.jpg)
គ្រោះមហន្តរាយពីធម្មជាតិ ដែលបង្កឡើងពីខ្យល់កន្ត្រាក់ និងរន្ទះបាញ់ នៅក្នុងឆមាសទី១ ឆ្នាំ ២០២២ នេះ បានបណ្ដាលឱ្យមានជនរងគ្រោះស្លាប់ និងរងរបួសសរុបចំនួន ៧៩ នាក់។ ហុង មិនា
ភ្នំពេញៈ គ្រោះមហន្តរាយពីធម្មជាតិ ដែលបង្កឡើងពីខ្យល់កន្ត្រាក់ និងរន្ទះបាញ់ នៅក្នុងឆមាសទី ១ ឆ្នាំ ២០២២ នេះ បានបណ្ដាលឱ្យមានជនរងគ្រោះស្លាប់ និងរងរបួសសរុបចំនួន ៧៩ នាក់។ ចំនួននេះបានថយចុះបើធៀបនឹងឆមាសទី ១ ឆ្នាំ ២០២១ ដែលមានជនរងគ្រោះស្លាប់ និងរងរបួសចំនួ ១៦៤ នាក់ ដោយសារគ្រោះធម្មជាតិខ្យល់កន្ត្រាក់និងរន្ទះបាញ់។ នេះបើយោងតាមរបាយការណ៍បូកសរុបលទ្ធផលការងារគ្រប់គ្រងគ្រោះមហន្តរាយ សម្រាប់ឆមាសទី ១ និងទិសដៅការងារបន្តសម្រាប់ឆមាសទី ២ ឆ្នាំ ២០២២ របស់គណៈកម្មាធិការជាតិគ្រប់គ្រងគ្រោះមហន្តរាយ ដែលភ្នំពេញប៉ុស្តិ៍ទើបទទួលបាន។
តាមរយៈរបាយការណ៍នេះ ស្ថានភាពអាកាសធាតុសម្រាប់ ៦ ខែ ឆ្នាំ ២០២២ នេះ មានភាពល្អប្រសើរជាងឆ្នាំ ២០២១ ដោយសារកម្ពុជាទទួលរងកម្រិតកម្ដៅខ្សោយពុំក្តៅខ្លាំងដូចឆ្នាំ ២០២១ ហើយភ្លៀងកក់ខែ កើតមានច្រើនក្នុងរដូវប្រាំង ដែលបានកាត់បន្ថយការប្រឈមនូវការខ្វះខាតទឹកប្រើប្រាស់ និងទឹកសម្រាប់ការបង្កបង្កើនផល ព្រមទាំងពុំសូវទទួលរងឥទ្ធិពលពីព្យុះក្នុងតំបន់នោះទេ។
ថ្វីបើដូច្នេះក្ដី លោកគន់ គីម អនុប្រធានទី ១ គណៈកម្មាធិការជាតិគ្រប់គ្រងគ្រោះមហន្តរាយ បានគូសបញ្ជាក់នៅក្នុងរបាយការណ៍នោះថា៖ «គ្រោះមហន្តរាយធម្មជាតិ ដែលបង្កឡើងពីការ ប្រែប្រួលអាកាសធាតុ ដូចជា គ្រោះរាំងស្ងួត ទឹកជំនន់ ខ្យល់កន្ត្រាក់ និងរន្ទះបាញ់ នៅតែជាបញ្ហាប្រឈម និងបានប៉ះពាល់យ៉ាងធ្ងន់ធ្ងរដល់ជីវភាពរស់នៅរបស់ប្រជាពលរដ្ឋនៅទូទាំងប្រទេស ពិសេសប្រជាពលរដ្ឋក្នុងតំបន់ជនបទដាច់ស្រយាល តាមទីទំនាបជាប់មាត់ទឹក»។
ក្នុងនោះលោកបានលើកឡើងថា កាលពីក្នុងរដូវក្ដៅកន្លងមក តំបន់មួយចំនួននៅក្នុងខេត្តបន្ទាយមានជ័យ សៀមរាប ព្រៃវែង ត្បូងឃ្មុំ កណ្ដាល ពោធិ៍សាត់ តាកែវ និងខេត្តស្វាយរៀង បានជួបប្រឈមបញ្ហាខ្វះទឹកផ្គត់ផ្គង់ដំណាំស្រូវ ១៥ ០៧៣ ហិកតា ដោយសារតែបរិមាណភ្លៀងកក់ខែកើតមានតិចតួច។ ប៉ុន្តែបញ្ហានោះត្រូវបានដោះស្រាយប្រកបដោយបរិយាប័ន្ន តាមរយៈកិច្ចសហការរបស់ក្រសួងជំនាញនិងអាជ្ញាធរមូលដ្ឋាន ដែលបានជួយអន្តរាគមន៍បើកបញ្ចេញទឹក និងបូមទឹកជួយសង្គ្រោះជាបន្តបន្ទាប់ បានទាន់ពេលវេលា។
