ភ្នំពេញៈ​គិត​ត្រឹម​ថ្ងៃទី​ ២៤ ​ខែ កក្កដា ឆ្នាំ​ ២០២២ ​ការងារ​ដាំ​ដុះ​ស្រូវ​រដូវវស្សា​បាន​សម្រេច​ ៧៧,០៥ ​ភាគ​រយ ស្មើ​នឹង​ ២,០២​ លាន​ហិក​តា ​នៃ​ផែន​ការ​ផ្ទៃដី​ដាំ​ដុះ​ដំណាំ​ស្រូវ​សរុប ​២,៦​ លាន​ហិកតា​។​ នេះ​បើតាម​ការ​ប្រាប់​ឱ្យ​ដឹង​ពី​លោក​ គង់ គា ប្រធាន​នាយក​ដ្ឋាន​ដំណាំ​ស្រូវ​។

​ថ្វីបើ​ដូច្នេះ​ក្ដី លោក គង់ គា បាន​ថ្លែង​​ថា ល្បឿន​ការងារ​ដាំ​ដុះ​ស្រូវ​រដូវ​វស្សា​ឆ្នាំនេះ​មាន​ភាព​យឺត​យ៉ាវ​ជាង​ឆ្នាំមុន​ប្រមាណ​ ៤២០​ ពាន់​ហិក​តា ​បើ​ធៀប​នឹង​​រយៈ​ពេល​ដូចគ្នា​នេះ​។ ភាព​យឺត​យ៉ាវ​នេះ​បណ្ដាលមកពី​កត្តា​អាកាស​ធាតុ​ដែល​មាន​ភ្លៀង​ធ្លាក់​ខ្លាំង​ជា​បន្ត​បន្ទាប់​តាំងពី​ពាក់​កណ្ដាល​ខែ​មេសា ដែល​ធ្វើឱ្យ​ដីស្រែ​កសិករ​នៅតាម​បណ្ដា​ខេត្ត​មួយ​ចំនួន​ត្រូវ​ទឹក​ដក់​និង​លិច​លង់​មិន​អាច​​ចល័ត​គ្រឿង​ចក្រ​ភ្ជួរ​រាស់​ និង​ដាំ​ដុះ​បាន​។​

​លោក​ថ្លែងថា​៖ «​យោង​តាម​ការចុះ​ពិនិត្យ​ស្ថាន​ភាព​ជាក់​ស្ដែង ការ​បង្ក​បង្កើន​ផល​ស្រូវ​រដូវវស្សា​របស់​ប្រជា​កសិករ នៅ​ឆ្នាំ​នេះ ​ថ្វីដ្បិត​តែ​មាន​ភាព​យឺត​យ៉ាវ​បន្តិច​ក្ដី ប៉ុន្តែ​ដំណាំ​ស្រូវ​មានការ​លូត​លាស់​ល្អ ដែល​យើង​អាច​រំពឹង​ថានឹង​ផ្ដល់​ទិន្នផល​ខ្ពស់​ជាង​ឆ្នាំ​មុន ហើយ​ស្រូវ​ដែល​កសិករ​ដាំ​ដុះ​នៅ​ក្នុង​ឆ្នាំនេះ​ភាគ​ច្រើន​ជា​ប្រភេទ​ស្រូវ​ប្រណីត​»​។​

​បើតាម​លោក ​គង់ គា កន្លង​មក ក្រសួង​កសិកម្ម រុក្ខាប្រ​មាញ់​ និង​នេសាទ​ បាន​ជំរុញ​ឱ្យ​កសិករ​ដាំ​ដុះ​ពូជ​ស្រូវ​ប្រណីត​ដូចជា ស្រូវ​សែន​ពិដោរ​សែន​ក្រអូប​ ០១ ផ្កា​រំដួល ផ្កា​រំដេង ផ្ការមៀត និង​ផ្កា​មាលតី...ជា​ដើម ដើម្បី​ធានា​បាន​នូវ​និរ​ន្ត​រ​ភាព​ស្បៀង​អាហារ និង​សម្រាប់​គាំទ្រ​គោលន​យោបាយ​នាំចេញ​ស្រូវ​អង្ករ​ទៅក្នុង​ទីផ្សារ​ក្រៅប្រ​ទេស។ ក្នុង​នោះ​ប្រភេទ​ស្រូវ​សែន​ពិដោរ ​និង​ស្រូវ​សែន​ក្រអូប​ ០១ ជា​ប្រភេទ​ស្រូវ​មិន​ប្រកាន់​រដូវ​ដែល​ធន់​ទ្រាំ​គ្រប់​អា​កាស​ធាតុ​និង​កត្តា​ចង្រៃ​ផ្សេងៗ ប៉ុន្តែ​អាច​ដាំ​បានតែ​ក្នុង​ដីស្រែ​ដែល​នៅ​ទី​ខ្ពស់មិន​ដក់​ទឹក​ខ្លាំងប៉ុណ្ណោះ​។ ចំណែក​ប្រភេទ​ស្រូវ​ផ្កា​រំដួល​ ផ្កា​រំដេង​ ផ្កា​រមៀត​និងផ្កាមាលតី ជា​ស្រូវ​ប្រកាន់​រដូវ ​សម្រាប់​ដាំ​តែ​ក្នុង​រដូវវស្សា​និង​ក្នុង​ដីស្រែ​ទីជម្រៅ ព្រោះ​វា​អាច​ធន់​ទ្រាំ​នឹង​ទឹក​បាន​យូរ​។ ពូជ​ស្រូវ​ទាំង​នេះ ​អាច​ផ្ដល់​ផល​ជា​មធ្យម​ចន្លោះ​ពី​ ៣,៥ ​តោន​ ដល់ ៥,៥​ តោន ក្នុង ១ ហិកតា​ អាស្រ័យ​ដោយ​ការ​ថែទាំ​ដាក់​ជី​បាន​ត្រឹម​ត្រូវ​តាម​ស្ដង់ដា​បច្ចេក​ទេស ដែល​បាន​ណែនាំ​ដោយ​មន្ត្រី​ជំនាញ​។

