.jpg)
លោក ស ខេង ថ្លែងក្នុងពិធីសម្ពោធសាលារៀននៅខេត្តកណ្តាលពីថ្ងៃទី ២៣ កក្កដា។រូប Sar Kheng's FB
កណ្តាលៈ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃលោក ស ខេង បានប្រតិកម្មទៅនឹងរបាយការណ៍របស់រដ្ឋាភិបាលអាមេរិក ដែលបានចាត់ចំណាត់ថ្នាក់កម្ពុជាទៅក្នុងចំណាត់ថ្នាក់លេខ ៣ ចុងក្រោយគេពាក់ព័ន្ធនឹងករណី ដែលប្រទេសមហាអំណាចមួយនេះថា កម្ពុជាគ្មានឆន្ទៈក្នុងការប្រយុទ្ធប្រឆាំងអំពើជួញដូរមនុស្ស។
ការប្រតិកម្មនេះធ្វើឡើង ខណៈលោកចូលរួមក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារសិក្សាសាលាបឋមសិក្សា ហ៊ុន សែន ថ្នល់ទទឹង សាលារៀនខ្មែរ-ចិន ចេង ម៉េង និងសមិទ្ធផលនានា ស្ថិតក្នុងភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល នាព្រឹកថ្ងៃទី ២៣ ខែ កក្កដា ឆ្នាំ ២០២២ និងនៅក្រោយពេលក្រសួងការបរទេសអាមេរិកបានទម្លាក់ចំណាត់ថ្នាក់កម្ពុជាពីលេខ ២ មកលេខ ៣។
លោកថ្លែងថា ក្នុងនាមលោកប្រធានគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លោកមានការភ្ញាក់ផ្អើលយ៉ាងខ្លាំង ចំពោះការសម្រេចរបស់រដ្ឋាភិបាលអាមេរិកដាក់កម្ពុជាក្នុងចំណាត់ថ្នាក់លេខ ៣ ដែលថា កម្ពុជាគ្មានឆន្ទៈក្នុងការប្រយុទ្ធប្រឆាំងអំពើជួញដូរមនុស្ស។ ប៉ុន្តែកន្លងមក កម្ពុជាបានអនុវត្តយ៉ាងខ្ជាប់ខ្ជួន ដោយក្នុងនោះ កម្ពុជាមានទាំងច្បាប់ មានគោលនយោបាយ និងមានយន្តការក្នុងការអនុវត្ត។
លោកបញ្ជាក់ថា លោកមានការបារម្ភលើលក្ខខណ្ឌនៃការវាយតម្លៃ ឬមនោសញ្ចេតនានៃការវាយតម្លៃនេះ ប៉ុន្តែកម្ពុជានៅតែមានឆន្ទៈ និងនៅតែបន្តធ្វើការងារនេះ ហើយនៅតែបន្តជំរុញកិច្ចសហប្រតិបត្តិការជាមួយដៃគូទាំងអស់ដោយស្មោះជាមួយគ្នា។
លោក ស ខេង ថ្លែងថា៖ «យើងនិយាយតាមរបៀបសាមញ្ញថា អ្នកមកជួយខ្ញុំ ដើម្បីជួយឱ្យខ្ញុំឈ្នះ តែបើខ្ញុំចាញ់ មានន័យថា អ្នកឯងក៏ចាញ់ដែរ មិនមែនចាញ់តែខ្ញុំទេ។ មកជួយឱ្យល្អ តែបើធ្វើមិនបានល្អ អាហ្នឹង អ្នកឯងក៏អាក្រក់ដែរ។ ថាអ៊ីចឹងទៅចុះ...។ ប្រទេសខ្លះដូចជាធ្វើការងារនេះមិនបានល្អទេ តែបែរជាបានពិន្ទុល្អវិញ»។
ទោះយ៉ាងណា លោកសង្កត់ធ្ងន់ថា កម្ពុជានឹងមិនដកថយឡើយចំពោះការប្រយុទ្ធប្រឆាំងនឹងអំពើជួញដូរមនុស្សនេះ ផ្ទុយទៅវិញនឹងខិតខំរកឱ្យឃើញចំណុចខ្សោយ ដើម្បីដោះស្រាយ ជាពិសេសធ្វើកិច្ចសហប្រតិបត្តិការជាមួយនឹងសហរដ្ឋអាមេរិក ដើម្បីស្តារមុខមាត់ឡើងវិញលើកិច្ចការជួញដូរមនុស្សនេះ។
