ព្រះសីហនុៈ វត្ថុតាងគ្រឿងញៀនជិត ៦០ គីឡូក្រាម ដែលសមត្ថកិច្ចខេត្តព្រះសីហនុ ខេត្តកំពត និងខេត្តកំពង់ស្ពឺ ប្រមូលបានពីការបង្ក្រាប ត្រូវបានដុតកម្ទេចរួមគ្នានៅថ្ងៃទី ២៦ កក្កដា ក្នុងខេត្តព្រះសីហនុ បន្ទាប់ពីតុលាការបានចេញសាលដីកាស្ថាពរ។
លោកនាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនដែលជាអធិបតីក្នុងពិធីដុតបំផ្លាញគ្រឿងញៀនទាំងនេះបានឱ្យដឹងនៅថ្ងៃទី ២៦ កក្កដាថា គ្រឿងញៀនដែលដុតបំផ្លាញចោលនាពេលនេះមានទម្ងន់ជិត ៦០ គីឡូក្រាម ដែលប្រមូលបានពីខេត្តកំពត កំពង់ស្ពឺ និងខេត្តព្រះសីហនុ។ វត្ថុតាងគ្រឿងញៀននេះ គឺបានមកពីប្រតិបត្តិការបង្ក្រាបបទល្មើសនៅក្នុងភូមិសាស្ត្ររបស់ខេត្តនីមួយៗខាងលើ។ ប៉ុន្តែមិនមែនជាវត្ថុតាងគ្រឿងញៀនដែលរឹបអូសបានពីការផលិតកែច្នៃនោះទេ។
លោកបានបញ្ជាក់ថា កាលណាយកគ្រឿងញៀនមកដុតកម្ទេចចោល ទាល់តែមានដីកាស្ថាពរពីតុលាការ។ដូច្នេះសំណុំរឿងគ្រឿងញៀនខ្លះនៅពេលមិនទាន់មានដីកាស្ថាពរនៅសាលាដំបូង សាលាឧទ្ធរណ៍ និងតុលាការកំពូលទេគឺត្រូវរក្សាទុកសិន ព្រោះជនល្មើសដែលត្រូវសមត្ថកិច្ចចាប់ខ្លួននោះ គាត់ប្តឹងតតាំងក្តីគ្នាជាមួយសមត្ថកិច្ចនៅតុលាការ ដើម្បីបានសម្រាលទោសឬកម្រិតទោសនៅទាបជាងមុនអ៊ីចឹងទៅ។
លោកថ្លែងថា៖ «ហេតុដូច្នេះបើរឿងក្តីមិនទាន់ចប់នៅតុលាការគឺវត្ថុតាងបទល្មើសក៏គេមិនទាន់យកមកដុតដែរទាល់តែចប់បាន ១ ឆ្នាំទើបគេដុត។ ប៉ុន្តែរឿងខ្លះបើបរិមាណគ្រឿងញៀននោះវាច្រើនពេក ពិបាកទុកដាក់គេរឹបអូសមុនក៏បានដែរ»។
ជាញឹកញយ បទល្មើសគ្រឿងញៀន ត្រូវបានកម្លាំងសមត្ថកិច្ចបង្ក្រាបដោយចាប់បានទាំងជនល្មើស និងគ្រឿងញៀនដែលមានលក្ខណៈជាការវេចខ្ចប់ដុំៗ។ ករណីបែបនេះត្រូវបានលោកនាយឧត្តមសេនីយ៍ មាស វិរិទ្ធ បញ្ជាក់ប្រាប់ថា គ្រឿងញៀនជាកញ្ចប់ៗនោះគឺជាថ្នាំញៀននាំចូលឆ្លងដែនពីតំបន់ត្រីកោណមាស ហើយត្រៀមចែកចាយក្នុងស្រុកផង និងនាំចេញទៅក្រៅប្រទេសផង ដូចជា ប្រទេសវៀតណាម ប្រទេសថៃ ជាដើម។
លោកបានបន្តថា ពួកឧក្រិដ្ឋជនឥឡូវនេះ បាននាំយករបស់ដែលមិនទាន់ខុសច្បាប់មកទុកដាក់នៅកន្លែងណាមួយសិន។លុះដល់គាត់មើលសភាពការណ៍អាចធ្វើទៅបានគឺគាត់យកវត្ថុនោះមកផ្សំចូលសារធាតុគ្នាហើយផលដែលកើតចេញពីអំពើផ្សំនោះកើតចេញជាបទល្មើស ហើយសមត្ថកិច្ចបង្ក្រាប។
ទន្ទឹមនឹងនេះ លោកនាយឧត្តមសេនីយ៍ មាស វិរិទ្ធ បានកោតសរសើរដល់សមត្ថកិច្ចគ្រប់ផ្នែក ក៏ដូចជា ស្ថាប័នច្បាប់ដែលបានរួមគ្នាបង្ក្រាបបទល្មើសគ្រឿងញៀន ហើយជនល្មើសពាក់ព័ន្ធក៏ត្រូវបាននាំយកទៅផ្តន្ទាទោសដែរ។ ជាមួយគ្នានេះ លោកក៏បានណែនាំដល់សហគមន៍ឱ្យចូលរួមគ្រប់វិធានការដើម្បីទប់ស្កាត់បញ្ហាគ្រឿងញៀន សម្រាប់សង្គមជាតិទាំងមូលផងដែរ។
ចំពោះវត្ថុតាងគ្រឿងញៀនដែលសមត្ថកិច្ចបានដុតកម្ទេចទាំងនោះ សម្រាប់ខេត្តព្រះសីហនុមានជាង ២០ គីឡូក្រាម ខេត្តកំពង់ស្ពឺមានជាង ៣១ គីឡូក្រាម និងខេត្តកំពតមានជាង ៥ គីឡូក្រាម៕