ព្រះសីហនុៈ អង្គការ ហេបកូដ កម្ពុជានឹងធ្វើយុទ្ធនាការ ចែកខិត្តប័ណ្ណផ្សព្វផ្សាយអំពីសុវត្ថិភាពទឹក មូលដ្ឋានគ្រឹះនៃការហែលទឹក និងវិធីបង្ការពីការលង់ទឹក ដល់សាធារណជន ដែលទៅទស្សនានិងហែលទឹកលេងកម្សាន្តក្នុងតំបន់ឆ្នេរខេត្តព្រះសីហនុនិងខេត្តកំពត រយៈពេល ៣ថ្ងៃ (ពីថ្ងៃទី២៤-២៦ កក្កដា) ដើម្បីចូលរួមអបអរសាទរទិវាបង្ការការលង់ទឹកពិភពលោកឆ្នាំ ២០២២។
លោកជ័យ រតនា ប្រធានបច្ចេកទេស អង្គការហេបកូដកម្ពុជា ប្រាប់ភ្នំពេញប៉ុស្តិ៍នៅថ្ងៃទី ២០ កក្កដាថា ជារៀងរាល់ឆ្នាំ អង្គការសុខភាពពិភពលោក បានកំណត់យកថ្ងៃទី ២៥ កក្កដាជាថ្ងៃប្រារព្ធទិវាបង្ការការលង់ទឹកពិភពលោក។ សម្រាប់ឆ្នាំនេះទិវានេះនឹងប្រារព្ធធ្វើក្រោមប្រធានបទ «[រួមគ្នា]គិតធ្វើអ្វីមួយ ដើម្បីសង្គ្រោះជីវិតមនុស្សក្នុងលោកពីការលង់ទឹក» ដើម្បីជំរុញដល់គ្រប់សហគមន៍ និងមេដឹកនាំនៃបណ្ដាប្រទេសនានានៅទូទាំងពិភពលោក បង្កើនការយកចិត្តទុកដាក់ បង្ការការលង់ទឹក ខណៈចំនួនអ្នកស្លាប់ដោយការលង់ទឹកមានការកើនឡើងពី ១ ឆ្នាំទៅ ១ ឆ្នាំ គួរឱ្យកត់សម្គាល់។
អង្គការហេបកូដ កម្ពុជា បានរៀបចំកម្មវិធីចុះចែកខិត្តប័ណ្ណផ្សព្វផ្សាយស្តីពីសុវត្ថិភាពទឹក និងមូលដ្ឋានគ្រឹះនៃការហែលទឹកប្រកបដោយសុវត្ថិភាពដល់សាធារណជននៅខេត្តព្រះសីហនុ និងខេត្តកំពត ពិសេសដល់ក្រុមទេសចរ ដែលទៅទស្សនា និងហែលទឹកសមុទ្រលេង ដើម្បីឱ្យពួកគេទទួលបានបទពិសោធ និងចំណេះដឹងបន្ថែមទៀត ទាក់ទងនឹងវិធានការបង្ការការពារគ្រោះថ្នាក់លង់ទឹក និងវិធីសង្គ្រោះបឋម។
លោកថា៖ «មនុស្សគ្រប់គ្នាអាចលង់ទឹកគ្រប់ពេលវេលាប៉ុន្តែគ្មាននរណាម្នាក់បានគិតដល់រឿងនោះទេ។ ហេតុដូច្នេះហើយ ទើបក្នុង ១ ឆ្នាំៗ មានមនុស្សរាប់ពាន់នាក់នៅក្នុងពិភពលោកបានស្លាប់ដោយសារការលង់ទឹក»។
ការលង់ទឹកជាមូលហេតុចម្បងមួយនៃការស្លាប់នៅទូទាំងពិភពលោក សម្រាប់កុមារ និងយុវជនដែលមានអាយុពី ១-២៤ ឆ្នាំ។ ជារៀងរាល់ឆ្នាំមនុស្សប្រមាណ ២៣៦ ០០០ នាក់បានលង់ទឹកស្លាប់។ នេះបើតាមទិន្នន័យរបស់អង្គការសុខភាពពិភពលោក ដែលត្រូវបានផ្សព្វផ្សាយ លើគេហទំព័ររបស់អង្គការក្នុងសប្ដាហ៍នេះ។