លោកស្រី ជូ ប៊ុនអេង អនុប្រធានអចិន្រៃ្តយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គជបជ) ប្រាប់ក្រុមអ្នកសារព័ត៌មាននៅថ្ងៃទី ២១ កក្កដាថា ការទម្លាក់ចំណាត់ថ្នាក់កម្ពុជាមកទី ៣ ក្នុងការប្តេជ្ញាចិត្តប្រយុទ្ធប្រឆាំងអំពើជួញដូរមនុស្សពីសំណាក់ក្រសួងការបរទេសសហរដ្ឋអាមេរិក គឺជារឿងអយុត្តិធម៌សម្រាប់កម្ពុជា។
លោកស្រីថ្លែងថា៖ «ជារឿងដែលខកចិត្ត ដែលការវាយតម្លៃ វាខុសពីការរំពឹងទុក ព្រោះទាំងរដ្ឋាភិបាល ដៃគូជាតិ អន្តរជាតិ បានដឹងច្បាស់អំពីកិច្ចខិតខំប្រឹងប្រែងរួមគ្នាក្នុងសកម្មភាពប្រយុទ្ធប្រឆាំងអំពើជួញដូរមនុស្ស និងទទួលលទ្ធផលជាច្រើនក្នុងឆ្នាំកន្លងទៅ»។
បើតាមលោកស្រី ជូ ប៊ុនអេង ក្នុងនាមជាដៃគូសហការដែលបានប្តេជ្ញាចិត្តរួមគ្នា ក្នុងការធ្វើកិច្ចសហប្រតិបត្តិការ ដើម្បីលុបបំបាត់អំពើជួញដូរមនុស្ស ដូច្នេះចំណាត់ថ្នាក់នេះជាការទទួលខុសត្រូវរួមមិនអាចប្រកែកបាន។ ការដាក់ចំណាត់ថ្នាក់លេខ ៣ ស្មើនឹងកម្ពុជាមិនបានធ្វើអ្វីសោះ ប៉ុន្តែជារឿងមិនពិត ហើយនាំដល់ការដាក់ទណ្ឌកម្មថែមទៀត គឺជារឿងអយុត្តិធម៌មិនអាចទទួលយកបាន។
លោកស្រីចោទជាសំណួរថា តើស័ក្តិសមដែរទេ ដែលកម្ពុជាត្រូវបានចាត់ចូលចំណាត់ថ្នាក់ទី ៣ និងបញ្ជីខ្មៅ ហើយប្រឈមនឹងការដាក់ទណ្ឌកម្ម ក្នុងពេលដែលទាំងអស់គ្នាប្រឹងប្រែងមិនឈប់ឈរបែបនេះ?
លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការការពារសិទ្ធិមនុស្ស លីកាដូ ប្រាប់ភ្នំពេញប៉ុស្តិ៍នៅថ្ងៃទី ២៤ ខែកក្កដា ថា រដ្ឋាភិបាលកម្ពុជាមានសិទ្ធិក្នុងការប្រតិកម្មទៅនឹងរបាយការណ៍នេះ ដើម្បីការពារខ្លួន។ លោកថា ក្នុងនាមអង្គការសង្គមស៊ីវិលមានការសោកស្តាយដែលកម្ពុជាបានរអិលធ្លាក់ពីចំណាត់ថ្នាក់លេខ ២ មកដល់លេខ ៣ ដែលនេះគឺជាចំណុចមួយមិនល្អសម្រាប់កម្ពុជា។
លោកថ្លែងថា៖ «ចំណុចនេះបានធ្វើឱ្យកម្ពុជាមានប្រតិកម្មខ្លាំង ពីព្រោះវាជះឥទ្ធិពល និងប៉ះពាល់ដល់មុខមាត់កម្ពុជា ហើយមួយរយៈចុងក្រោយនេះ យើងក៏បានឃើញថា ទាំងសារព័ត៌មានជាតិ និងអន្តរជាតិ ចុះផ្សាយជាច្រើនទាក់ទងនឹងអំពើជួញដូរមនុស្សនៅកម្ពុជា»។
បើតាមលោក អំ សំអាត ការប្រតិកម្មរបស់កម្ពុជា គឺជារឿងមួយ ប៉ុន្តែអ្វីដែលសំខាន់ គឺរាជរដ្ឋាភិបាល គួរតែខិតខំប្រឹងប្រែងពង្រឹងសមត្ថភាពបន្ថែមទៀត ក្នុងការទប់ស្កាត់អំពើជួញដូរមនុស្ស តាមរយៈកិច្ចសហការជាមួយប្រទេសជាដៃគូ ទាំងនៅក្នុងតំបន់ និងពិភពលោក ពីព្រោះបច្ចុប្បន្ន បច្ចេកវិទ្យាកាន់តែទំនើប និងរំហូរជនបរទេសចូលមកប្រទេសកម្ពុជាក៏ច្រើនដែរ អាចនឹងធ្វើឱ្យមានការជួញដូរមនុស្សជាលក្ខណៈប្រព័ន្ធ៕
