កោះកុងៈ មន្ទីរកសិកម្ម រុក្ខាប្រមាញ់ និងនេសាទខេត្តកោះកុង និងអង្គការសមាគមអភិរក្សសត្វព្រៃប្រចាំកម្ពុជា នាថ្ងៃទី ២២ ខែ កក្កដា ឆ្នាំ ២០២២ នេះ បានប្រជុំពិនិត្យកែតម្រូវ និងសម្រេចលើសេចក្ដីព្រាងចុងក្រោយស្តីពីកិច្ចព្រមព្រៀងអនុវត្តគម្រោងគ្រប់គ្រង និងអភិរក្សអណ្ដើកហ្លួង ក្រពើត្រី និងធនធានជលផល តាមប្រព័ន្ធព្រែកស្រែអំបិល។
អង្គការសមាគមអភិរក្សសត្វព្រៃប្រចាំកម្ពុជា (WCS Cambodia) បានឱ្យដឹងថា កិច្ចព្រមព្រៀងនេះ ផ្ដោតសំខាន់លើ ទី១ ការស្ដារឡើងវិញនូវធនធានផលផល ជាពិសេស អណ្ដើកហ្លួង និងក្រពើត្រី ដែលកំពុងទទួលរងការគំរាមកំហែង នៅតាមតំបន់គ្រប់គ្រងជលផល ស្ថិតក្នុងប្រព័ន្ធព្រែកស្រែអំបិលនៃក្រសួងកសិកម្ម រុក្ខាប្រមាញ់ និងនេសាទ។
ទី២ ទប់ស្កាត់ការចាប់ និងការជួញដូរប្រភេទអណ្ដើកហ្លួង និងក្រពើត្រឹ ចំណែកទី៣ គាំទ្រដល់ការពង្រឹងការអនុវត្តច្បាប់ ដើម្បីកាត់បន្ថយបទល្មើសនេសាទ និងការកាប់បំផ្លាញទីជម្រក មានដូចជាព្រៃលិចទឹក និងកោងកាង និង ទី៤កសាងសមត្ថភាពមន្ត្រីសមភាគី និងសហគមន៍មូលដ្ឋានដើម្បីគាំទ្រដល់ការងារស្តារធនធានផលផលឡើងវិញ និងរួមចំណែកលើកស្ទួយជីវភាព និងសុវត្ថិភាពស្បៀងរបស់សហគមន៍។
អង្គការ WCS Cambodia បញ្ជាក់ថា កិច្ចព្រមព្រៀងនេះចាប់ផ្ដើមអនុវត្តចាប់ពីថ្ងៃទី ១ ខែកក្កដា ឆ្នាំ២០២២ និងបញ្ចប់នៅថ្ងៃទី៣១ ខែសីហា ឆ្នាំ២០២៣ និងបន្តរៀងរាល់១ឆ្នាំម្តង៕