ភ្នំពេញៈ គណៈកម្មាធិការជាតិ គ្រប់គ្រងគ្រោះមហន្តរាយ បានចែករំលែកបទពិសោធ និងបង្ហាញយន្តការនៃការគ្រប់គ្រងគ្រោះមហន្តរាយ ក្នុងព្រះរាជាណាចក្រកម្ពុជា ជូនប្រតិភូនៃគម្រោងសាកលវិទ្យាល័យក្នុងតំបន់អាស៊ាន ធ្វើជាទុនក្នុងការរៀបចំផែនទីសម្រាប់ការកាត់បន្ថយហានិភ័យគ្រោះមហន្តរាយ ក្នុងក្របខ័ណ្ឌកម្មវិធី Erasmus+ នៃគម្រោងសហគមន៍អឺរ៉ុប។ នេះបើតាមលោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ។
លោក សុទ្ធ គឹមកុលមុន្នី ថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ២៥ ខែកក្កដាថា គណៈប្រតិភូនៃគម្រោងសាកលវិទ្យាល័យ ក្នុងតំបន់អាស៊ានបានមកទស្សនកិច្ច នៅគណៈកម្មាធិការជាតិគ្រប់គ្រងគ្រោះមហន្តរាយ កាលពីថ្ងៃទី ២២ ខែកក្កដា ដើម្បីទទួលបានបទពិសោធបន្ថែមជុំវិញការគ្រប់គ្រងគ្រោះមហន្តរាយ។
ជាការឆ្លើយតប គោលបំណងនៃប្រតិភូគម្រោងនេះ លោក ហង្ស សាមឿនទីប្រឹក្សាផ្ទាល់លោកនាយករដ្ឋមន្ត្រី ហ៊ុន សែន និងជាអនុប្រធាន គណៈកម្មាធិការជាតិគ្រប់គ្រងគ្រោះមហន្តរាយបានស្វាគមន៍និងគាំទ្រនូវដំណើរការ និងសហការជាមួយគម្រោង ធ្វើយ៉ាងណាឱ្យទទួលបានជោគជ័យ។
លោកថ្លែងថា៖«គណៈកម្មាធិការជាតិគ្រប់គ្រង់គ្រោះមហន្តរាយ បានបង្ហាញអំពីយន្តការនៃការគ្រប់គ្រងគ្រោះមហន្តរាយ ក្នុងព្រះរាជាណាចក្រកម្ពុជា ក៏ដូចជាច្បាប់ ផែនការសកម្មភាព និងយុទ្ធសាស្ត្រ ដើម្បីគ្រប់គ្រងនិងកាត់បន្ថយហានិភ័យគ្រោះមហន្តរាយនៅកម្ពុជាជូនក្រុមប្រតិភូ» ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានគូសបញ្ជាក់ថា ផែនទីសម្រាប់ការកាត់បន្ថយគ្រោះមហន្តរាយប្រសិនបើអាចរៀបចំបាននោះ ពិតជាផែនទីសំខាន់មួយ សម្រាប់កំណត់បានអំពីតំបន់ដែលងាយរងគ្រោះ តំបន់ដែលប្រឈមនឹងមុខសញ្ញារងគ្រោះថ្នាក់ផ្សេងៗ ដែលអាចបង្កជាហានិភ័យគ្រោះមន្តរាយ ដែលអំណោយផលដល់អ្នកពាក់ព័ន្ធអាចរៀបចំផែនការសកម្មភាព និងវិធានការដើម្បីឆ្លើយតបហានិភ័យគ្រោះមហន្តរាយ។
លោកថ្លែងថា៖«បើផលិតផែនទីនោះបានយើងដឹងហើយថា កន្លែងណាងាយរងគ្រោះ ដោយសារមុខសញ្ញាគ្រោះថ្នាក់អី ហើយត្រូវធ្វើសកម្មភាពយ៉ាងម៉េច អ៊ីចឹងយើងអាចដឹងពេលវេលាដែលវាកើត ទំហំនៃការប៉ះពាល់ ភាពងាយរងគ្រោះមានសមត្ថភាពប៉ុនណា ? ដូចច្នេះយើងអាចកំណត់នូវវិធានការបាន» ។
លោក សុទ្ធ គឹមកុលមុន្នី ប្រាប់ថា ប្រតិភូនៃគម្រោងនៃសាកលវិទ្យាល័យអាស៊ានទាំងនោះមាន សមាជិក មកពីប្រទេសកម្ពុជា ម៉ាឡេស៊ី ហ្វីលីពីន និង សាកលវិទ្យាល័យ នៅក្នុងតំបន់អឺរ៉ុបចំនួន៣ រួមមានប្រទេសអេស្ប៉ាញ ក្រិក និង លុចសំបួរ ដែល ដឹកនាំដោយ សាកលវិទ្យាល័យ Silesian University of Technology (SUT) ពីប្រទេសប៉ូឡូញ។
ប្រតិភូនៃគម្រោងនេះ បានកំណត់យកសាកលវិទ្យាល័យស្វាយរៀង នៅក្នុងខេត្តស្វាយរៀងជាទីកន្លែងសម្រាប់សិក្សាស្រាវជ្រាវនៅកម្ពុជា។
លោកប្រាប់ទៀតថា ផែនទីនោះនឹងត្រូវផលិតតម្រូវទៅតាមប្រទេសនីមួយៗ ហេតុនេះ មុនដាក់ឱ្យប្រើប្រាស់ត្រូវឆ្លងកាត់តំណាងប្រទេសធ្វើការពិនិត្យសម្រេចជាមុនសិន តួយ៉ាងដូចកម្ពុជាមានគណៈកម្មាធិការជាតិគ្រប់គ្រងគ្រោះមហន្តរាយជាអ្នកគ្រប់គ្រង ហេតុនេះត្រូវធ្វើការពិនិត្យមើល ជាក់ស្តែង មុននឹងដាក់សម្រាប់កម្ពុជា៕