.jpg)
ស្នាក់ការគណៈកម្មាធិការជាតិរៀបចំការបោះឆ្នោត។ ហុង មិនា
ភ្នំពេញៈ គណៈកម្មាធិការជាតិរៀបចំការបោះឆ្នោត (គជប) កាលពីថ្ងៃទី ២១ ខែ កក្កដា ឆ្នាំ ២០២២ បានពិនិត្យ និងសម្រេចលើឯកសារមួយចំនួនដែលអគ្គលេខាធិការដ្ឋាន គ.ជប ស្នើឡើង ដើម្បីត្រៀមដំណើរការរៀបចំការបោះឆ្នោតជ្រើសតាំងតំណាងរាស្ត្រនីតិកាលទី៧ ដែលនឹងប្រព្រឹត្តទៅនៅថ្ងៃទី ២៣ ខែ កក្កដា ឆ្នាំ ២០២៣។
យោងតាមសេចក្តីប្រកាសព័ត៌មានរបស់ គជប ចេញផ្សាយកាលពីព្រលប់ថ្ងៃទី ២១ ខែកក្កដា បញ្ជាក់ថា ឯកសារដែលអគ្គលេខាធិការដ្ឋាន គ.ជប ស្នើសុំ គ.ជ.ប ពិនិត្យ និងសម្រេចរួមមាន៖
១. ប្រតិទិនសម្រាប់ប្រជុំជាមួយភាគីពាក់ព័ន្ធ ក្នុងការពិនិត្យបញ្ជីឈ្មោះ និងការចុះឈ្មោះ បោះឆ្នោត ឆ្នាំ ២០២២ ដែលនឹងត្រូវធ្វើការប្រជុំចំនួន ៨ លើក ក្នុងដំណាក់កាលពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំនេះ។
២. របាយការណ៍ស្តីពីការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២១។
៣. របាយការណ៍ស្តីពីការគ្រប់គ្រង និងការប្រព្រឹត្តទៅនៃការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី៥ ឆ្នាំ ២០២២ ដែលនឹងត្រូវជូនស្ថាប័ននីតិប្បញ្ញត្តិ និងរាជរដ្ឋាភិបាល។
៤. សេចក្តីព្រាងផ្តល់យោបល់ និងឆ្លើយតបទៅនឹងរបាយការណ៍របស់លោក Vitit Muntarbhorn អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជា។
៥. ឯកសារពាក់ព័ន្ធសម្រាប់ប្រឡងជ្រើសរើសមន្ត្រីជាប់កិច្ចសន្យារយៈពេលខ្លីឱ្យបម្រើការងារនៅតាមលេខាធិការដ្ឋានរាជធានី-ខេត្ត រៀបចំការបោះឆ្នោត ( លធ.ខប) ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២២។
បន្ទាប់ពីបានពិនិត្យ និងពិភាក្សាយ៉ាងល្អិតល្អន់លើឯកសារទាំងអស់ខាងលើរួចមក គ.ជ.ប បានកែសម្រួលខ្លឹមសារមួយចំនួន ហើយបានសម្រេចឯកភាពជាគោលការណ៍ សម្រាប់ប្រើប្រាស់ជាផ្លូវការ និងសម្រាប់អនុវត្ត បន្ទាប់ពីចុះហត្ថលេខាដោយឯកឧត្តម ប្រាជ្ញ ចន្ទ ប្រធាន គ.ជ.ប រួច។
ដោយឡែកចំពោះសេចក្តីព្រាងសេចក្ដីផ្តល់យោបល់លើរបាយការណ៍របស់លោក Vitit Muntarbhorn អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជា ពាក់ព័ន្ធនឹងដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ ២០២២ ឯកឧត្តម ប្រាជ្ញ ចន្ទ ប្រធាន គ.ជ.ប បានណែនាំឱ្យអង្គភាពជំនាញពិនិត្យមើលខ្លឹមសារក្នុងចំណុចទី២៤ នៃរបាយការណ៍ និងលើកយោបល់ដើម្បីដាក់ឆ្លង គ.ជ.ប ឡើងវិញ មុនធ្វើលិខិតឆ្លើយតបទៅគណៈកម្មាធិការសិទ្ធិមនុស្សកម្ពុជា។
ចំពោះការជ្រើសរើសមន្ត្រីជាប់កិច្ចសន្យារយៈពេលខ្លីសរុបទូទាំងប្រទេសចំនួន ៥២៧ រូប សម្រាប់បម្រើការងារនៅតាមលេខាធិការដ្ឋានរាជធានី-ខេត្ត រៀបចំការបោះឆ្នោត (លធ.ខប) ទាំង ២៥ ពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២២ គ.ជ.ប ចាប់ផ្តើមប្រកាសក្នុងការពិនិត្យជ្រើសរើសនៅដើមខែសីហា ខាងមុខនេះ៕
