ភ្នំពេញៈ បុរសជនជាតិនីហ្សេរីយ៉ាដែលកើតជំងឺអុតស្វា រត់គេចពីប្រទេសថៃ ចូលមកប្រទេសកម្ពុជា ត្រូវបានបញ្ជូនទៅមន្ទីរពេទ្យមិត្តភាពខ្មែរ-សូវៀត (ពេទ្យរុស្ស៊ី) នៅយប់ថ្ងៃទី ២៣ ខែកក្កដានេះ ក្រោយកម្លាំងសមត្ថកិច្ចរកឃើញ និងឃាត់ខ្លួននៅម្ដុំផ្សារដើមថ្កូវ ខណ្ឌចំការមន រាជធានីភ្នំពេញ។ នេះបើតាមលោក ថេង សុថុល អភិបាលខណ្ឌចំការមន។
លោកអភិបាលខណ្ឌចំការមនបានឱ្យដឹងថា បុរសជនជាតិ នីហ្សេរីយ៉ា ដែលកើតជំងឺអុតស្វា រត់គេចពីប្រទេសថៃ ចូលមកប្រទេសកម្ពុជា ហើយត្រូវសមត្ថកិច្ចឃាត់ខ្លួនបាននៅព្រលប់ថ្ងៃទី ២៣ ខែកក្កដា នៅម្តុំផ្សារដើមថ្កូវ ត្រូវបានបញ្ជូនទៅមន្ទីរពេទ្យមិត្តភាពខ្មែរ-សូវៀត (ពេទ្យរុស្ស៊ី) ដើម្បីមន្ត្រីសុខាភិបាលអនុវត្តវិធានការបន្តទៅតាមជំនាញ។
លោកថ្លែងថា៖ «ឥឡូវយកទៅមន្ទីរពេទ្យរុស្ស៊ីហើយ ដើម្បីមន្ត្រីជំនាញសុខាភិបាលធ្វើការបន្តទៀត យើងបញ្ជូនទៅមុននេះប្រហែលកន្លះម៉ោង [ម៉ោង ៧យប់]»។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលអះអាងនៅថ្ងៃទី ២៣ ខែកក្កដានេះថា ជនជាតិ នីហ្សេរីយ៉ា រូបនោះមានកើតជំងឺអុតស្វាបានធ្វើរោគវិនិច្ឆ័យដោយអាជ្ញាធរសុខាភិបាល ថៃ ហើយដែលបានគេចខ្លួនតាំងពីយប់ថ្ងៃទី២២ ខែកក្កដា ឆ្នាំ២០២២៕