ភ្នំពេញៈ លោក សៀម ភ្លុក អតីតតំណាងស្ថាបនិកគណបក្ស បេះដូងជាតិ ដែលកំពុងជាប់ឃុំក្នុងពន្ធនាគារ ក្រោមបទចោទ «ក្លែងបន្លំ ឯកសារចុះបញ្ជីគណបក្សបេះដូងជាតិនៅក្រសួងមហាផ្ទៃ» នៃសំណុំរឿងព្រហ្មទណ្ឌ លេខ៥១៩៩ ចុះថ្ងៃទី ០១ ខែធ្នូ ឆ្នាំ ២០២១ ស្នើសុំ លោក ស ខេង រដ្ឋមន្ត្រីក្រសួងមហាផ្ទៃ «ទម្លាក់ចោលការចោទប្រកាន់»។
អ្នកនាំពាក្យក្រសួងមហាផ្ទៃចាត់ទុកការស្នើសុំឱ្យលោក ស ខេង «ទម្លាក់ចោលការចោទប្រកាន់»នេះថា ជារឿងមិនត្រឹមត្រូវ ខណៈដែលសំណុំរឿងនេះកំពុងស្ថិតនៅក្នុងដៃតុលាការ។
យោងតាមលិខិតរបស់ លោក សៀម ភ្លុក ចុះថ្ងៃទី២១ ខែកក្កដា បានសរសេររៀបរាប់ថា កាលពីអំឡុងពាក់កណ្ដាលឆ្នាំ ២០២១ រូបលោក និងបញ្ញវន្តខ្មែរមួយចំនួន ដែលមានគោលបំណង និងឆន្ទៈ ដូចគ្នា បានរួមគ្នាបង្កើតគណបក្សនយោបាយមួយ ដែលមានឈ្មោះថា «គណបក្សបេះដូងជាតិ » ដើម្បីចូលរួមកសាងកម្ពុជា ឱ្យបានជាប្រទេសប្រជាធិបតេយ្យ សេរី ពហុបក្ស និងជានីតិរដ្ឋ មានការគោរពច្បាប់ គោរពសិទ្ធិមនុស្ស។
លោកសរសេរបន្តថា ប្រជាពលរដ្ឋជាម្ចាស់អំណាច អាចប្រើអំណាច របស់ខ្លួន តាមរយៈរដ្ឋសភា ព្រឹទ្ធសភា រាជរដ្ឋាភិបាល និងសាលាជម្រះក្ដី។ មានការបែងចែក អំណាចដាច់ពីគ្នា រវាងអំណាចនីតិប្បញ្ញត្តិ អំណាចនីតិប្រតិបត្តិ និងអំណាចតុលាការ។ ក្នុងនាមលោកជាតំណាងស្ថាបនិក បានរៀបចំលក្ខន្តិកៈ និងស្នាមមេដៃប្រជាពលរដ្ឋដែលគាំទ្រគណបក្ស ដាក់ជូនក្រសួងមហាផ្ទៃ ដើម្បីចុះបញ្ជីគណបក្សបេះដូងជាតិ។
បើតាមលោក សៀម ភ្លុក ក្រោយពីទទួលបានឯកសារ អត្តសញ្ញាណ និងស្នាមមេដៃប្រជាពលរដ្ឋហើយ ក្រសួង មហាផ្ទៃ បានធ្វើការស្រាវជ្រាវលើឯកសារអត្តសញ្ញាណ និងស្នាមមេដៃទាំងនោះ រកឃើញថា មានការផ្តិតមេដៃជំនួស មានការក្លែងបន្លំអត្តសញ្ញាណ និងការផ្តិតមេដៃ ធ្វើឱ្យខូចគុណភាព។
លោកសរសេរបន្តថា៖ «ខ្ញុំបាទមិនបានក្លែងបន្លំឯកសារ ឬស្នាមមេដៃប្រជាពលរដ្ឋទេ ហើយ ខ្ញុំបាទ ក៏មិនមានចេតនា ក្លែងបន្លំឯកសារ ឬស្នាមមេដៃប្រជាពលរដ្ឋ នោះដែរ។ ក្នុងករណីមានការក្លែងបន្លំមែន គឺជាកំហុសដោយអចេតនា ខ្ជីខ្ជា មិនមែនជាចេតនាក្នុងការ ប្រព្រឹត្តបទល្មើលទេ ហើយក៏មិនបានបង្កព្យសនកម្មដល់ស្ថាប័នណាមួយឡើយ»។
លោក សៀម ភ្លុក បញ្ជាក់ទៀតថា ក្រសួងមហាផ្ទៃ បានបដិសេធការចុះបញ្ជីគណបក្សបេះដូងជាតិ គឺជាទណ្ឌកម្មសមល្មម សម្រាប់គណបក្សបេះដូងជាតិហើយ ប៉ុន្តែក្រសួង ថែមទាំងបានចោទប្រកាន់រូបលោក មកតុលាការ និងចាប់ឃុំខ្លួនរូបលោកថែមទៀត គឺជាការផ្តល់ទណ្ឌកម្មធ្ងន់ធ្ងរណាស់ សម្រាប់រូបលោក ។
