ភ្នំពេញៈ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរាបានដឹកនាំសហការីចូលរួមកិច្ចប្រជុំបូកសរុបការងាររយៈពេល ៣០ ឆ្នាំ និងការពិភាក្សាទស្សនវិស័យរយៈពេល ១០ឆ្នាំ ខាងមុខទៀតរបស់ អាយស៊ីស៊ីអង្គរ (២០២៣-២០៣៣) នៅទីស្នាក់ការក្រសួងអឺរ៉ុប និងកិច្ចការអន្តរជាតិ នៅទីក្រុងប៉ារីស ប្រទេសបារាំង នៅថ្ងៃទី ២១ ខែកក្កដា។
ហ្វេសប៊ុកក្រសួងវប្បធម៌ បានឱ្យដឹងនៅថ្ងៃនេះថា អង្គប្រជុំដ៏មានសារៈសំខាន់នោះ មានការអញ្ចើញចូលរួមពី លោក ហង់ ពៅ អគ្គនាយកអាជ្ញាធរជាតិអប្សរា លោក បុង សុវត្ថិ ឯកអគ្គរាជទូត ប្រតិភូអចិន្ត្រៃយ៍កម្ពុជាប្រចាំអង្គការយូណេស្កូ និងភាគីពាក់ព័ន្ធសំខាន់មួយចំនួនទៀតដូចជា ភាគីតំណាងប្រទេសបារាំង ដឹកនាំដោយលោក Matthieu PEYRAUD ក្រសួងការបទេសបារាំង លោក Bruno FAVEL លោកស្រី Francine d''ORGEVAL តំណាងក្រសួងវប្បធម៌បារាំង ភាគីតំណាងប្រទេសជប៉ុន ដឹកនាំដោយ លោក MIZUTANI Toshihiko លេខាទីមួយ ប្រតិភូអចិន្ត្រៃយ៍នៃប្រទេសជប៉ុនប្រចាំអង្គការយូណេស្កូ លោកស្រី Nao HAYASHI តំណាងអង្គការយូណេស្កូទីក្រុងប៉ារីស។
រីឯតំណាងគណៈកម្មាធិការ អាយស៊ីស៊ី-អង្គរ មានការអញ្ជើញចូលរួមដោយ លោកសាស្ត្រាចារ្យ Azedine BESCHAOUCH លេខាធិការវិទ្យាសាស្ត្រអចិន្ត្រៃយ៍នៃគណៈកម្មាធិកា រអាយស៊ីស៊ី-អង្គរ និងលោកសាស្ត្រាចារ្យ Mounir BOUCHENAKI អ្នកជំនាញចំពោះកិច្ចសម្រាប់ការអភិរក្សនៃគណៈកម្មាធិការ អាយស៊ីស៊ី-អង្គរ។
ក្រសួងវប្បធម៌បញ្ជាក់ថា នៅក្នុងសម័យប្រជុំពេញអង្គលើកទី ២៨ នៃគណៈកម្មាធិកា រអាយស៊ីស៊ី-អង្គរ នាទីស្នាក់ការអាជ្ញាធរជាតិអប្សរា នៅខេត្តសៀមរាប សហប្រធាននៃគណៈកម្មាធិការនេះគឺប្រទេស បារាំង និង ជប៉ុន បានប្រកាសយ៉ាងឱឡារិកអំពីការបន្តបេសកកម្មជ្រោមជ្រែងចំនួន ១០ ឆ្នាំបន្ថែមទៀតដល់កម្ពុជា ក្នុងកិច្ចការអភិរក្ស និង អភិវឌ្ឍន៍ប្រកបដោយចីរភាពរមណីយដ្ឋានបេតិកភណ្ឌពិភពលោកអង្គរ៕