.jpg)
វាលស្រែលិចទឹកដោយសារភ្លៀងធ្លាក់ខ្លាំងជាប់គ្នា ក្នុងស្រុកមង្គលបុរី ខេត្តបន្ទាយមានជ័យ៕ រូបថត FB
បន្ទាយមានជ័យៈ ដំណាំស្រូវរបស់ប្រជាកសិករជាង ៧០០ ហិកតា ស្ថិតក្នុងឃុំអូរប្រាសាទ ស្រុកមង្គលបុរី ខេត្តបន្ទាយមានជ័យ ត្រូវបានលិចដោយសារជំនន់ទឹកភ្លៀង ក្នុងរយៈពេល ១ សប្តាហ៍ចុងក្រោយនេះ។ លោកមេឃុំអូរប្រាសាទអះអាងថា ដំណាំស្រូវដែលទឹកជន់លិចនោះមិនទាន់មានការខូចខាតនៅឡើយ ប៉ុន្តែបើទឹកនៅតែមិនស្រកទៅវិញដោយអូសបន្លាយពេលយូរថែមទៀត ដំណាំស្រូវទាំងនោះនឹងរងការខូចខាត។
ថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ២៨ ខែកក្កដា លោក ភុំ បូផល មេឃុំអូរប្រាសាទ បានឲ្យដឹងថា ជំនន់ទឹកភ្លៀងដែលជន់លិចដំណាំស្រូវប្រជាកសិករនេះមាន ២ កន្លែងផ្សេងគ្នា ទី១ គឺនៅភូមពោធិ៍រៀង ភូមិរូងក្របៅ និងភូមិគោកអំពិល ដោយទឹកបានលិចស្រូវប្រជាពលរដ្ឋ ២៥ ហិកតា ចំណែក ១ កន្លែងទៀត ស្ថិតនៅចំណុចទំនប់ក្រខុប លិចស្រូវចំនួន ៧០០ ហិកតា។ លោកបញ្ជាក់ថា ទោះបីជាមានទឹកលិចស្រូវក្តី ប៉ុន្តែ មិនទាន់មានការខូចខាតនោះទេ ហើយគិតមកដល់ថ្ងៃទី ២៧ ខែកក្កដានេះ ទឹកកំពុងស្រកចុះទៅវិញ។
លោកមេឃុំអូរប្រាសាទបានឲ្យដឹងថា ការជន់លិចនេះដោយសារទឹកភ្លៀងខ្លាំង ហើយក្រសួងធនធានទឹកកំពុងស្តារប្រឡាយឡើងវិញឆ្លងកាត់តំបន់នោះ។ ប្រជាពលរដ្ឋដែលជាប់ប្រឡាយបានទប់ទឹកសម្រាប់ស្រោចស្រពដំណាំស្រូវ ប៉ុន្តែពេលភ្លៀងធ្លាក់ខ្លាំងទឹកក៏ឡើងលិចទំនប់នោះហៀរចូលទៅក្នុងវាលស្រែបណ្តាលឲ្យមានការលិចលង់។
លោកថ្លែងថា៖ «វិធីដោះស្រាយឥឡូវយើងមានតែបើកទឹកបង្ហូរសម្រក និងបង្ហូរទឹកទៅកន្លែងដែលអត់ទឹក។ វាមានកន្លែងខ្លះអត់ កន្លែងខ្លះលិច អ៊ីចឹងពិបាកដែរក្នុងភូមិមួយៗ យើងដោះស្រាយអាកន្លែងទឹកលិចផង និងកន្លែងអត់ទឹកផង»។
លោក ជា សុបិន ប្រជាកសិករម្នាក់នៅភូមិពោធិ៍រៀង ឃុំអូរប្រាសាទ ស្រុកមង្គលបុរី បានឱ្យដឹងថា ក្នុងឆ្នាំ ២០២២ នេះ ស្រូវរបស់លោកបានរងគ្រោះដោយជំនន់ទឹកភ្លៀង ២ លើកមកហើយ ដែលលើកទី២ នេះ លោកមានការព្រួយបារម្ភចំពោះការខូចខាតបើសិនជាទឹកមិនស្រកទៅវិញឆាប់ៗនេះ។
លោកថ្លែងថា៖ «ធម្មតាបើលិច ៤-៥ ថ្ងៃ ទៅ ១ អាទិត្យអាចមិនអីទេ ប៉ះពាល់ខូចខាតតិចតួច តែប្រសិនបើនៅបន្តលិចលង់រយៈពេលយូរទៀត គឺអាចនឹងរលួយខូចអស់ហើយ ស្រូវពួកខ្ញុំនៅទីនេះមាន ស្រូវសែនក្រអូប និងអ៊ីអ៊ែអីហ្នឹង»។
លោក ឡាយ វុធី អនុប្រធានមន្ទីរធនធានទឹក និងឧតុនិយមខេត្តបន្ទាយមានជ័យបានឲ្យដឹងថា ការជន់លិចដំណាំប្រជាកសិករនេះ គឺមានកន្លែងបន្ធូរទឹកនៅផ្នែកខាងក្រោម ដែលអាចឲ្យទឹកស្រកវិញបានលឿន និងមិនធ្វើឲ្យប៉ះពាល់ខូចខាតដំណាំស្រូវរបស់ប្រជាពលរដ្ឋនោះទេ ។
លោកថ្លែងថា៖ «នៅពេលរាំងបងប្អូនប្រជាពលរដ្ឋគាត់ទប់បិទប្រឡាយដើម្បីយកទឹកប្រើប្រាស់ ហើយនៅពេលភ្លៀងខ្លាំង ធ្វើឲ្យទឹកជន់ អ៊ីចឹងយើងបើកទឹកវិញទៅលែងអីហើយ។ ឥឡូវយើងបានបើកទឹកវិញហើយ មិនយូរទេទឹកនឹងស្រកអស់»។
លោកអនុប្រធានមន្ទីរធនធានទឹក និងឧតុនិយមខេត្តបន្ទាយមានជ័យ ប្រាប់ថា ក្រសួងធនធានទឹកបានកំពុងធ្វើការស្តារប្រព័ន្ធអូរធម្មជាតិ ក្នុងគោលបំណងដោះទឹកជំនន់ចេញពីស្ទឹងអង្គរបុរីដែលតែងតែលិចជារៀងរាល់ឆ្នាំ។ អូរធម្មជាតិគោករាក់ដែលកំពុងស្តារឡើងវិញនេះមានប្រវែង ២៧ គីឡូម៉ែត្រ ចំណែកជម្រៅ និងទទឹងអាស្រ័យជាក់ស្តែងទៅតាមទីតាំង។ ប្រឡាយនេះឆ្លងកាត់ ៦ឃុំ ចាប់ពីឃុំចំណោម រហូតដល់ ឃុំគោកបល្ល័ង្ក។
លោកថ្លែងថា៖ «ប្រឡាយហ្នឹងយើងមានស្រាប់ហើយតែវាគោករាក់ទៅ គឺយើងស្តារបន្ថែមទី១ដើម្បីដោះទឹកជំនាន់ឲ្យបានលឿន ហើយអាចជាកន្លែងដែលស្តុកទឹកទុកសម្រាប់ជួយដល់ការស្រោចស្រពសម្រាប់ប្រជាកសិករនៅក្នុងតំបន់ដែលយើងស្តារហ្នឹង»៕
