រថយន្តទៅបង់ពន្ធ នៅអគ្គនាយកដ្ឋានគយ និងរដ្ឋាករ នៅក្នុងខែកក្កដា។ រូបថត សហការី
ភ្នំពេញៈ អគ្គនាយកដ្ឋានគយ និងរដ្ឋាករ (អគរ) ណែនាំដល់មន្រ្តីសាខារបស់ខ្លួន ត្រូវបង្កើនប្រសិទ្ធភាពនៃការប្រមូលពន្ធ និងអាករ លើរថយន្តគ្មានពន្ធមានស្រាប់ក្នុងប្រទេស ហើយក្នុងករណីចាំបាច់ត្រូវបន្ថែមម៉ោងរដ្ឋបាលដល់ម៉ោង ៨ យប់ រួមទាំងថ្ងៃសៅរ៍ និងអាទិត្យ និងត្រៀមយុទ្ធនាការបង្ក្រាបរថយន្តគ្មានពន្ធចាប់ពីខែសីហាតទៅ។
ក្នុងលិខិតចុះហត្ថលេខាដោយ អគ្គនាយកគយ និងរដ្ឋាករលោក គុណ ញឹម ចុះថ្ងៃទី ២៦ ខែកក្កដា ឱ្យដឹងថា ដើម្បីបង្កើនប្រសិទ្ធភាពនៃការប្រមូលពន្ធ និងអាករ លើរថយន្តគ្មានពន្ធមានស្រាប់ក្នុងប្រទេសដែលនៅសេសសល់ ជាពិសេសនៅពេលដែលឱសានវាទនៃការអនុញ្ញាតឱ្យម្ចាស់ រថយន្តចង្កូតស្តាំ គ្មានពន្ធចូលមកបង់ពន្ធឬចុះបញ្ជី ប្រធាននាយកដ្ឋាន សាលា និងការិយាល័យគយ និងរដ្ឋាករ ត្រូវផ្សព្វផ្សាយដល់សាធារណជន តាមភូមិសាស្ត្រ ទទួលខុសត្រូវរៀងៗខ្លួន ឱ្យបានទូលំទូលាយ។
លិខិតណែនាំបន្តថា ត្រូវបន្តផ្តល់សេវាទទួលបង់ពន្ធ និងអាករ ជាពិសេសការចុះបញ្ជីរថយន្តចង្កូតស្តាំគ្មានពន្ធ មានស្រាប់ក្នុងប្រទេស ឱ្យបានកាន់តែសកម្មនិងល្អប្រសើរ។
លិខិតបញ្ជាក់ថា៖ «ក្នុងករណីចាំបាច់ ត្រូវបន្ថែមម៉ោងរដ្ឋបាល រហូតដល់ម៉ោង ២០:០០ យប់ រួមទាំងថ្ងៃសោរ៍ និងថ្ងៃអាទិត្យ ហើយនៅថ្ងៃទី ៣១ ខែ កក្កដា ឆ្នាំ ២០២២ ដែលជាថ្ងៃចុងក្រោយ នៃការអនុញ្ញាតឱ្យម្ចាស់រថយន្តចង្កូតស្ដាំគ្មានពន្ធ នៅសេសសល់មកបំពេញកាតព្វកិច្ចពន្ធអាករ ឬចុះបញ្ជី ត្រូវបិទបញ្ចប់ម៉ោងរដ្ឋបាល ត្រឹមម៉ោង ២២:០០ យប់»។
ជាមួយគ្នានេះដែរ អគរ សង្កត់ធ្ងន់ថា ចាប់ពីថ្ងៃទី ០១ ខែ សីហា ឆ្នាំ ២០២២ តទៅ គ្រប់អង្គភាពគយ និងរដ្ឋាករ ត្រូវប្រមូលផ្ដុំនិងប្រើប្រាស់កម្លាំងសមស្រប ដើម្បីអនុវត្តយុទ្ធនាការបង្ក្រាប ឱ្យបានសកម្ម និងម៉ឹងម៉ាត់លើរថយន្តគ្មានពន្ធគ្រប់ប្រភេទ នៅគ្រប់មុខសញ្ញាដូចជា ទីសាធារណៈ ការដ្ឋាន និងអាជីវកម្មដ្ឋានជាដើម។