ទន្ទឹម​នឹង​នេះដែរ​ លោក​ គង់ គា បាន​អំពាវ​នាវ​ដល់​កសិករ​ដែល​នៅ​មិន​ទាន់​ចាប់​ផ្ដើមដាំ​ដុះ​ស្រូវ ​ឱ្យប្រញាប់​រូតរះ​ភ្ជួរ​រាស់​និង​សាប​ព្រោះ​ពូជ​ស្រូវ​ដើម្បី​ផ្គត់​ផ្គង់​ជីវភាព​គ្រួសារ ខណៈ​បច្ចុប្បន្ន​នេះអង្គការ​ស្បៀង​អាហារ​ពិភព​លោក​បាន​ប្រកាស​ពី​កង្វះ​ស្បៀង​អាហារ​ដោយ​សារតែ​វិបត្តិ​សង្គ្រាមរវាង​រុស្ស៊ី​និង​អ៊ុយ​ក្រែ​ន​។​

​លោក​ថ្លែង​ថា​៖ «​យើង​ដឹង​ហើយ​ថា​វិបត្តិ​សង្គ្រាម​រវាង​រុស្ស៊ី និង​អ៊ុយ​ក្រែ​នគឺ​ប៉ះពាល់​ល់​សន្តិ​សុខ​ស្បៀងអាហារ​ពិភពលោក​ខ្លាំងណាស់​ ប៉ុន្តែ​វា​ជា​ឱកាស​មួយ​សម្រាប់​កម្ពុជា​យើង​ក្នុង​ការ​ផលិត​ស្បៀង បើ​យើង​ផលិត​បាន​កាន់តែច្រើន​គឺ​កាន់តែ​ល្អ​។អ៊ីចឹង​សូម​បងប្អូន​ប្រជាកសិកររូតរះ​ដាំ​ដុះ​ស្រូវកុំ​ទុក​ដី​ចោល​ឱ្យសោះ ព្យាយាម​ដាំ​ដុះ​ឱ្យបាន​ច្រើន​ចៀស​វាង​មាន​ដីស្រែ​ តែ​ទិញ​អង្ករ​របស់​គេ​មក​ហូប​»​។

​ជុំវិញ​ការ​អំពាវ​នេះ​ប្រជា​កសិករ​នៅ​ខេត្ត​សៀម​រាប លោក ​ឈាវ ​ហុង អាយុ ​៦៥ ​ឆ្នាំ មាន​លំនៅ​ក្នុងភូមិ​សំរោង​ខាង​ត្បូង ឃុំ​សំរោង ស្រុក​សូទ្រ​និគម បាន​ប្រាប់ ​ភ្នំពេញ​ ប៉ុស្តិ៍​ថា គ្រួសារ​របស់​លោក បាន​ដាំ​ដុះ​ស្រូវ​សែន​ពិដោរលើ​ផ្ទៃដី​៣​ហិកតាដែល​មក​ទល់​ពេល​នេះ​ស្រូវបាន​ចាប់​ផ្ដើម​ចេញ​កួរ​ជា​បណ្ដើរៗ​ហើយ​។​

​លោក​ ហុង បាន​ថ្លែង​ថា​៖ «​អ្នកភូមិ​របស់​លោក​និយម​ដាំ​ស្រូវ​សែន​ពិដោរក្នុង​រដូវប្រាំងនិង​ដើមរដូវ​វស្សា​។ លុះ​ដល់​រដូវវ​ស្សា​ពេញ​លេញ​ពិសេស​ចាប់ពី​ចុងខែ​កក្កដា​ ឬ​ដើម​ខែ​សីហា​ទៅ គឺ​ពួក​យើង​ដាំ​ស្រូវ​ផ្កា​រំដួល ព្រោះ​វា​អាច​ធន់​ទ្រាំ​នឹង​ទឹក​បាន​យូរ​»​។

​បើតាម​លោក​ ហុង នៅ​ក្នុង​មុខរបរ​ធ្វើស្រែ​នេះ គឺ​គាត់​មិន​ប្រើ​កម្លាំងគោ​ក្របី​អូស​ទាញ​នោះ​ទេ គឺ​គាត់​ប្រើ​គ្រឿង​ចក្រ​សុទ្ធ​សាធ ចាប់​តាំង​ពី​ការ​ភ្ជួរ​រាស់​ ពង្រាប​ដីស្រែ ដាំ​​ដុះ​ស្រូវ និង​ការប្រមូល​ផល​ស្រូវ ​ដោយ​គ្រួសារ​របស់​គាត់​មាន​ត្រាក់​ទ័រ ម៉ា​ស៊ី​ដាំ​ស្រូវ ​ម៉ាស៊ីន​ច្រូត និង​ម៉ាស៊ីន​មូរ​ចំបើង​និង​គល់​ជញ្ជ្រាំង​ស្រូវ សម្រាប់​ប្រើ​ប្រាស់​ខ្លួន​ឯង​ផង​និង​សម្រាប់​ស៊ី​ឈ្នួល​ភ្ជួរ​រាស់​ដាំ​ដុះ ច្រូត​កាត់​ឱ្យអ្នក​ភូមិ​នៅ​ក្នុង​សហ​គមន៍​របស់​គាត់​ផង​ដែរ​៕