.jpg)
សកម្មភាពដាំកូនដើមកោងកាង ក្នុងសហគមន៍នេសាទភូមិថ្មី នៅខេត្តកែប។ រូបថត រដ្ឋបាលខេត្តកែប
ភ្នំពេញៈ ក្រសួងបរិស្ថានសហការជាមួយរដ្ឋបាលខេត្តកែប និងក្រុមហ៊ុនវីតាល់ នឹងធ្វើការដាំដើមកោងកាងចំនួន ៣ ០០០ ដើម ក្នុងទិវាអន្តរជាតិសម្រាប់ការអភិរក្សប្រព័ន្ធអេកូឡូស៊ីព្រៃកោងកាង នៅថ្ងៃទី ២៦ ខែ កក្កដា ឆ្នាំ ២០២២ នេះ ក្នុងសហគមន៍នេសាទភូមិថ្មី ស្ថិតក្នុងសង្កាត់ព្រៃធំ ក្រុង-ខេត្តកែប។
លោក នេត្រ ភក្ត្រា រដ្ឋលេខាធិការ និងអ្នកនាំពាក្យក្រសួងបរិស្ថានបានឱ្យដឹងនៅថ្ងៃទី ២៥ ខែកក្កដាថា ការដាំដើមកោងកាងនេះដើម្បីបង្កើនចំនួនដើមកោងកាងនៅកម្ពុជា ជាពិសេសនៅតំបន់ឆ្នេរសមុទ្រដើម្បីការពារ ប្រព័ន្ធអេកូឡូស៊ី និងបង្កើនជីវចម្រុះនៅតំបន់សមុទ្រ។ មួយវិញទៀតដើម្បីជួយការពារគ្រោះមហន្តរាយនានាដូចជាខ្យល់ព្យុះ និងការប្រែប្រួលអាកាសធាតុជាដើម។
លោកថ្លែងថា៖ «យើងដាំជាមួយសហគមន៍នៅក្នុងខេត្តកែបដើម្បីធ្វើម៉េចឱ្យបានជាការផ្ញើសារទៅដល់ប្រជាពលរដ្ឋនៅក្នុងមូលដ្ឋានឱ្យចូលរួមថែរក្សា ហើយបណ្តុះស្មារតីប្រជាពលរដ្ឋនៅទូទាំងប្រទេសឱ្យគាត់ចេះស្រឡាញ់ដើមកោងកាង និងចូលរួមដាំបន្ថែមនូវព្រៃកោងកាងក្នុងប្រទេសកម្ពុជា»។
លោក អុឹម បញ្ញារិទ្ធិ ប្រធានមន្ទីរបរិស្ថានខេត្តកែប បានឱ្យដឹងនៅថ្ងៃទី ២៥ ខែកក្កដាថា ការសម្រេចយកសហគមន៍នេសាទភូមិថ្មី ស្ថិតក្នុងសង្កាត់ព្រៃធំ ក្រុង-ខេត្តកែប ជាទីតាំងសម្រាប់ដាំដើមកោងកាងដោយសារតែទីនោះមានអំណោយផលដល់ការដាំដើមកោងកាង មានដីភក់ទំនេរ ហើយត្រូវនឹងលក្ខខណ្ឌនៃការដុះលូតលាស់របស់ដើមកោងកាង ម្យ៉ាងទៀតទីកន្លែងនោះ មន្ត្រីជំនាញបរិស្ថានធ្លាប់ធ្វើការដាំសាកល្បងបានចំនួន ៥០០ ដើម ម្តងរួចមកហើយ ដែលទទួលបានលទ្ធផលល្អ។
លោកថ្លែងថា៖ «ព្រៃកោងកាងនេះវាត្រូវការលក្ខណពិសេសច្រើនណាស់ គឺវាត្រូវការមិនមែនតែទឹកប្រៃសុទ្ធទេ វាត្រូវការទឹកភ្លាវ បានន័យថា មានទឹកសាបហូរចូល អ៊ីចឹងតំបន់ហ្នឹងវាមានព្រែកមានអូរទឹកសាបធ្លាក់ចូល អ៊ីចឹងវាអំណោយផលឱ្យការដាំកូនកោងកាងហើយវាអាចរស់បាន»។