មន្រ្តីទំនាក់ទំនងសាខាគយ និងរដ្ឋាករខេត្តកំពង់ស្ពឺ លោក សោម អូនសំរិទ្ធ ប្រាប់ ភ្នំពេញ ប៉ុស្តិ៍ថា លោកបានទទួលលិខិតនោះរួចហើយ និងកំពុងអនុវត្តផងដែរ ហើយករណីមានម្ចាស់រថយន្តគ្មានពន្ធសម្រុកមកចុះបញ្ជី នោះនឹងធ្វើការថែមម៉ោង។ យ៉ាងណាមិញលោកថា សម្រាប់ខេត្តកំពង់ស្ពឺម្ចាស់រថយន្តគ្មានពន្ធចូលមកចុះបញ្ជីធម្មតា ប៉ុន្តែលោកមិនអាចប្រាប់ពីចំនួននោះបានទេ។
លោកថា៖ «ពួកខ្ញុំអនុត្តទៅតាមលិខិតណែនាំគេចែងយ៉ាងម៉េចយើងធ្វើអ៊ីចឹង ហើយឥឡូវនេះ ម្ចាស់រថយន្តគ្មានពន្ធគាត់បន្តចូលមកចុះបញ្ជី និងបង់ពន្ធធម្មតា ប៉ុន្តែយើងមិនទាន់អាចប្រាប់ពីតួរលេខបានទេ ព្រោះអីតួលេខកើនរហូត»។
នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជាលោក សន ជ័យ បានលើកឡើងថា ការបំពេញកាតព្វកិច្ចទៅលើពន្ធគយ ដែលរដ្ឋាភិបាលកំពុងរឹតបន្តឹងនាពេលនេះ គឺជាវិធានការថ្មីមួយដ៏ល្អ ដែលរួមចំណែកដល់ចំណូលជាតិ និងជាការចង់បានរបស់ពលរដ្ឋគ្រប់រូប។
ទន្ទឹមនឹងនេះដែរ លោកស្នើដល់អគ្គនាយកដ្ឋានគយ និងរដ្ឋាករកម្ពុជា ត្រូវបង្កលក្ខណៈងាយស្រួលក្នុងការចុះបញ្ជីរថយន្តដែលគ្មានពន្ធស្រាប់ ចៀសវាងនីតិវិធីស្មុគស្មាញ ដោយលោកចាត់ទុកថា នេះក៏ជាកត្តាលើកទឹកចិត្តដល់ម្ចាស់រថយន្តទាំងនោះចូលមកចុះបញ្ជី និងបង់ពន្ធផងដែរ។
លោកបញ្ជាក់ថា៖«ការបំពេញកាតព្វស្មើភាពគ្នា ចំពោះមុខច្បាប់ គឺជារឿងមួយចៀសមិនរួច ប៉ុន្តែទន្ទឹមនោះយើងចង់ឃើញការសម្រួលនីតិវិធីទាំងឡាយ ដែលពាក់ព័ន្ធការបំពេញកាតព្វកិច្ចបង់ពន្ធនាំចូល រថយន្ត។ ខ្ញុំយល់ថា អាជ្ញាធរដ្ឋដែលមានការពាក់ព័ន្ធគួរតែពន្លឿន ឬផ្តល់អាទិភាពទៅឱ្យម្ចាស់យានយន្ត ដែលមិនទាន់បង់ពន្ធអាចបំពេញកាតព្វកិច្ច បានចៀសវាង នីតិវិធីស្មុគស្មាញដែលជាឧបសគ្គ ដល់ពួកគេ»។
សូមជម្រាបថា សម្រាប់រថយន្តចង្កូតស្តាំ ការចុះបញ្ជីរថយន្តផុតកំណត់ត្រឹមថ្ងៃទី ៣១ ខែកក្កដា ប៉ុន្តែការបង់ពន្ធនិងអាករ ខាង អគរ ពន្យារពេលរហូតដល់ថ្ងៃទី ៨ ខែ តុលា ឆ្នាំ ២០២២។ ស្របជាមួយគ្នានេះដែរ ម្ចាស់រថយន្តចង្កូតឆ្វេងគ្មានពន្ធស្រាប់ក្នុងប្រទេស ដែលជ្រកក្រោមស្លាកលេខផ្សេងៗ អាចទៅបង់ពន្ធនិងអាកររហូតថ្ងៃទី ៨ តុលា ដោយមិនរងការផាកពិន័យឡើយ៕
.jpg)