ទិន្នន័យនោះក៏បានបង្ហាញផងដែរថា ជាង ៩០ ភាគរយនៃអ្នកស្លាប់ដោយលង់ទឹកកើតឡើងនៅក្នុងប្រទេសដែលមានចំណូលទាបនិងមធ្យម ដោយក្នុងនោះកុមារដែលមានអាយុក្រោម ៥ឆ្នាំមានហានិភ័យខ្ពស់បំផុត។ ដោយឡែកនៅកម្ពុជា ការស្លាប់ដោយការលង់ទឹកបានកើនឡើងដល់ ១ ១១៣ នាក់ ឬស្មើ ១,២៤ ភាគរយនៃចំនួនអ្នកស្លាប់ក្នុងប្រទេសកម្ពុជា។ តួលេខនេះបានធ្វើឱ្យប្រទេសកម្ពុជា ជាប់ចំណាត់ថ្នាក់លេខរៀងទី ១២ ដែលមានអ្នកស្លាប់ដោយការលង់ទឹកច្រើនជាងគេក្នុងពិភពលោក។ នេះបើយោងរបាយការណ៍ចុងក្រោយ អង្គការសុខភាពពិភពលោក ចេញផ្សាយកាលពីឆ្នាំ ២០២០។
អង្គការសុខភាពពិភពលោក បញ្ជាក់ថា៖ «ការស្លាប់ទាំងនេះជារឿយៗត្រូវបានផ្សារភ្ជាប់ទៅនឹងសកម្មភាពប្រចាំថ្ងៃ ដូចជាការងូតទឹក ការដងទឹកសម្រាប់ប្រើប្រាស់ ការធ្វើដំណើរលើទឹក តាមទូក ឬស្រឡាងនិងការនេសាទជាដើម។ ផលប៉ះពាល់នៃព្រឹត្តិការណ៍អាកាសធាតុតាមរដូវកាល រួមទាំងខ្យល់មូសុង ក៏ជាមូលហេតុញឹកញាប់នៃការលង់ទឹកផងដែរ»។
ថ្វីដ្បិតតែយ៉ាងដូច្នេះក្ដីអង្គការនេះបានកត់សម្គាល់ថា ភាគច្រើននៃការស្លាប់ទាំងនេះគឺអាចការពារបាន តាមរយៈដំណោះស្រាយ ដោយផ្អែកលើការវាយតម្លៃនៃស្ថានភាពជាក់ស្ដែង ដូចជាការដំឡើងរបាំងការពារការចូលប្រើប្រាស់ទឹក។ ការផ្តល់កន្លែងសុវត្ថិភាពនៅឆ្ងាយពីទឹកសម្រាប់កុមារមត្តេយ្យសិក្សា ជាមួយនឹងការថែទាំកុមារដែលមានសមត្ថភាពបង្រៀនហែលទឹកសុវត្ថិភាពទឹកនិងជំនាញសង្គ្រោះដោយសុវត្ថិភាព។
ជាមួយគ្នានេះ ការបណ្តុះបណ្តាលអ្នកឈរមើលក្នុងការជួយសង្គ្រោះនិងសង្គ្រោះដោយសុវត្ថិភាព ការកំណត់ និងអនុវត្តបទប្បញ្ញត្តិនៃការជិះទូក ការដឹកជញ្ជូន និងស្រឡាងប្រកបដោយសុវត្ថិភាព និងការកែលម្អការគ្រប់គ្រងហានិភ័យទឹកជំនន់ ក៏ជាមធ្យោបាយដ៏ល្អ ក្នុងការបញ្ចៀសនូវបញ្ហាស្លាប់ដោយការលង់ទឹកផងដែរ។
ពាក់ព័ន្ធទៅនឹងដំណោះស្រាយនេះ អង្គការហេបកូដ កម្ពុជា ដែលបាននិងកំពុងអនុវត្តកម្មវិធីសុវត្ថិភាពទឹក និងបង្ការការលង់ទឹក តាំងពីឆ្នាំ ២០១៨ មក កំពុងបន្តកិច្ចសហការជាមួយមន្ទីរអប់រំ ខេត្តព្រះសីហនុតាមរយៈកម្មវិធីដើម្បីគាំទ្រដល់ការបង្ការការលង់ទឹករបស់កុមារ និងកម្មវិធីហែលទឹកដើម្បីការរស់រានមានជីវិត។