លោក ជូង ជូងី មេធាវីការសិទ្ធិ ឱ្យលោកសៀម ភ្លុក ប្រាប់ភ្នំពេញប៉ុស្តិ៍នៅថ្ងៃទី ២៤ ខែកក្កដាថា លោក បានយកលិខិតរបស់ លោក សៀម ភ្លុក នេះ ដាក់នៅទីស្តីការ ក្រសួងមហាផ្ទៃរួចហើយ កាលពីថ្ងៃទី ២២ ខែកក្កដា ដើម្បីឱ្យលោក ស ខេង ទម្លាក់ការចោទប្រកាន់មកលើកូនក្តីរបស់លោក ព្រោះកន្លងមកនេះ លោក មើលឃើញថា លោក ស ខេង មានចិត្តទូលាយច្រើន ។
លោកបន្តថា ការដាក់បន្ទុក និងចោទប្រកាន់មកលើកូនក្តីរបស់លោក គឺមន្ត្រីថ្នាក់ក្រោម មិនមែនជាគំនិតផ្ទាល់របស់លោក ស ខេងនោះទេ ។ លោក រំពឹងថា បើសិនជាលោក ស ខេង ដែលជាប្រមុខក្រសួងមហាផ្ទៃ ប្រើប្រាស់ចិត្តទូលាយរបស់លោក កូនក្តីរបស់លោក នឹងអាចរួចផុតពីការចោទប្រកាន់ ។
លោកថ្លែងថា៖ « ខ្ញុំរំពឹងថា លិខិតស្នើសុំនេះ នឹងបានទៅដល់ដៃ សម្តេច ស ខេង ពីព្រោះលិខិតនេះ ដាក់គោរពស្នើសុំផ្ទាល់ទៅសម្តេច ក្រឡាហោម បើសិនជាមន្ត្រីណាមិនបញ្ជូនទៅ ឬបំបិទចោល បានន័យថា ថ្លើមពាសមេឃពេកហើយ ដូចវាហួសហេតុពេកហើយ ។ អ៊ីចឹងខ្ញុំរំពឹងថា នឹងទៅដល់សម្តេច»។
លោក ខៀវ សុភ័គ អ្នកនាំពាក្យក្រសួងមហាផ្ទៃ ប្រាប់ភ្នំពេញប៉ុស្តិ៍នៅថ្ងៃទី ២៤ ខែកក្កដាថា ការស្នើសុំឱ្យលោក ស ខេង ទម្លាក់ការចោទប្រកាន់ គឺមិនត្រឹមត្រូវនោះទេ ព្រោះសំណុំរឿងរបស់លោក សៀម ភ្លុក នេះ មានការចោទប្រកាន់ ពីសាលា ដំបូងរាជធានីភ្នំពេញ។ ដូច្នេះ ករណីនេះ ត្រូវអនុវត្តទៅតាមផ្លូវតុលាការ ។
លោកបន្តថា ការស្នើសុំនេះទៀត សោត គឺទាំងលោក សៀម ភ្លុក និង ទាំងមេធាវី កំពុងតែទាញ លោក ស ខេង ចូលទៅក្នុងអន្ទាក់ ក្នុងសំណុំរឿងរបស់ពួកគេ ។ លោកបញ្ជាក់ថា៖ «លោក សៀម ភ្លុក ជាមនុស្សឆ្លាត»។
លោក លិ សុខា ចៅក្រមស៊ើបសួរសាលាដំបូងរាជធានី ភ្នំពេញកាលពីថ្ងៃ ២៧ ខែមេសា ឆ្នាំ ២០២២ បានសម្រេចចេញដីកាឃុំខ្លួន លោក សៀម ភ្លុក នៅមណ្ឌលអប់រំកែប្រែទី ១ (ម១) នៃពន្ធនាគារព្រៃស ដោយចោទប្រកាន់ ២បទល្មើស រួមមាន បទក្លែងបន្លំ និងបទប្រើប្រាស់លិខិតក្លែង ប្រព្រឹត្តនៅរាជធានីភ្នំពេញ កាលពីអំឡុងឆ្នាំ ២០២១ ដែលជាបទល្មើស មានចែង និងឱ្យផ្តន្ទាទោសតាមមាត្រា ៦២៦, មាត្រា ៦២៧ និងមាត្រា ៦២៨ នៃក្រមព្រហ្មទណ្ឌ។
ក្រសួងមហាផ្ទៃកាលពីថ្ងៃទី ១៦ ខែវិច្ឆិកា ឆ្នាំ ២០២១ បានបដិសេធចំពោះសំណើស្នើសុំចុះបញ្ជី របស់គណបក្សបេះដូងជាតិ ក្នុងបញ្ជីគណបក្សនយោបាយ បន្ទាប់ពីរកឃើញថា ការផ្តិតស្នាមមេដៃរបស់សមាជិក ដើម្បីគាំទ្រក្នុងការសុំចុះបញ្ជី មានចេតនាទុច្ចរិត ដោយមានការផ្តិតស្នាមមេដៃជំនួស ការក្លែងបន្លំអត្តសញ្ញាណបុគ្គល និងការផ្ដិតមេដៃធ្វើឱ្យខូចគុណភាព ដើម្បីបង្កើនបរិមាណចំនួនសមាជិក៕