លុះដល់ក្នុងរដូវ-វស្សា បរិមាណទឹកភ្លៀងធ្លាក់ច្រើនជាបន្តបន្ទាប់ចាប់ពីដំណាច់ខែឧសភា មកដល់ដើមខែមិថុនា បង្កឱ្យមានការជន់លិចនៅតាមតំបន់ទំនាប និងទីប្រជុំជនមួយចំនួនក្នុងរយៈពេលខ្លីក៏បង្កឱ្យមានការប៉ះពាល់ខូចខាត ដំណាំស្រូវ ១៣៧៥១ ហិកតា របស់ប្រជាពលរដ្ឋមួយចំនួនក្នុងខេត្តបន្ទាយមានជ័យ ត្បូងឃ្មុំ និងសៀមរាប ក្នុងនោះខូចខាតទាំងស្រុងអស់ ៩ ៨១៣ ហិកតា និង ខូចខាតដំណាំរួមផ្សំ ២១ ហិកតា។
ក្រៅពីនេះជំនន់ទឹកភ្លៀងនាដើមរដូវវស្សា បានបង្កផលប៉ះពាល់ និងខូចខាតដល់វិស័យហេដ្ឋារចនាសម្ព័ន្ធជនបទមួយចំនួន រួមមានផ្លូវលំ ២ ខ្សែ បាក់ស្ពានឈើ ១ បាក់ដាច់ខ្នងទំនប់អាងស្តុកទឹកចំនួន ២ នៅក្នុងខេត្តកំពង់ឆ្នាំង និងខេត្តសៀមរាប ខណៈនៅស្រុកកូនមុំខេត្តរតនគិរី មានការជន់លិចផ្ទះកម្មករចម្ការចេកចំនួន ៧ ល្វែង ស្មើ ១៥០ បន្ទប់ ដោយបានជម្លៀសកម្មករចេញទៅទីទួលសុវត្ថិភាព សរុបចំនួន ១៧៦ គ្រួសារ។
ជាមួយការមកដល់នៃរដូវវស្សា ព្យុះក្នុងតំបន់ចំនួន ២ បានកើតមាននៅដំណាច់ខែមិថុនា ក្នុងនោះកូនព្យុះទី ១ បង្កឥទ្ធិពលបន្ទាន់ដល់កម្ពុជាធ្វើឱ្យមានខ្យល់បក់បោកខ្លាំងលើផ្ទៃសមុទ្ររួមជាមួយភ្លៀង និងបាតុភូតខ្យល់កន្ត្រាក់ ផ្គរ រន្ទះ ចាប់ពីតំបន់មាត់សមុទ្រដល់តំបន់ទំនាបភាគពាយព្យ តំបន់ខ្ពង់រាបភាគខាងជើង និងតំបន់ ខ្ពង់រាបភាគឦសាន។
រាជធានី-ខេត្តចំនួន ២៣ លើកលែងតែខេត្តមណ្ឌលគិរី និងខេត្តតាកែវ ខ្យល់កន្ត្រាក់ដែលកើតឡើងពីឥទ្ធិពលព្យុះក្នុងតំបន់បានបង្កឱ្យមានជនរងគ្រោះ ៣ នាក់ស្លាប់ និង ១៨ នាក់ទៀតរងរបួស ព្រមទាំងរលំខូចខាតផ្ទះប្រជាពលរដ្ឋសរុបចំនួន ៦៨៥ ខ្នង របើកដំបូល និងខូចមធ្យម ២ ៣៧៤ ខ្នង របើកដំបូលសាលារៀន ១៩ អគារ ដួលរលំតូបលក់ដូរ ១៣ តូប របើកដំបូលអគាររដ្ឋបាល ៦ អគារ។ ទន្ទឹមនឹងនេះ បាតុភូតរន្ទះបាញ់បានបណ្ដាលឱ្យពលរដ្ឋ ៣២ នាក់ស្លាប់ និងរងរបួស ២៦ នាក់ ងាប់គោក្របី ៦៩ ក្បាល និងខូចខាតផ្ទះសំបែង ១១ ខ្នង។
លោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយថ្លែងថា ជាទិសដៅបន្ត គណៈកម្មាធិការជាតិគ្រប់គ្រងគ្រោះមហន្តរាយ បានសហការ និងចូលរួមជាមួយក្រសួងស្ថាប័នពាក់ព័ន្ធ និងមូលដ្ឋានថ្នាក់ក្រោមជាតិក្នុងការតាមដាន និងត្រៀមការអន្តរាគមន៍សង្គ្រោះគ្រប់ហេតុការណ៍គ្រោះមហន្តរាយ ដែលអាចនឹងកើតមានក្នុងរដូវវស្សាដើម្បីធ្វើការឆ្លើយតប៕