លោក រតនា បាននិយាយថា នៅចុងឆ្នាំ ២០២២ នេះ អង្គការនឹងជួយសម្រួលដល់វគ្គបណ្តុះបណ្តាលសុវត្ថិភាពទឹកនិងជំនួយដំបូងសម្រាប់កុមារ ៣ ០០០ នាក់ និង ប្រជាពលរដ្ឋ ២០០ គ្រួសារនៅក្នុងសហគមន៍ផ្សេងៗក្នុងខេត្តព្រះសីហនុ និងកំពត។
លោកបានថ្លែងថា៖ «បច្ចុប្បន្នអង្គការយើងកំពុងបន្តបេសកកម្មនេះ ដើម្បីការពារការលង់ទឹក និងរក្សាកុមារកម្ពុជា និងក្រុមគ្រួសាររបស់ពួកគេ ឱ្យមានសុវត្ថិភាព និងសប្បាយរីករាយនៅក្នុង និងជុំវិញទឹក»។
យ៉ាងណាក្តីក្នុងរយៈពេល ៣ ថ្ងៃជាប់គ្នានេះ (១៨-២០ កក្កដា ២០២២) មានករណីលង់ទឹកស្លាប់ ៦ នាក់ ក្នុងនោះខេត្តព្រះសីហនុម្នាក់ កំពង់ធំម្នាក់ សៀមរាប ២ នាក់ កំពង់ឆ្នាំងម្នាក់ និងខេត្តបាត់ដំបងម្នាក់។ កាលពីខែមិថុនា ក៏មានករណីកុមារចំនួន ៦ នាក់បានស្លាប់ដោយករណីលង់ទឹកស្រះនិងទឹកអូរផងដែរ។
ជុំវិញគ្រោះថ្នាក់លង់ទឹកស្លាប់នេះ លោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានអំពាវនាវ ដល់ប្រជាពលរដ្ឋ ដែលរស់នៅក្នុងតំបន់វាលទំនាបតាមដងទន្លេ បឹងបួ ព្រែក និង ដៃសមុទ្រឱ្យបង្កើនការប្រុងប្រយ័ត្ន និងយកចិត្តទុកដាក់អំពីសុវត្ថិភាពចំពោះសមាជិកគ្រួសារ របស់ខ្លួន ជាពិសេសត្រូវយកចិត្តទុកដាក់ចំពោះ កុមារ ចាស់-ជរា និងស្ត្រីមានផ្ទៃពោះ ឱ្យនៅឆ្ងាយពីទឹក។
ទន្ទឹមនឹងនេះលោកបានជំរុញដល់គ្រប់ភាគីពាក់ព័ន្ធ ជាពិសេស កងកម្លាំងប្រដាប់អាវុធទាំង ៣ ប្រភេទ ត្រូវត្រៀមបម្រុងនូវមធ្យោបាយទាំងអស់ ដើម្បីអន្តរាគមន៍សង្គ្រោះពលរដ្ឋក្នុងតំបន់រងគ្រោះ ក្នុងករណីជួបប្រឈមគ្រោះទឹកជំនន់។
យ៉ាងណាក៏ដោយ ចំនួនអ្នកស្លាប់ដោយលង់ទឹក មិនត្រូវបានគេកត់ត្រា ដើម្បីចងក្រងជាទិន្នន័យច្បាស់លាស់នោះទេ។
ជុំវិញករណីនេះដែរ លោក គឹមកុលមុន្នី មានប្រសាសន៍ថា៖ «ជាទូទៅ យើងស្រង់ទិន្នន័យអ្នកលង់ទឹកស្លាប់ តែក្នុងពេលមានគ្រោះទឹកជំនន់កើតឡើងប៉ុណ្ណោះ។ អ្នកដែលលង់ទឹកស្លាប់ក្នុងពេលគ្មានគ្រោះទឹកជំនន់កើតឡើង យើងមិនបានកត់ត្រានោះទេ ព្រោះវាមិនពាក់ព័ន្ធនឹងគ្រោះមហន្តរាយ»។
បើតាមលោក គឹមកុលមុន្នី គ្រោះមហន្តរាយទឹកជំនន់ក្នុងឆ្នាំ ២០២១ កន្លងទៅ បានបណ្ដាលឱ្យមនុស្សក្មេងចាស់ប្រុស ស្រី ចំនួន ១៤ នាក់លង់ទឹកស្លាប់ និង ២ នាក់ទៀតរងរបួស៕