ភ្នំពេញៈជំនន់ទឹកភ្លៀងនាប៉ុន្មានថ្ងៃជាប់គ្នាមុននេះបានបណ្ដាលឱ្យមនុស្ស ៣ នាក់ស្លាប់ និងជន់លិចប៉ះពាល់ផ្ទះប្រជាពលរដ្ឋជិត ១០០ គ្រួសារ ព្រមទាំងខូចខាតហេដ្ឋារចនាសម្ព័ន្ធជនបទមួយចំនួន។ នេះបើតាមលោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ។
លោកបានប្រាប់ភ្នំពេញប៉ុស្តិ៍នៅថ្ងៃទី ១៧ ខែកក្កដា ឆ្នាំ ២០២២ថា ឥទ្ធិពលនៃប្រព័ន្ធសម្ពាធទាប ពីប្រទេសថៃនិងពីឈូងសមុទ្រចិនភាគខាងត្បូងបានបណ្ដាលឱ្យមានភ្លៀងធ្លាក់ខ្លាំងនៅតំបន់មាត់សមុទ្រ និងតំបន់ជួរភ្នំក្រវាញ។ ជាក់ស្ដែងកាលពីថ្ងៃទី ១១ ដល់ថ្ងៃទី ១៤ ខែកក្កដាកន្លងទៅថ្មីៗនេះ បរិមាណទឹកភ្លៀងបានធ្លាក់លើសពីកម្រិត ១០០ មិល្លីម៉ែត្រក្នុង ១ វិនាទីដោយបង្កឱ្យកើតមានជាជំនន់ទឹកភ្លៀងនៅក្នុងខេត្តចំនួន ៤ រួមមាន ខេត្តព្រះសីហនុ កោះកុង ពោធិ៍សាត់ និងបាត់ដំបង។
លោកបានបញ្ជាក់ថា៖ «ជំនន់ទឹកភ្លៀងដែលបានកើតឡើងក្នុងចន្លោះថ្ងៃទី ១១-១៤ ខែកក្កដាបានបង្កឱ្យពលរដ្ឋនៅក្នុងខេត្តពោធិ៍សាត់ ១ គ្រួសារមានគ្នា ៣ នាក់ ក្នុងនោះមានទាំងស្រីមានផ្ទៃពោះ ៧ ខែផង បានស្លាប់ ខណៈកំពុងធ្វើដំណើរតាមម៉ូតូឌុបគ្នាឆ្លងកាត់ស្រុកវាលវែង ក្នុងពេលមានភ្លៀងធ្លាក់ខ្លាំងបណ្ដាលឱ្យម៉ូតូរអិលធ្លាក់ចូលទៅក្នុងស្ទឹង ក្នុងគ្រាដែលទឹកស្ទឹងនោះកំពុងជន់ឡើង និងហូរកួចខ្លាំង»។
ជនរងគ្រោះដែលបានស្លាប់នៅក្នុងឧប្បទ្ទវហេតុនោះ រួមមាន ឈ្មោះ ជា សុខគឿន អាយុ ៣៩ ឆ្នាំមានទីលំនៅក្នុងភូមិឈើទាល ឃុំត្នោតជុំ ស្រុកក្រគរ ខេត្តពោធិ៍សាត់ និងប្រពន្ធរបស់គាត់ ឈ្មោះចាន់ ភក្តី អាយុ ៣៥ ឆ្នាំ (មានផ្ទៃពោះ ៧ ខែ) និងកូនស្រីរបស់គាត់ ឈ្មោះ លី ចាន់ថា អាយុ ៣ ឆ្នាំ។
បើតាមលោក គឹម កុលមុន្នី នៅថ្ងៃទី ១២ ខែកក្កដា ភ្លៀងបានធ្លាក់ខ្លាំងនៅខេត្តព្រះសីហនុ បង្កជាជំនន់ទឹកភ្លៀងលិច ប៉ះពាល់ផ្ទះប្រជាពលរដ្ឋ ៥៤ គ្រួសារនៅក្នុងស្រុកកំពង់សិលា ស្រុកស្ទឹងហាវ និងស្រុកព្រៃនប់ ដោយទឹកបានហូរកាត់លើកំណាត់ផ្លូវជាតិលេខ ៤ ត្រង់ចំណុចស្ពានស្ទឹងសំរោង ប៉ុន្តែនៅព្រឹកថ្ងៃទី ១៣ ខែកក្កដា ទឹកបានស្រកទៅវិញ។ រីឯនៅខេត្តកោះកុង ភ្លៀងធ្លាក់ខ្លាំង៣ថ្ងៃជាប់គ្នាគឺពីថ្ងៃទី ១២-១៤ ខែកក្កដាបង្កជាជំនន់ទឹកភ្លៀងលិចប៉ះពាល់ផ្ទះប្រជាពលរដ្ឋ ៤០ គ្រួសារនៅក្នុងស្រុកបទុមសាគរ ស្រុកមណ្ឌលសីមា និងស្រុកស្រែ អំបិលព្រមទាំងលិចប៉ះពាល់ស្រូវចំនួន៥ហិកតា និងបាត់បងមាន់ទាចំនួន ១៦០ ក្បាល។ ចំណែកនៅខេត្តបាត់ដំបង ជំនន់ទឹកភ្លៀងបានលិចប៉ះពាល់ផ្ទះប្រជាពលរដ្ឋចំនួន ៥ គ្រួសារ នៅស្រុកសំឡូត កាលពីថ្ងៃទី ១២ ខែកក្កដា ឆ្នាំ ២០២២ ។
សូមបញ្ជាក់ផងដែរថា កាលពីខែឧសភាកន្លងទៅនេះ ជំនន់ទឹកភ្លៀងបានបង្កការជន់លិចផ្ទះប្រជាពលរដ្ឋ ប្រមាណ ១០០ ខ្នង និងប៉ះពាល់ស្រូវដើមរដូវវស្សារបស់ប្រជាកសិករក្នុងខេត្តបន្ទាយមានជ័យ និងខេត្តត្បូងឃ្មុំសរុប ៦ ០១៦ហិកតា និងខូចខាតចំនួន ៣ ៥១៣ ហិកតា ៕
វីដេអូ៖