ប្រធានមន្ទីរបរិស្ថានខេត្តកែបប្រាប់ថា ក្នុងនាមជំនាញពាក់ព័ន្ធមន្ទីរបរិស្ថានមិនបានព្រងើយកន្តើយក្នុងការថែរក្សាព្រៃកោងកាងនោះទេ ពោលគឺ មន្ត្រីជំនាញបានសហការជាមួយរដ្ឋបាលព្រៃឈើធ្វើការការពារ អភិរក្សព្រៃកោងកាង ព្រមទាំងបានធ្វើការដាំដុះបន្ថែមបន្តបន្ទាប់ទៀតដើម្បីបង្កើនព្រៃកោងកាងផងដែរ។ លោកបន្តថា កន្លងមកទីតាំងនេះ ត្រូវបានធ្វើការដាំដុះដើមកោងកាងប្រមាណ ៥ ០០០ ដើមរួចមកហើយ ខណៈនៅថ្ងៃទី ២៦ ខែកក្កដានេះ នឹងដាំបន្ថែម ៣ ០០០ ដើមទៀត។
លោកបញ្ជាក់ថា ទោះបីមានការដាំដុះជាបន្តបន្ទាប់ក្តី ទីតាំងដីដែលត្រូវបានដាំដើមកោងកាងនោះ នៅតែមានកន្លែងទំនេរច្រើន រហូតដល់ប្រមាណជាង ២០ហិកតា ហេតុនេះបើមានអ្នកចង់ដាំ មន្ត្រីជំនាញរង់ចាំការចូលរួមសហការជួយធ្វើការដាំដុះ បន្ថែមគ្រប់ពេល។
លោកថ្លែងថា៖ «យើងនៅសល់ដីប្រមាណ ២០ហិកតាទៀត នៅអាចដាំបន្ថែមបាន ឥឡូវនេះយើងទើបដាំបានប្រមាណ ៣ ហិកតាព្រោះ ៣ ០០០ ដើមនេះបានតែចំនួន ១ ហិកតាទេ ចំណែកកាលមុន ៥ ០០០ ដើមបានតែ ១ហិកតាកន្លះទេ ហើយបើថែម ១ ០០០ ដើមទៀត នឹងបានកន្លះហិកតាទៀត អ៊ីចឹងយើងទើបដាំបានរង្វង់៣ហិកតាអីទេ»។
លោកបញ្ជាក់បន្ថែមថា មន្ត្រីបរិស្ថានតែងធ្វើការត្រួតពិនិត្យមើលព្រៃកោងកាងដែលមានស្រាប់នៅតំបន់សហគមន៍ ដោយថែរក្សាជាប្រចាំ មិនថាតែការកាប់ទន្ទ្រានព្រៃ ឬការកាប់ព្រៃកោងកាងធ្វើឧសជាដើមនោះទេ សូម្បីតែសត្វស្លាប និងជីវចម្រុះផ្សេងៗទៀតក្នុងតំបន់នោះក៏មន្ត្រីជំនាញបានធ្វើការអភិរក្សផងដែរ។
លោកបញ្ជាក់ថា៖ «មិនមានបទល្មើសកាប់រានទន្ទ្រានទ្រង់ទ្រាយធំទេ ប៉ុន្តែយ៉ាងណាក៏ដោយ ការកាប់ដើមកោងកាងបន្តិចបន្តួច ដោយប្រជាពលរដ្ឋយកទៅធ្វើរោងគោ ឬយកទៅធ្វើអ្វីខ្លះៗដែលជាតម្រូវការជាក់ស្តែងក្នុងការរស់នៅប្រចាំថ្ងៃក៏មានខ្លះៗដែរ»៕
