស់រូបភាពរួមគ្នានេះ ដើម្បីធ្វើការសិក្សាថាតើ យើងសហការគ្នានៅមូលដ្ឋាននេះ វាបានផ្តល់ផលប្រយោជន៍អ្វីខ្លះដល់ប្រជាពលរដ្ឋបានពិតប្រាកដ។ នេះ គឺជាគោលដៅ ទី ១ និងទី ២ នោះ គឺយើងចង់ជជែកគ្នាពីលទ្ធភាព សហការគ្នាបន្តបន្ទាប់ទៀត នៅពេល ដែលយើងឃើញលទ្ធផលឃុំសាគ្រាមចេញមកល្អ និងទទួលបានផលចំណេញច្រើន សម្រាប់ប្រជាពលរដ្ឋ យើងនឹងពិចារណាពីលទ្ធភាព នៃសហការផ្សេងៗទៀត»។
លោក ឯម សុវណ្ណារ៉ា សាស្ត្រាចារ្យ និងអ្នកវិភាគនយោបាយ ប្រាប់ភ្នំពេញប៉ុស្តិ៍នៅថ្ងៃទី ១៧ ខែកក្កដាថា ការចងសម្ព័ន្ធភាពនយោបាយនៅថ្នាក់មូលដ្ឋានរបស់ គណបក្សទាំង២នេះ សមាជិកក្រុមប្រឹក្សាឃុំ អាចជជែកគ្នា មុនពេលសម្រេចចិត្ត និងអាចឈរនៅសំឡេងតែមួយ ពោលគឺ ៤ ទល់ ៣។ ទោះបីមិនបានឈរធ្វើជាមេឃុំក្តី ប៉ុន្តែពួកគាត់អាចធ្វើសេចក្តីសម្រេចណាមួយ ដើម្បីឆ្លើយតបទៅនឹងសេចក្តីត្រូវការរបស់ប្រជាពលរដ្ឋនៅក្នុងមូលដ្ឋាន។
លោកថ្លែងថា៖ «ការកសាងប្រជាប្រិយភាព និងភាពជឿជាក់ នៅក្នុងឃុំរបស់គណបក្សប្រជាធិបតេយ្យមូលដ្ឋាន និងគណបក្សភ្លើងទៀន អាចមានកម្លាំងទាក់ទាញ។ វាជាចំណុចល្អ ខ្ញុំស្វាគមន៍ និងសាទរ ហើយខ្ញុំជំរុញលើកទឹកចិត្តឱ្យធ្វើបែបនេះទៀត នៅឃុំសង្កាត់ផ្សេងទៀត»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ប្រាប់ភ្នំពេញប៉ុស្តិ៍នៅថ្ងៃទី ១៧ ខែកក្កដាថា ការចងសម្ព័ន្ធភាពនយោបាយរបស់គណបក្សទាំង២នេះនៅក្រោយការបោះឆ្នោត មិនមានអ្វីជាបញ្ហាទេ ប៉ុន្តែ ទោះបីមានការចងសម្ព័ន្ធភាពនយោបាយទាំង២នេះក្តី ក៏ក្រុមប្រឹក្សាឃុំនេះ នៅតែស្ថិតនៅក្រោមច្បាប់ស្តីពីគ្រប់គ្រងរដ្ឋបាលឃុំសង្កាត់ដដែលទេ។
លោកថ្លែងថា៖ «មួយវិញទៀត រដ្ឋបាលឃុំនេះ ស្ថិតក្រោមការគ្រប់គ្រងរបស់ក្រសួងមហាផ្ទៃ បើទោះបីចងសម្ព័ន្ធភាពនយោបាយនៅក្នុងឃុំនេះ ឱ្យមានសំឡេងច្រើនក្តី ក៏មិនអាចចេញពីក្របខ័ណ្ឌនៃច្បាប់ស្តីពីការគ្រប់គ្រងឃុំសង្កាត់ និងការណែនាំរបស់ក្រសួងមហាផ្ទៃដែរ»។
យោងតាមលទ្ធផលបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី ៥ កាលពីថ្ងៃទី ៥ ខែកក្កដា ឆ្នាំ ២០២២ បង្ហាញថា ឃុំសាគ្រាមមាន ៧ អាសន: ដោយ ក្នុងនោះ គណបក្សប្រជាជនទទួលបាន ៣ អាសន: គណបក្សភ្លើងទៀនទទួលបាន ២ អាសន: និង គណបក្សប្រជាធិបតេយ្យមូលដ្ឋានទទួលបាន ២ អាសន:៕
វីដេអូ៖
