ខេត្តព្រះសីហនុៈ អភិបាលខេត្តព្រះសីហនុ លោក គួច ចំរើន នៅរសៀលថ្ងៃទី ២៣ ខែកក្កដានេះ ប្រាប់ឱ្យមន្ត្រីពាក់ព័ន្ធទាំងអស់ពាក់ព័ន្ធការគ្រប់គ្រងមនុស្ស ត្រូវបង្កើនការយកចិត្តទុកដាក់គ្រប់គ្រងក្នុងដែនរបស់ខ្លួន បើសិនជាបានឃើញជនជាតិ នីហ្សេរីយ៉ា ម្នាក់ដែលកើតជំងឺអុតស្វា រត់គេចពីប្រទេសថៃ ចូលខេត្តព្រះសីហនុ ត្រូវរាយការណ៍ភ្លាម។
សារសំឡេងបន្ទាន់របស់ លោក គួច ចំរើន អភិបាលនៃគណៈអភិបាលខេត្តព្រះសីហនុ ប្រាប់ទៅមន្ត្រីពាក់ព័ន្ធទាំងអស់ក្នុងខេត្ត បានឱ្យដឹងថា ករណីបុរសជនជាតិនីហ្សេរីយ៉ាម្នាក់ដែលកើតជំងឺអ៊ុតស្វា បានរត់គេចពីការគ្រប់គ្រងរបស់អាជ្ញាធរនៃព្រះរាជាណាចក្រថៃ ចូលមកកាន់ខេត្តព្រះសីហនុ។ ហេតុនេះ ប្រសិនបើបានឃើញជននេះនៅកន្លែងណាត្រូវធ្វើការរាយការណ៍បន្ទាន់ ទៅមន្ទីរសុខាភិបាលដើម្បីចាត់វិធានការគ្រប់គ្រងបញ្ហាសុខភាពបានលឿនបំផុត។
លោកបញ្ជាក់ថា៖ «ក្នុងករណីបានឃើញបានដឹងព័ត៌មាននេះនៅកន្លែងណាគឺសូមឱ្យរាយការណ៍មកសុខាភិបាល ដើម្បីចាត់វិធានការណ៍គ្រប់គ្រងបញ្ហាសុខភាពឱ្យបានលឿនបំផុត។ សូមគ្រប់មន្ទីរអង្គភាពដែលមានការពាក់ព័ន្ធការគ្រប់គ្រងមនុស្ស អាជ្ញាធរមូលដ្ឋានកងកម្លាំងប្រដាប់អាវុធ ចាត់ចែងអនុវត្តឱ្យមានប្រសិទ្ធភាពក្នុងការគ្រប់គ្រងករណីនេះ»៕