បន្ទាយមានជ័យៈ សិក្ខាកាមជាយោធិនចំនួន ១០០ នាក់នៃតំបន់ប្រតិបត្តិការសឹករងនៃខេត្តបន្ទាយមានជ័យទទួលបានបណ្តុះបណ្តាល និងហ្វឹកហ្វឺន ដើម្បីពង្រឹងសមត្ថភាព គុណភាព និងចំណេះរយៈពេល ៩០ ថ្ងៃ។
លោក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី ៥ ថ្លែងក្នុងពិធីបើកវគ្គហ្វឹកហ្វឺននៅថ្ងៃទី ២២ ខែកក្កដា ឆ្នាំ ២០២២ នេះឱ្យដឹងថា វគ្គហ្វឹកហ្វឺនពង្រឹងអង្គភាពរបស់តំបន់ប្រតិបត្តិការសឹករងបន្ទាយមានជ័យ ឆ្នាំ ២០២២ មានរយៈពេលសិក្សាសរុប ចំនួន ៩០ ថ្ងៃ និងសិក្ខាកាមសរុប ចំនួន ១០០ នាក់។
លោកបន្តថា វគ្គហ្វឹកហ្វឺនពង្រឹងអង្គភាពរបស់តំបន់ប្រតិបត្តិការសឹករងបន្ទាយមានជ័យ ឆ្នាំ ២០២២ ដែលប្រារព្ធបើកនាថ្ងៃនេះ ពិតជាមានសារៈសំខាន់ណាស់ សម្រាប់ការកសាងធនធានមនុស្ស ពង្រឹងសមត្ថភាព គុណភាព ការទទួលខុសត្រូវ និងសក្តានុពលការពារជាតិ ព្រមទាំងសកម្មភាពប្រចាំថ្ងៃរបស់កងទ័ពក្នុងការបំពេញភារកិច្ច ការបង្កើនប្រសិទ្ធភាព ទាំងចំណេះដឹង និងចំណេះធ្វើពិតប្រាកដ ធានាបាននូវប្រសិទ្ធភាព និងសមត្ថភាពខ្ពស់ក្នុងការបំពេញភារកិច្ចជូនអង្គភាព ដែលជាការរួមចំណែកលើភារកិច្ចការពារជាតិមាតុភូមិនៃយើងសំដៅធានាបាននូវប្រសិទ្ធភាពខ្ពស់នៃភារកិច្ចបានរឹងមាំ។
លោក ឯក សំអូន បានស្នើឱ្យអង្គភាពទាំងអស់ត្រូវរំឭកដាស់តឿន និងតាមដានជាប្រចាំនូវកម្មវិធីហ្វឹកហ្វឺន បើមានបញ្ហាអ្វីលំបាកត្រូវរួមគ្នាដោះស្រាយឱ្យបានទាន់ពេលវេលា។
លោកបន្តថា មួយទៀតត្រូវបំផុសចលនាប្រឡងប្រណាំងដណ្តើមយកស្នាដៃបុគ្គលល្អ ក្រុមល្អ បង្កបរិយាកាសឱ្យមានភាពរស់រវើក ដើម្បីពេលបញ្ចប់វគ្គបានទទួលប័ណ្ណសរសើរ និងលិខិតសរសើរ។
ចំណែក ក្រុមគ្រូត្រូវអនុវត្តភារកិច្ចរបស់ខ្លួនឱ្យបានម៉ឺងម៉ាត់បំផុត ដោយធ្វើជាគំរូល្អដល់សិស្ស និងបញ្ចេញនូវទេពកោសល្យអំពីសមត្ថភាព ទាំងចំណេះដឹងក្នុងការបង្រៀនធ្វើយ៉ាងណាឱ្យសិស្សទទួលបានចំណេះដឹងពិតប្រាកដពេលបញ្ចប់វគ្គ។
លោកថ្លែងថា៖ «សិក្ខាកាមទាំងអស់ត្រូវយកចិត្តទុកដាក់រៀនសូត្រ មានវិន័យខ្ពស់ គោរពបទបញ្ជាផ្ទៃក្នុងមានសាមគ្គីផ្ទៃក្នុងបានល្អ ធ្វើខ្លួនឱ្យស័ក្តិសមជាកងយោធពលខេមរភូមិន្ទ»៕