កំពង់ឆ្នាំងៈ អង្គភាពប្រឆាំងអំពើពុករលួយបានជូនដំណឹងទៅអភិបាលខេត្តកំពង់ឆ្នាំង អំពីករណីអតីតអភិបាលខេត្តកំពង់ឆ្នាំងលោក ឈួរ ចាន់ឌឿន បានប្រគល់ដី ២២ កន្លែងជូនរដ្ឋវិញតាមលទ្ធផលស្រាវជ្រាវរបស់អង្គភាពប្រឆាំងអំពើពុករលួយ និងតាមការសម្រេចរបស់លោកនាយករដ្ឋមន្ត្រី ហ៊ុន សែន។ នេះបើតាមហ្វេសប៊ុក អង្គភាពប្រឆាំងអំពើពុករលួយនៅនៅយប់ថ្ងៃទី២២ ខែកក្កដានេះ។
ហ្វេសប៊ុកអង្គភាពនេះបានឱ្យដឹងថា លោក ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយបានដឹកនាំប្រតិភូអង្គភាពប្រឆាំងអំពើពុករលួយបើកកិច្ចប្រជុំនៅសាលាខេត្តកំពង់ឆ្នាំង នាថ្ងៃទី២០ និង ២១ ខែកក្កដា ឆ្នាំ ២០២២ ដើម្បីជូនដំណឹងជូនដល់លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ថាអតីតអភិបាលខេត្តកំពង់ឆ្នាំងលោកឈួរ ច័ន្ទឌឿន បានប្រគល់ដី ២២ កន្លែងជូនរដ្ឋវិញ តាមរយៈការស្រាវជ្រាវលើពាក្យប្តឹងជាច្រើន ប៉ុន្តែអង្គភាពនេះមិនបានបញ្ជាក់ច្បាស់ថា ដីទាំងនោះទំហំប៉ុន្មាននោះទេ។
អង្គភាពប្រឆាំងអំពើពុករលួយបញ្ជាក់ថាៈ ពាក្យប្តឹងទាំងនោះរួមមាន ករណីសំណុំរឿងនៅ កោះក្ទុម មានពាក្យប្តឹងលេខ ៤៥០/២០) សំណុំរឿងនៅ ទីទួលសុវត្ថិភាព (ពាក្យប្តឹងលេខ ០៤៣០/១៨) ករណីផ្លាស់ទីឡើងគោក (ឃុំឆ្នុកទ្រូពាក្យប្តឹងលេខ (០០៦៦/២០, ០២៧៤/២០ និងឃុំខុនរ៉ុង ពាក្យប្តឹងលេខ ០១៨៧/២១+០១៨៨/២១) សំណុំរឿងនៅ បឹងកន្ទប (ពាក្យប្តឹងលេខ ០៣៥០/២១) ករណីលោកស្រី ជៀម ច័ន្ទស៊ីម (ពាក្យប្តឹងលេខ ០៤៦១/២០) និងករណីប្លង់ជាន់គ្នា ស្រុកទឹកផុស (ពាក្យប្តឹង លេខ ២៥០/២២) ៕